ఆ ఆలయాన్ని 67 అడుగులు వెనక్కి జరిపారు

జాతీయ రహదారి విస్తరణ పనుల్లో భాగంగా ఉత్తర్ ప్రదేశ్‌లో ఓ హనుమాన్‌ దేవాలయాన్ని వెనక్కి జరుపుతున్నారు. షాజహాన్‌పుర్‌ జిల్లా కచియాని ఖేడా ప్రాంతంలో ఈ ప్రక్రియ కొనసాగుతోంది. అక్కడ లక్నో-ఢిల్లీ జాతీయ రహదారిని ఆనుకొని 5 చదరపు మీటర్ల విస్తీర్ణం, 64 అడుగుల పొడవు, 36 అడుగుల వెడల్పుతో హనుమాన్‌ మందిరం ఉంది. ఈ రహదారి విస్తరణ పనులు చేపట్టగా.. ఆలయం అడ్డొచ్చింది. దీంతో ఆలయానికి ఎటువంటి నష్టం జరగకుండా ఉండాలంటే వెనక్కి జరపడమే మేలని ఇంజినీర్లు, అధికారులు భావించారు. మూలవిరాట్‌ ధ్వంసం కాకుండా 67 అడుగులు వెనక్కి జరపాలని నిర్ణయించుకున్నారు.

ఈ పనులను హరియాణాకు చెందిన ఒక సంస్థకు అప్పగించారు. ఈ పనులు అక్టోబరులో ప్రారంభం కాగా.. జాకీలతో ఎత్తు పెంచి ఎనిమిది అడుగుల మేర ఆలయాన్ని వెనక్కి జరిపింది. ఆలయం పూర్తిస్థాయిలో సిద్ధం కావడానికి మరో నెల రోజులు పడుతుందని అధికారులు పేర్కొన్నారు. అయితే, తొలుత ఆలయాన్ని వెనక్కి జరిపేందుకు పూజార్లు ఒప్పుకోలేదు. మందిరానికి ఎటువంటి నష్టం జరగకుండా తరలించే ఏర్పాట్లు చేస్తామని అధికారులు నచ్చజెప్పడంతో చివరకు వారు ఒప్పుకున్నారు.

తిల్‌హార్ ఎస్డీఎం రాశీ కృష్ణ మాట్లాడుతూ.. జాతీయ రహదారి విస్తరణ కోసం కార్యాచరణలో భాగంగా ఆలయాన్ని 67 అడుగులు వెనక్కి జరపాలని నిర్ణయించామని తెలిపారు. ఇందుకు అక్టోబరు 16 న మంగళవారం నాడు పనులు ప్రారంభించామని, యూపీలో మొదటిసారి ఈ టెక్నిక్ ఉపయోగించామని పేర్కొన్నారు. జాతీయ రహదారి అథారిటీ అధికారులు, పోలీసులు సమన్వయంతో పనులు కొనసాగుతున్నాయని చెప్పారు. మంగళవారం సాయంత్రం పూజలు నిర్వహించిన అనంతరం పనులు చేపట్టామని, ఈ ప్రక్రియలో మొత్తం 250 జాకీలు సాయం తీసుకున్నామని వివరించారు.

మేము నిర్దేశించుకున్న 67 అడుగుల దూరం పూర్తయ్యిందన్నారు. హనుమాన్ మందిర మహంత్ రామ్ లఖన్ గిరి మాట్లాడుతూ.. 134 ఏళ్ల చరిత్ర కలిగిన ఈ మందిరాన్ని వెనక్కి జరపడానికి ముందు ఒప్పుకోలేదన్నారు. దీనిపై కోర్టులో రెండు కేసులు కూడా వేశామని చెప్పారు. డిప్యూటీ కలెక్టర్ రాశీ కృష్ణ ఛైరపర్సన్‌గా ఉన్న ఆలయ కమిటీ ఆధ్వర్యంలో పనులు జరుగుతున్నాయని తెలిపారు.

ఆలయాన్ని వెనక్కి జరపడానికి భూమి సమస్య ఉండగా.. బాబు అలీ అనే ముస్లిం వ్యక్తి కొంత భూమిని ఇవ్వడంతో అడ్డంకి తొలగిపోయింది. తనకున్న కొంత భూమిని బాబు అలీ బైనామా చేశారని, అందులో కొనుగోలుదారుగా సంతకం చేయడంతో ఆ స్థలంలోకి హనుమాన్ ఆలయాన్ని తరలిస్తున్నట్టు డిప్యూటీ కలెక్టర్ కృష్ణ తెలిపారు. గంగా-జమునీ తహజీబ్‌ను పాటిస్తూ హిందూ-ముస్లింల ఐక్యతకు బాబు అలీ ఆదర్శంగా నిలిచారని ఆయన కొనియాడారు.