కడుపు నింపాలన్న గొప్ప సంకల్పంతో..రూ 20 కే కడుపు నిండా భోజనం

ఎవరి కడుపునైనా మనం నింపితే వారిచ్చే దీవెన మీ కుటుంబమంతా సల్లంగా ఉండాలి అని. అలా ఏకంగా ఎంతో మంది కడుపును తక్కువ ధరకు భోజనం వడించి నింపితే ఆ సేవకు సలాం చెప్పక తప్పదు.  విజయవాడ నగరంలో హాస్పిటల్స్, విద్యా సంస్థలు, ప్రభుత్వ, ప్రైవేటు కార్యాలయాలతో ఎప్పుడూ రద్దీగా ఉండే శిఖామణి సెంటర్ ప్రాంతంలో ఈ భోజనశాలను ఏర్పాటు చేశారు. సమాజానికి తమ వంతుగా సేవచేయాలన్న భావనతో ఐదుగురు ఉద్యోగులు ఈ భోజనశాలను ఏర్పాటు చేశారు. ఇందులో ఒక దాతకు సంబంధించిన సోదరి భోజనశాల నిర్వహణ మొత్తం చూసుకుంటున్నారు. ప్రతి రోజూ మధ్యాహ్నం 12 గంటల నుంచి 3 గంటల వరకు భోజనశాల తెరిచి ఉంటుంది.

ఉదయం 8 నుంచి వంట చేయటం ఆరంభించి.. మధ్యాహ్నం 12 గంటలకల్లా ఆహారం అంతా సిద్ధం చేస్తారు. నిర్దేశించిన వేళల ప్రకారం.. ఏ సమయంలో వచ్చినా.. ఆహారం వేడివేడిగానే వడ్డిస్తుండటం వీరి ప్రత్యేకత. ప్రధానంగా భోజనంలో రెండు మూడు కూరగాయలతో కూడిన కూర, ఒక కప్పు అన్నం, సాంబారు, మజ్జిగ అందిస్తున్నారు. వీటితో పాటు రోజూ తప్పకుండా ఏదో ఒకరకం రోటి పచ్చడి తయారుచేసి పెడుతున్నారు. భోజన ప్రియుల కోసం వాము కలిపిన పచ్చిమిర్చి, ఉల్లిపాయ ముక్కలు కూడా ఇస్తున్నారు.

ఈ భోజనశాలలో శుభ్రతకు పెద్దపీట వేస్తున్నారు. పనిచేసే వారి దగ్గర నుంచి వినియోగించే వస్తువుల వరకు అన్నింటినీ బాగా శుభ్రం చేసిన తరువాతే ఉపయోగిస్తారు. ప్లేట్‌లో అన్నం వడ్డించే ముందు వేడి నీటిలో కడిగి పెడుతున్నారు. దీనికోసం ప్రత్యేకంగా ఒక యంత్రాన్ని కొనుగోలు చేసి ఉంచారు. రోటి పచ్చడి చేయడానికి.. మిక్సీలు, గ్రైండర్లు వినియోగించకుండా పాత పద్ధతిలోనే రోలు ద్వారా తయారు చేస్తారు. ట్రస్ట్‌ ఆధ్వర్యంలో సేవాభావంతో ఆహారం అందిస్తున్నారని తెలిసి, తిన్న తర్వాత అభినందించి వెళుతున్నారు.

ప్రస్తుతం రోజుకు వంద మందికి భోజనం అందిస్తున్నామని.. భోజనశాల నిర్వహకురాలు మాధవి తెలిపారు. వీలైనంత మందికి నాణ్యమైన ఇంటి భోజనం అందించాలనే లక్ష్యంతోనే ఈ భోజనశాలను ఏర్పాటు చేశామన్నారు. రోజూ ముందే ఏమి మెనూ సిద్ధం చేయాలనేది నిర్ణయించుకుని, దానికి తగ్గట్టుగా కూరగాయలు మార్కెట్‌ నుంచి తీసుకొస్తామని చెప్పారు. భోజనశాల ప్రారంభించిన నుంచి ఇక్కడే తింటున్నానని ఓ విద్యార్థి వెల్లడించారు. ఆహారం చాలా బాగుంటుందని అన్నారు. ఇక్కడి భోజనం ఇంటి భోజనం లాగే చాలా రుచిగా ఉంటుందని చెప్పారు. అందుకే.. మధ్యాహ్న భోజన సమయానికి ఎంత దూరంలో ఉన్నా ఇక్కడికే వచ్చి తింటానని చెప్పారు.