కారు ఇవ్వలేదని తలాక్..తలాక్..తలాక్ చెప్పేశాడు
national | Suryaa Desk | Published : Mon, Oct 17, 2022, 01:35 AM
ఇస్లాంలో వరకట్నంలేదు...అదనపు కట్నం ప్రస్తావనకు ఆస్కారమే లేదు. ఈ వాస్తవాన్ని చాలా మంది ముస్లింలు నేటికి గుర్తించడంలేదు. దీంతో వారి చేసే అనార్థాలకు బయటి ప్రపంచంలో దోషులగా నిలుస్తున్నారు. ఇదిలావుంటే మన దేశంలో ట్రిపుల్ తలాక్ ను నిషేధించినప్పటికీ ఛాందసవాదులు ఆ దురాచారాన్ని ఇంకా పాటిస్తూనే ఉన్నారు. ట్రిపుల్ తలాక్ నుంచి ముస్లిం మహిళలను రక్షించేందుకు చట్టాలు చేసినా... దురాచారం మాత్రం ఇంకా పూర్తిగా ఆగలేదు. తాజాగా ఉత్తరప్రదేశ్ లోని ఘజియాబాద్ లో ఇలాంటి ఉదంతమే మరొకటి వెలుగులోకి వచ్చింది. కట్నంతో పాటు కారు ఇవ్వలేదనే కారణంతో భార్యకు ఫోన్ చేసి ట్రిపుల్ తలాక్ చెప్పేశాడొక ప్రబుద్ధుడు. దీంతో, బాధితురాలు పోలీసులను ఆశ్రయించింది. భర్త సహా ఐదుగురిపై పోలీసులకు ఫిర్యాదు చేసింది.
వివరాల్లోకి వెళ్తే రుబినా అనే మహిళకు ఇమ్రాన్ సైఫీ అనే వ్యక్తితో 2017లో వివాహం జరిగింది. వీరికి నాలుగేళ్ల పాప ఉంది. పెళ్లి జరిగి ఏళ్లు గడుస్తున్నా భర్త, అత్తామామలు కట్నం కోసం వేధిస్తూనే ఉన్నారు. దీనిపై గత ఏడాదే ఆమె పోలీసులకు ఫిర్యాదు చేసింది. ఈ క్రమంలో అత్తింటి వారు రాజీ చేసుకుని ఆమెను ఇంటికి తీసుకెళ్లారు. కొన్ని రోజుల క్రితం రాజస్థాన్ లో ఉద్యోగం అంటూ భార్యను పుట్టింట్లో వదిలి భర్త వెళ్లిపోయాడు. ఆ తర్వాత ఫోన్ చేసి ట్రిపుల్ తలాక్ చెప్పాడు. మరోవైపు కేసు నమోదు చేసిన పోలీసులు నిందితులను అరెస్ట్ చేసేందుకు సిద్దమవుతున్నారు.
|
|