అందుకోసం ప్రతిసారి బ్యాంకుకు వెళ్లాల్సిన పనిలేదు

కేవైసీకి సంబంధించి రిజర్వ్ బ్యాంక్ ఆఫ్ ఇండియా కేవైసీ ఇటీవల కీలక ప్రకటన చేసింది. కేవైసీ పీరియాడిక్ అప్‌డేషన్ గురించి పూర్తి మార్గదర్శకాలను విడుదల చేసింది. అయితే.. కేవైసీ డాక్యుమెంట్లను మళ్లీ సమర్పించేందుకు కస్టమర్లు కచ్చితంగా బ్యాంకులకు వెళ్లాల్సిందేనా? దీనిని ఆర్‌బీఐ ఏం చెప్పింది తెలుసుకుందాం. కేవైసీ డాక్యుమెంట్లను క్రమం తప్పకుండా అప్‌డేట్ చేసుకోవాలి. ఇది అత్యంత ముఖ్యం. అయితే కేవైసీ అప్‌డేషన్ లేదా re- KYC కోసం కేంద్ర బ్యాంకు.. ఈ ప్రక్రియను మరింత సులభతరం చేసింది. మీ కేవైసీ ఇన్ఫర్మేషన్‌ అదే వ్యక్తిగత సమాచారం, కాంటాక్ట్, ఇతర డాక్యుమెంట్లలో ఏ మార్పు లేకుంటే.. సెల్ఫ్ డిక్లరేషన్ ద్వారా కస్టమర్లు రీ- కేవైసీ ప్రక్రియ పూర్తి చేసుకోవచ్చు.

ఈ సెల్ఫ్ డిక్లరేషన్ కోసం బ్యాంకులు కచ్చితంగా కస్టమర్లను తమ శాఖలను సంప్రదించాలని కోరాల్సిన అవసరం లేదని తేల్చిచెప్పింది రిజర్వ్ బ్యాంక్ ఆఫ్ ఇండియా. రిజిస్టర్డ్ మొబైల్ నంబర్, రిజిస్టర్డ్ ఈ- మెయిల్, ఏటీఎం లు, ఆన్‌లైన్ బ్యాంకింగ్ లేదా ఇంటర్నెట్ బ్యాంకింగ్, మొబైల్ అప్లికేషన్ వంటి డిజిటల్ ఛానెల్స్ లేదా లెటర్స్ ద్వారా ఈ ప్రక్రియ కోసం వెసులుబాటు కల్పించేలా చూడాలని బ్యాంకులకు సూచించింది. సెల్ఫ్ డిక్లరేషన్ కోసం కస్టమర్లు బ్యాంకులకు వెళ్లాల్సిన పనిలేదని స్పష్టం చేసింది.

ఒకవేళ అడ్రస్ ఛేంజ్ మాత్రమే ఉన్నట్లయితే కస్టమర్లు తమ కేవైసీ అప్‌డేట్ చేయాల్సి ఉంటుంది. దీని కోసం కూడా పైన పేర్కొన్న విధంగా ఇంటర్నెట్ బ్యాంకింగ్, ఇతర ఫెసిలిటీల ద్వారా పూర్తి చేసుకోవచ్చు. కస్టమర్లు అడ్రస్ ప్రూఫ్స్ అప్‌డేట్ చేసిన 2 నెలల్లోగా బ్యాంకులు.. ఆ ధ్రువీకరణ ప్రక్రియను పూర్తి చేయాల్సి ఉంటుంది.

ప్రస్తుత పాస్‌పోర్ట్, డ్రైవింగ్ లైసెన్స్, ఆధార్ నంబర్, ఓటర్ ఐడీ నంబర్, జాబ్ కార్డు వంటివాటికి తమ బ్యాంకు రికార్డుల్లో ఉన్న డాక్యుమెంట్లు సరిపోలని పరిస్థితుల్లో మాత్రమే .. ఆయా బ్యాంకులు కస్టమర్లను మళ్లీ కేవైసీ డాక్యుమెంట్లను సబ్మిట్ చేయాలని అడగాలని ఆర్బీఐ పేర్కొంది. అలాంటి పరిస్థితుల్లో మాత్రమే రీకేవైసీ చేసుకోవాలన్నమాట. ఇతర సందర్భాల్లో సెల్ఫ్ డిక్లరేషన్ చేస్తే సరిపోతుంది.

ఇంకా అంతకుముందు మీరు సబ్మిట్ చేసిన కేవైసీ డాక్యుమెంట్ల గడువు ముగిసినట్లయితే.. అప్పుడు కూడా తాజాగా కేవైసీ డీటెయిల్స్ బ్యాంకులకు సమర్పించాల్సి ఉంటుంది. మళ్లీ కేవైసీ సమర్పించడం లేదా కొత్తగా కేవైసీ డీటెయిల్స్ వంటివి సబ్మిట్ చేయాల్సిన సందర్భాల్లో కస్టమర్లు నేరుగా బ్యాంకులకు వెళ్లొచ్చని, అదే సమయంలో వీడియో బేస్డ్ కస్టమర్ ఐడెంటిఫికేషన్ ప్రాసెస్ (V-CIP) కూడా అందుబాటులో ఉంటుందని స్పష్టం చేసింది.