మా వివాహానికి రండి...ఇండియన్ ఆర్మీని ఆహ్వానించిన ప్రేమ జంట

మీ వివాహానికి రండి అని ఇండియన్ ఆర్మీని ఓ ప్రేమ జంట ఆహ్వానించింది.  మీ వల్లే మేము సంతోషంగా పెళ్లి చేసుకుంటున్నాము అంటూ ఇండియన్ ఆర్మీని తమ వివాహానికి ఆహ్వానించింది ఆ జంట. అంతేకాదు, తమ స్వదస్తూరితో ఆ ఆహ్వాన లేఖను రాసి భారత సైన్యానికి చేరవేసింది. వివాహ ఆహ్వాన పత్రికకు సంబంధించిన ఫోటో సోషల్ మీడియాలో వైరల్‌గా మారింది. కేరళకు చెందిన ఓ జంట నవంబర్ 10న వివాహం బంధంతో ఒక్కటైంది. ఈ నవ దంపతుల పేర్లు రాహుల్, కార్తీక.

‘ఎల్లప్పుడూ మమ్మల్ని సురక్షితంగా ఉంచుతున్నందుకు మేము మీకు ఎంతో రుణపడి ఉంటాము. మీ వల్లే మేము ప్రశాంతంగా నిద్రపోతున్నాము. మా ప్రియమైన వారితో సంతోషకరమైన రోజులను గడపగలుగుతున్నాం. అందుకు మీకు ధన్యవాదాలు. మీ వల్లే మేము సంతోషంగా పెళ్లి చేసుకుంటున్నాము. మా ఈ ప్రత్యేక రోజున మేము మిమ్మల్ని ఆహ్వానిస్తున్నందుకు చాలా సంతోషిస్తున్నాము. మా పెళ్లికి హాజరై మీ ఆశీర్వాదాలను అందించాలని కోరుకుంటున్నాము. మమ్మల్ని కాపాడుతున్నందుకు ధన్యవాదాలు’ అని రాహుల్, కార్తీక ఆ ఆహ్వాన పత్రికలో రాశారు.

‘దేశం పట్ల మీకున్న ప్రేమ, దృఢసంకల్పం, నిజమైన దేశభక్తికి మేము మీకు కృతజ్ఞతలు తెలుపుతున్నాం’ అంటూ భారత సైన్యాన్ని ఉద్దేశించి నోట్ రాసి పంపించింది ఈ జంట. ఈ వివాహ ఆహ్వానాన్ని ఇండియన్ ఆర్మీ తన ఇన్‌స్టాగ్రామ్‌ ఖాతాలో పోస్ట్ చేసింది. ఆ జంటకు శుభాకాంక్షలు తెలిపింది.

‘రాహుల్ & కార్తీకకు హృదయపూర్వక అభినందనలు. మీ ఆహ్వానానికి ధన్యవాదాలు. మీ వైవాహిక జీవితం సంతోషకరంగా, ఆనందమయంగా కొనసాగాలని భారత సైన్యం కోరుకుంటోంది’ అంటూ ఇండియన్ ఆర్మీ ఆ పోస్టులో పేర్కొంది. దీంతో ఇది వైరల్‌గా మారింది. ‘మన రియల్ హీరోల పట్ల మన హృదయాలలో ఉన్న ప్రేమను వ్యక్తపరిచేందుకు ఇదొక ఉత్తమ మార్గం’ అని ఓ నెటిజన్ పేర్కొన్నారు. ‘వావ్..! ఇది నా జీవితంలో చూసిన అత్యుత్తమ వివాహ ఆహ్వానం. మన రియల్ హీరోలకు జై హింద్’ అని మరొక నెటిజన్ రాసుకొచ్చారు. ఇంకొకరు కామెంట్ చేస్తూ.. ‘ఇది అద్భుతం!’ అన్నారు.