పేగుబంధాన్ని తెంచుకున్న కసాయి తల్లి
Andhra Pradesh Telugu | Suryaa Desk | Published : Mon, Feb 27, 2023, 01:24 PM
గుంటూరు నగరంలో దారుణం చోటుచేసుకుంది. నవమాసాలు మోసి జన్మనిచ్చిన బిడ్డ పేగు కూడా తెగకుండానే తల్లి పేగుబంధాన్ని తెంచుకుంది. అప్పుడే పుట్టిన శిశువును అనాధను చేసింది. నగరంలోని కొత్తపేట పోలీస్ స్టేషన్ పరిధిలో గల గుంటూరు వారితోట 5వ లైన్లో ఆదివారం ఈ అమానుష ఘటన చోటుచేసుకుంది. ఆదివారం ఉదయం 9 గంటల సమయంలో తులసి హాస్పిటల్ పక్క లైనులోని ఒక పాడుపడిన ఇంటిలో అప్పుడే పుట్టిన ఒక మగ పసికందును గుర్తు తెలియని వ్యక్తులు ప్లాస్టిక్ కవర్లో పెట్టి అక్కడ వదిలి వెళ్ళారు. ఆ శిశువు ప్రాణాలతో ఉండగా గోపి అనే ఒక వ్యక్తి గుర్తించి వెంటనే డయల్ 100కు సమాచారం అందించాడు. ఇంతలో స్థానిక యువతి పసికందును కవర్ నుంచి బయటకు తీసి ప్రాణాలు కాపాడారు. సమాచారం అందుకున్న కొత్తపేట పోలీసులు వైద్యం నిమిత్తం పసికందును జీజీహెచ్లో చేర్పించారు. శిశువు ఆరోగ్య పరిస్థితి నిలకడగా ఉందని వైద్యులు తెలిపారు. గోపి ఫిర్యాదు మేరకు కొత్తపేట పోలీస్ స్టేషన్ సీఐ శ్రీనివాసుల రెడ్డి ఆదేశాల మేరకు ఎస్ఐ మేరాజ్ కేసు నమోదు చేసి దర్యాప్తు చేస్తున్నారు. పసికందు వివరాలు తెలిసిన వారు 8688831609 నంబరును సంప్రదిం చాలని పోలీసులు కోరారు.
|
|