త్రిపురలో రెండోసారి అధికారం కోసం బీజేపీ,,,నాగాలాండ్‌, మేఘాలయలో అధికార పార్టీకి మొగ్గు

శాన్య రాష్ట్రాల్లోని త్రిపుర, మేఘాలయ, నాగాలాండ్ అసెంబ్లీ ఎన్నికల ప్రక్రియ తుది అంకానికి చేరింది. సోమవారం పోలింగ్ ముగియడంతో పలు సంస్థలు ఎగ్జిట్ పోల్స్ అంచనాలను వెలువరించింది. అత్యంత ఆసక్తి రేకెత్తించిన మేఘాలయలో ఏ పార్టీకీ స్పష్టమైన ఆధిక్యం దక్కదని, అక్కడ సీఎం కాన్రాడ్‌ సంగ్మా నేతృత్వంలోని నేషనల్‌ పీపుల్స్‌ పార్టీ (ఎన్‌పీపీ) ఏకైక అతిపెద్ద పార్టీగా నిలిచే అవకాశాలున్నాయని అంచనా వేశాయి. ప్రభుత్వ ఏర్పాటుకు అవసరమైన మెజార్టీ మాత్రం ఎన్‌పీపీ దక్కించుకోలేదని పేర్కొన్నాయి.

నాగాలాండ్‌లో అధికార నేషనలిస్ట్‌ డెమోక్రటిక్‌ ప్రోగ్రెసివ్‌ పార్టీ (ఎన్‌డీపీపీ), బీజేపీ కూటమి ఘన విజయం సాధించి అధికారాన్ని నిలబెట్టుకుంటుందని ఎగ్జిట్‌ పోల్స్‌ పేర్కొన్నాయి. ఇక, త్రిపురలో బీజేపీవైపే మొగ్గు కనిపిస్తున్నా.. కొత్త పార్టీ టిప్రా మోథా కింగ్‌ నిర్ణయాత్మక శక్తిగా అవతరించే అవకాశాలు ఉన్నట్టు అంచనా వేశాయి. ఈ మూడు రాష్ట్రాల ఎన్నికల ఓట్ల లెక్కింపు మార్చి 2 చేపట్లి ఫలితాలు వెల్లడించనున్నారు.

ఫిబ్రవరి 16న త్రిపురలో పోలింగ్ ముగియగా.. మేఘాలయ, నాగాలాండ్‌లలో అసెంబ్లీ ఎన్నికలు సోమవారం ముగిశాయి. స్వల్ప ఉద్రిక్తత మినహా ఎక్కడా హింసాత్మక ఘటనలు చోటుచేసుకోలేదు. రెండు రాష్ట్రాల్లోనూ ఓటర్లలో చైతన్యం వెల్లివెరిసింది. ఉదయం నుంచే పోలింగ్‌ కేంద్రాల వద్ద జనం బారులు తీరారు. కొన్నిచోట్ల ఈవీఎంలు మొరాయించినా, అధికారులు వెంటనే పరిస్థితులను చక్కదిద్దారు. నాగాలాండ్‌లో 83.63%, మేఘాలయలో 75% పైగా పోలింగ్‌ నమోదైంది. నాగాలాండ్‌, మేఘాలయల్లో చెరో 60 అసెంబ్లీ స్థానాలు ఉండగా.. 59 చోట్లే పోలింగ్ జరిగింది.

నాగాలాండ్‌లో అకులుటో స్థానం ఎన్నిక ఏకగ్రీవం కావడం, మేఘాలయలో సోహియాంగ్‌ స్థానం నుంచి పోటీలో ఉన్న ఓ అభ్యర్థి మరణం కారణంగా వాయిదా పడింది. దీంతో రెండు రాష్ట్రాల్లోనూ ప్రస్తుతం 59 స్థానాలకు ఎన్నికలు జరిగాయి. వీటితో పాటు తమిళనాడులోని ఈరోడ్‌ తూర్పు, పశ్చిమ బెంగాల్‌లోని సాగర్‌దీఘీ, ఝార్ఖండ్‌లోని రామ్‌గఢ్‌ అసెంబ్లీ స్థానాలకు సైతం సోమవారం ఉప ఎన్నికలు జరిగాయి.

ఇక, ఈరోడ్‌ తూర్పులో ఈవీఎంల్లో సాంకేతిక సమస్యలు తలెత్తడంతో రెండు పోలింగ్‌ బూత్‌లలో అధికారులు ఓటింగ్‌ను నిలిపివేయాల్సి వచ్చింది. అయితే, మొత్తం 75 శాతానికిపైగా పోలింగ్ నమోదయ్యింది. ఈ స్థానం నుంచి బరిలో 78 మంది పోటీ చేయడం వల్ల ఒకటి కంటే ఎక్కువ ఈవీఎంల అవసరం పెరిగింది. సుమారు 20 వాహనాల్లో జీపీఎస్‌ సాంకేతికతను వినియోగించి వాటిని ఆయా పోలింగ్‌ కేంద్రాలకు తరలించారు.