కేరలో నోరో వైరస్...ప్రజల్లో అలజడి మొదలు

మొన్నటి వరకు కరోనా కేసులతో అతలాకుతలమైన కేరళ రాష్ట్రం తాజాగా కొత్త వైరస్ ను ఎదుర్కోక తప్పడంలేదు. కేరళ రాష్ట్రంలోని ఓ ప్రైవేట్ స్కూల్లో చదువుతున్న ఇద్దరు చిన్నారులకు నోరో వైరస్ పాజిటివ్‌గా తేలింది. పాఠశాలలో మొత్తం 62 విద్యార్థులు, కొంత మంది తల్లిదండ్రులు ఈ వైరస్ లక్షణాలతో బాధపడుతున్నారు. అందరినీ వైద్యుల పర్యవేక్షణలో ఉంచి, తగిన చర్యలు తీసుకుంటున్నామని అధికారులు వెల్లడించారు. వైరస్‌ వ్యాపించకుండా పాఠశాలను 3 రోజుల పాటు మూసివేశారు. మరుగుదొడ్లు సహా పాఠశాల పరిసరాలన్నింటినీ శాటిటైజ్ చేయించినట్లు అధికారులు తెలిపారు. నోరో వైరస్‌నే ‘స్టమక్‌ ఫ్లూ’, ‘స్టమక్‌ బగ్‌’ అని కూడా అంటారు.

పాఠశాలలో పలువురు విద్యార్థులు వాంతులు, డయేరియా లాంటి లక్షణాలతో బాధ పడుతుండటంతో వారి నమూనాలను సేకరించి ల్యాబ్‌కు పంపించారు. వారిలో ఇద్దరికి పాజిటివ్‌గా తేలింది. వ్యాధి సోకిన విద్యార్థులను ఆస్పత్రిలో చేర్పించి చికిత్స అందిస్తున్నామని అధికారులు తెలిపారు. పాజిటివ్‌గా నిర్ధారణ అయిన ఇద్దరు విద్యార్థుల పరిస్థితి నిలకడగా ఉందని, ఆందోళన చెందాల్సిన అవసరం లేదని వైద్యలు తెలిపారు. అనుమానితులందరూ పరీక్షలు నిర్వహించుకోవాలని సూచించారు.

‘పిల్లల ఆరోగ్య పరిస్థితి నిలకడగా ఉంది. ప్రస్తుతం తాత్కాలికంగా మూసివేసిన పాఠశాలను వైద్యారోగ్య శాఖ సిబ్బంది తనిఖీ చేశారు. పిల్లలకు, తల్లిదండ్రులకు ఆన్‌లైన్‌లో అవగాహన సదస్సులు నిర్వహిస్తున్నాం. తరగతి గదులు, మరుగుదొడ్లను శానిటైజ్ చేశాం’ జిల్లా వైద్యాధికారి ఒక ప్రకటనలో తెలిపారు. కలుషిత నీరు, ఆహారం ద్వారా వ్యాప్తి చెందే నోరో వైరస్.. తీవ్రమైన అంటు వ్యాధి అని అధికారులు తెలిపారు. ప్రాథమిక దశలో గుర్తించి చికిత్స అందించకపోతే ప్రాణాంతకంగానూ మారుతుందని వివరించారు.

వ్యాధి లక్షణాలు:

✦ వాంతులు

✦ విరోచనాలు

✦ తలనొప్పి

✦ ఒళ్లు నొప్పులు

ఈ వ్యాధి వ్యాప్తి చెందకుండా ముందస్తు చర్యలు తీసుకున్నట్లు కేరళ ఆరోగ్య శాఖ తెలిపింది. ప్రజలు పరిశుభ్రత పాటించాలని విజ్ఞప్తి చేసింది. డబ్ల్యూహెచ్ఓ ప్రకారం.. నోరో వైరస్ అనేది ఒక వైరల్ వ్యాధి. ఇది ప్రపంచవ్యాప్తంగా తీవ్రమైన గ్యాస్ట్రోఎంటెరిటిస్‌కు అత్యంత సాధారణ కారణం. ఈ వైరస్ బారిన పడినవారు తీవ్రమైన విరేచనాలు, వాంతులు లాంటి లక్షణాలతో బాధపడతారు. గత ఏడాది తిరువనంతపురంలోని విజింజంలో నోరో వైరస్‌కు సంబంధించిన రెండు కేసులు నమోదయ్యాయి. భారత్‌లో తొలిసారిగా కేరళలోనే ఈ వైరస్ బయటపడింది.