సెలవుల్లో న్యాయమూర్తి...బెయిల్ లభించిన విడుదల కానీ అనంతబాబు

ఇన్నాళ్లపాటు బెయిల్ కోసం విశ్వ ప్రయత్నాలు చేసిన ఎమ్మెల్సీ అనంతబాబు చివరకు వాటిలో సఫలమైనా ఇంకా జైలు నుంచి బయటకు రాలేదు. తన మాజీ డ్రైవర్ సుబ్రహ్మణ్యం హత్య కేసులో ప్రధాన నిందితుడు ఎమ్మెల్సీ అనంతబాబు జైలు నుంచి బయటకు రావడం ఆలస్యమవుతోంది. హత్య కేసులో ప్రధాన నిందితుడు అనంతబాబుకు సుప్రీం కోర్టు బెయిల్ మంజూరు చేసిన విషయం విదితమే. డీఫాల్ట్ బెయిల్ కోసం ఎమ్మెల్సీ అనంతబాబు సుప్రీం కోర్టును ఆశ్రయించారు. ఈ క్రమంలో సోమవారం ఎమ్మెల్సీ అనంతబాబుకు బెయిల్ మంజూరు చేసింది. అయితే, బెయిల్ షరతులపై కింది కోర్టు నిర్ణయం తీసుకోవాలని సుప్రీం కోర్టు సూచించింది.

ఈ క్రమంలో, రాజమండ్రి సెంట్రల్ జైలు నుంచి మంగళవారం అనంతబాబు విడుదల కావాల్సి ఉండగా, వాయిదా పడింది. బెయిల్ నిబంధనలు జారీ చేయాల్సిన రాజమండ్రి ఎస్సీ, ఎస్టీ కోర్టు న్యాయమూర్తి ప్రస్తుతం సెలవులో ఉన్నారు. దీంతో, కోర్టు విధించే షరతులు ఆధారంగా బుధవారం ఎమ్మెల్సీ అనంతబాబు రాజమండ్రి సెంట్రల్ జైలు నుంచి విడుదలయ్యే అవకాశం కనిపిస్తోంది.

ఇదిలావుంటే ఎమ్మెల్సీ అనంతబాబు తన డ్రైవ‌ర్‌ సుబ్రహ్మణ్యంను హత్య చేసి, ఆ త‌ర్వాత మృత‌దేహాన్ని బాధితుడి ఇంటికి తీసుకెళ్లి వదిలేసిన ఘటన రాష్ట్రంలో సంచలనం రేపింది. మే 19వ తేదీన తన మాజీ డ్రైవర్ సుబ్రహ్మణ్యంను ఇంటి నుంచి తీసుకెళ్లిన అనంతబాబు.. రొడ్డు ప్రమాదంలో చనిపోయాడంటూ అదే రోజు మృతదేహాన్ని తీసుకొచ్చి మృతుడి ఇంటి దగ్గరే వదిలేశాడు. అయితే, సుబ్రహ్మణ్యం బంధువులు అక్కడే అనంతబాబును అడ్డుకునే ప్రయత్నం చేయగా.. అందర్నీ బెదిరించి ఆయన అక్కడ్నుంచి వెళ్లిపోయారు.

ఈ ఘటన రాష్ట్రవ్యాప్తంగా సంచలనంగా మారడంతో పోలీసులు కేసులు నమోదు చేసి దర్యాప్తు చేపట్టారు. ఆ తర్వాత ఎమ్మెల్సీ అనంతబాబును అరెస్ట్ చేశారు. తానొక్కడినే సుబ్రహ్మణ్యాన్ని హత్య చేశానని అంగీకరించినట్లు పోలీసులు ప్రకటించారు. అప్పటి నుంచి అనంతబాబు బెయిల్‌ కోసం ప్రయత్నాలు చేస్తుండగా.. తాజాగా, సుప్రీం కోర్టు బెయిల్‌ మంజూరు చేసింది.