ఎంఎన్ఆర్ఏ వ్యాక్సిన్ వాడకంతో పెరిగి గుండె సమస్యలు

ఎంఎన్ఆర్ఏ కోవిడ్-19 వ్యాక్సిన్ వాడకంతో యువకుల్లో గుండె సమస్యలు ఎక్కువయ్యాయని తాజాగా కథనాలు వస్తున్నాయి. కరోనా టీకాలు వేయించుకున్న వారిలో గుండె సంబంధిత సమస్యలతో మరణించే రిస్క్ పెరుగుతోందని ఫ్లోరిడా సర్జన్ జనరల్ డాక్టర్ జోసెఫ్ ఏ లడపో తెలిపారు. కోవిడ్-19 ఎంఆర్ఎన్ఏ టీకాలు వేయించుకున్న.. 18 నుంచి 39 ఏళ్ల మధ్య వయసున్న పురుషుల్లో గుండె సంబంధిత సమస్యలతో మరణించే ముప్పు ఎక్కువగా ఉందని డాక్టర్ జోసెఫ్ తెలిపారు. నిజాలను బయటపెట్టే విషయంలో తాము సైలెంట్‌గా ఉండలేమని ఆయన ట్వీట్ చేశారు.

వ్యాక్సిన్ ఎంత మేరకు సురక్షితమో తేల్చే సెల్ఫ్ కంట్రోల్డ్ కేస్ సిరీస్ ద్వారా ఫ్లోరిడా హెల్త్ డిపార్ట్‌మెంట్ ఓ అనాలిసిస్ నిర్వహించింది.ఎంఎన్ఆర్ఏ కోవిడ్-19 వ్యాక్సిన్ వేయించుకున్న వారిలో మరణించే ముప్పు అధికంగా ఉందని ఈ అధ్యయనంలో తేలింది. వ్యాక్సిన్ తీసుకున్న 28 రోజుల్లోపు 18-39 ఏళ్ల మధ్య వయసున్న పురుషుల్లో గుండె సంబంధిత సమస్యలతో మరణించే ముప్పు 84 శాతం పెరిగినట్లు ఈ అధ్యయనంలో గుర్తించారు. ఇప్పటికే మయోకార్డిటిస్, పెరికార్డిటిస్ లాంటి గుండె సంబంధిత సమస్యలు ఉన్న వారు కోవిడ్ టీకాలు వేయించుకునే విషయంలో జాగ్రత్తగా ఉండాలని.. ముందుగానే హెల్త్‌‌కేర్ ప్రొవైడర్‌తో ఈ విషయాన్ని చర్చించాలని ఫ్లోరిడా హెల్త్ అడ్వైజరీ సూచించింది.

2020, 2021 సంవత్సరాల్లో ప్రపంచవ్యాప్తంగా కరోనా ప్రభావం తీవ్రంగా ఉండటంతో.. సాధారణ పరిస్థితులతో పోలిస్తే చాలా వేగంగా కరోనా వ్యాక్సిన్లకు రూపకల్పన చేశారు. కోవిడ్‌కు వ్యాక్సిన్లను కనుగొనగానే.. ప్రజలను కోవిడ్ నుంచి రక్షించడం కోసం ప్రపంచ దేశాలు భారీ స్థాయిలో వ్యాక్సినేషన్ ప్రక్రియను చేపట్టాయి. ఈ వ్యాక్సిన్ల కారణంగా కోట్లాది మంది ప్రజలు ప్రయోజనం పొందారు. అయితే ఎంఎన్ఆర్ఏ వ్యాక్సిన్లతో 18-39 ఏళ్ల లోపు పురుషుల్లో గుండెపోటు మరణాల ముప్పు ఎక్కువగా ఉందని అధ్యయనంలో తేలడం ఆందోళన కలిగించే అంశమే. నాన్- ఎంన్‌ఆర్ఏ వ్యాక్సిన్లతో గుండె సంబంధిత మరణాల ముప్పు పెరుగుతుందని తేలలేదని ఫ్లోరిడా హెల్త్ డిపార్ట్‌మెంట్ బులెటిన్‌లో పేర్కొంది. అమెరికాలో ఎక్కువగా వేసిన ఫైజర్, మోడెర్నా వ్యాక్సిన్లు రెండూ ఎంఎన్ఆర్ఏ టీకాలే. భారత్‌లో అభివృద్ధి చేసిన జెమ్‌‌కొవాక్ -19 వ్యాక్సిన్ సైతం ఎంఎన్ఆర్ఏ రకానికి చెందినదే. ఈ వ్యాక్సిన్ అత్యవసర వినియోగానికి ఆమోదం లభించింది.