డోనాల్డ్ ట్రంప్ కు ఆ ఎన్నికల్లో ఒకే ఓటు వచ్చిందటా

దేశానికే అధినేతగా ఎంపికైన అమెరికా మాజీ అధ్యక్షుడు డొనాల్డ్ ట్రంప్ కు ఓ ఎన్నికల్లో మాత్రం ఒకే ఒక ఓటు సాధించారు.  ఇదిలావుంటే తనదైన వింత చేష్టలు, మాటలతో ఆయన అందరికీ గుర్తుండిపోతారు. తాజాగా ఓ వింత పరాభవంతో వార్తల్లోకి ఎక్కారు. అగ్రరాజ్యానికి అధ్యక్షుడిగా పనిచేసిన నేపథ్యంలో ఉన్న డొనాల్డ్ ట్రంప్.. అమెరికా ప్రతినిధుల సభలో స్పీకర్ పదవికి పోటీ చేసి ఓడిపోయారు. ఏదో ఒక్క ఓటో, రెండు ఓట్లతోనో ఓడిపోయుంటే ఇది పెద్ద వార్త అయుండేది కాదు. కానీ, ఈ ఎన్నికల్లో ఆయనకు వచ్చింది ఓ కే ఒక్క ఓటు. ఆ ఒక్క ఓటు కూడా ఆయణ్ని నామినేట్ చేసిన నేతదే కావడం గమనార్హం. అమెరికా ప్రతినిధుల సభలో ట్రంప్‌కు వచ్చిన ఓట్లను ప్రకటించగానే.. సభ అంతా నవ్వులతో గొల్లుమంది. ఇందుకు సంబంధించిన వీడియో వైరల్ అవుతోంది.

12 సార్లు ఓటింగ్.. ఎటూ తేలని ఎన్నిక

అమెరికా ప్రతినిధుల సభ స్పీకర్‌ ఎన్నిక ఎటూ తేలడం లేదు. మధ్యంతర ఎన్నికల తర్వాత అమెరికా కాంగ్రెస్‌ దిగువ సభలో ప్రతిపక్ష రిపబ్లికన్‌ పార్టీకి స్వల్ప మెజారిటీ లభించింది. అయితే, తమ నాయకుడిని సభాపతిగా ఎన్నుకునేందుకు ఆ పార్టీ నేతలు 3 రోజులుగా తంటాలు పడుతున్నారు. ఈ క్రమంలోనే మాజీ అధ్యక్షుడు, రిపబ్లికన్‌ నేత డొనాల్డ్‌ ట్రంప్‌ పేరు రేసులోకి వచ్చింది. ట్రంప్ పేరును ఆ పార్టీకి చెందిన ఓ నేత నామినేట్‌ చేయగా.. ఆయనకు ఒకే ఒక్క ఓటు వచ్చింది.

స్పీకర్‌ పదవికి జరుగుతున్న ఎన్నికల్లో కెవిన్‌ మెకార్థీ పోటీకి దిగారు. 430 మంది సభ్యులున్న ప్రతినిధుల సభలో స్పీకర్‌గా ఎన్నిక కావాలంటే 218 ఓట్లు రావాలి. వాస్తవానికి సభలో రిపబ్లికన్‌ పార్టీకి స్వల్ప మెజార్టీ ఉండటంతో కెవిన్‌ మెకార్థీ సునాయాసంగానే గెలవాల్సింది. అయితే, సుమారు 20 మంది రిపబ్లికన్లు ఆయన అభ్యర్థిత్వాన్ని సమర్థించడంలేదు. దీంతో మూడు రోజులుగా ఓటింగ్‌ మీద ఓటింగ్‌ జరుపుతున్నారు. ఇప్పటివరకు 12 సార్లు ఓటింగ్‌ నిర్వహించినా.. మెకార్థీ గెలవలేకపోయారు.

11వ రౌండ్‌ ఓటింగ్‌కు ముందు ఆసక్తికర ఘటన చోటు చేసుకుంది. మెకార్థీ అభ్యర్థిత్వాన్ని వ్యతిరేకిస్తున్న బృందానికి చెందిన నేత మాట్ గేట్జ్.. స్పీకర్‌ పదవికి ట్రంప్ పేరును నామినేట్‌ చేశారు. ఓటింగ్‌ నిర్వహించగా ట్రంప్‌‌కు అనుకూలంగా ఒకే ఒక్క ఓటు వచ్చింది. అది కూడా మాట్‌ గేట్జ్‌ వేసిందే. 11వ రౌండ్‌ ఎన్నిక ఫలితాన్ని హౌస్‌ క్లర్క్‌ వెల్లడిస్తూ.. ట్రంప్‌‌కు ఒకే ఒక్క ఓటు పోలైందని చెప్పగానే సభలోని సభ్యులందరూ పగలబడి నవ్వారు. ఈ ఘటనకు సంబంధించిన వీడియోను ఓ జర్నలిస్టు ట్వీట్ చేశారు. దీంతో ఇది వైరల్‌ అవుతోంది..