లోన్ యాప్ ల పట్ల అప్రమత్తంగా ఉండండి: పోలీసులు హెచ్చరిక

లోన్ యాప్ ల  పట్ల ప్రజలు అప్రమత్తతో వ్యవహరించాలని పోలీసులు  హెచ్చరిస్తున్నారు. ఇదిలావుంటే పోలీసులు ఎన్ని కఠిన చర్యలు తీసుకుంటున్నా.. రుణయాప్ నిర్వాహకుల వేధింపులు ఆగటం లేదు. తీసుకున్న రుణం చెల్లించినా అదనంగా చెల్లించాలని ఒత్తిడి చేస్తున్నారు. లేదంటే మార్ఫింగ్ చేసిన ఫోటోలు సోషల్ మీడియాలో పెడతామని హెచ్చరిస్తున్నారు. తాజాగా.. ఇలాంటి ఘటనే నెల్లూరు జిల్లాలో చోటుచేసుకుంది. పోలీసులు తెలిపిన వివరాల ప్రకారం.. బాలాజీనగర్‌ పోలీసుస్టేషన్‌ పరిధిలోని ఆదిత్యనగర్‌కు చెందిన కొండ్రెడ్డి విద్యసాగర్‌రెడ్డి లోన్‌ యాప్‌లో రూ.30 వేలు తీసుకున్నారు. ఆయన తీసుకున్న రుణం చెల్లించినా.. పలువురు ఫోన్లుచేసి లోన్‌ చెల్లించలేదని, తమ ఖాతాలో నగదు జమ కాలేదని, తీసుకున్న రుణం చెల్లించకపోతే మార్ఫింగ్‌ చేసిన అసభ్యకర ఫొటోలను సోషల్ మీడియాలో పోస్ట్‌ చేస్తామని బెదిరించారు. ఇలా విద్యాసాగర్‌ నుంచి రూ.40 లక్షల వరకు వసూలు చేశారు. అయినా లోన్ యాప్ నిర్వహకుల నుంచి వేధింపులు కొనసాగుతుండటంతో బాధితులు పోలీసులను ఆశ్రయించాడు.

కేసు నమోదు చేసుకొని రంగంలోకి దిగిన పోలీసులు రెండు ప్రత్యేక బృందాలను ఏర్పాటు చేసి తెలంగాణ, తమిళనాడు, కర్ణాటక రాష్ట్రాల్లో దర్యాప్తు చేపట్టారు. తెలంగాణలోని నిర్మల్‌ జిల్లాకు చెందిన పవార్‌ అజయ్‌ అలియాస్‌ అజయ్‌, రాథోడ్‌ సాయి కిరణ్‌, ఆదిలాబాద్‌ జిల్లాకు చెందిన జాదవ్‌ యువరాజ్‌, కర్ణాటకకు చెందిన అబ్దుల్‌ లయిక్‌లను అరెస్ట్‌ చేశారు. వారిని విచారించగా.. లీసా అలియాస్‌ లీ జాహాన్‌ అనే మహిళ ఆధ్వర్యంలో లోన్‌ యాప్‌ నిర్వాహణ సాగుతున్నట్లు తెలిపారు. నిందితుల బ్యాంకు ఖాతాల్లోని రూ.1.20 కోట్లను ఫ్రీజ్‌ చేయాలని ఆయా బ్యాంకులను పోలీసులు ఆదేశించారు.

అలహాబాద్‌ ట్రిపుల్‌ ఐటీ చదువుతున్న అజయ్‌కు. ఇన్‌స్ట్రాగ్రామ్‌లో లీ జాహాన్‌తో పరిచయం ఏర్పడింది. లోన్‌యాప్‌ల లావాదేవీల నిర్వహణకు బ్యాంకు ఖాతాల యాక్సె్‌స్ ఇస్తే ఒక్కో ట్రాన్సాక్షన్‌పై 0.004 కమీషన్‌ ఇస్తామని అజయ్‌కు లీ తెలిపింది. దీంతో అజయ్‌ తన స్నేహితులు తెలిసిన వారితో బ్యాంకు ఖాతాలు తెరిపించి యాక్సెస్‌ ఆమెకు ఇచ్చాడు. ఈ మేరకు జాదవ్‌ యువరాజ్‌కు నాలుగు, అజయ్‌కు మూడు, సాయికిరణ్‌కు మూడు, అబ్దుల్‌కు రెండు బ్యాంకు ఖాతాలు ఉన్నాయని పోలీసులు గుర్తించారు. 12 ఫేక్‌ కంపెనీల పేర్లతో లీ జహాన్‌ లోన్‌యా్‌పలు నిర్వహిస్తోందని ఎస్పీ విజయారావు వెల్లడించారు ఆమెకు రెడ్‌కార్నర్‌ నోటీసులు జారీ చేస్తామని పోలీసులు చెప్పారు. లోన్ యాప్‌ల పట్ల అప్రమత్తంగా ఉండాలని పోలీసులు హెచ్చరిస్తున్నారు. లోన్ యాప్ నిర్వహకులు వేధిస్తే వెంటనే పోలీసులకు ఫిర్యాదు చేయాలని సూచిస్తున్నారు. పోలీసులకు ఫిర్యాదు చేసేందుకు టోల్ ఫ్రీ నెంబర్ అందుబాటులో ఉందని చెప్పారు.