ఉన్నదాంట్లో కాస్త చేపలకు పంచి... ఉదారత చాటుకొన్న బాతు

ఉదారభావం కేవలం మనషుల్లోనూ కాదు తమలోనూ ఉంటుందని నిరూపించింది ఓ బాతు. మనకు ఉన్నదాంట్లో కొంత ఇతరులకు పెట్టడంలో పొందే ఆనందం ఈ ప్రపంచంలో మరొకటి ఉండదు. అయితే, ఈ ఆనందం మానవులకు మాత్రమే సొంతమా? అంటే.. ఈ వీడియోను చూశాక కాదనే చెప్పాలి. ఒక బాతు తన ఆహారం పళ్లెంలో నుంచి చేపలకు ఆహారం అందిస్తోంది. ముక్కుతో గింజలను కరచుకొని నీటిలోని చేపల నోటికి అందిస్తోంది. ఓ తల్లి తన చిన్నారికి గోరుముద్దలు తినిపించినట్లుగా, చూసేందుకు ఆ సన్నివేశం ‘చాలా క్యూట్‌’గా ఉంది. బాతు అందిస్తున్న ఆ ఆహారాన్ని అందుకునేందుకు అక్కడికి పెద్ద సంఖ్యలో చేపలు చేరుకోవడం వీడియోలో కనిపిస్తోంది.

ఈ పాత వీడియో ఇప్పుడు మళ్లీ వైరల్ అవుతోంది. ఎరిక్ సోల్హీమ్ అనే ట్విట్టర్‌ ఖాతాదారుడు పోస్ట్ చేసిన 32 సెకన్ల నిడివి గల క్లిప్ అందరి హృదయాలను గెలుచుకుంది. ఈ వీడియోలో.. నీటిపై తేలియాడుతూ ధాన్యంతో నిండిన ఓ డబ్బా కనిపిస్తోంది. దాని మీద నిల్చొని ఉన్న ఓ బాతు కనిపిస్తుంది. ఆ డబ్బాలోని గింజలను తన ముక్కుతో తీసుకొని నీటిలో ముంచుతుంది. చేపలు ఆ ఆహారాన్ని అందుకొని తింటాయి. చూస్తుండగానే అక్కడ పెద్ద చేపల గుంపు కనిపిస్తుంది.

‘ప్రేమ ఉంటే, ఈ ప్రపంచంలో మీరు ఏదైనా చేయగలరు’ అనే క్యాప్షన్ ఇస్తూ ఈ వీడియోను షేర్ చేశారు. ఈ వీడియోను ట్విటర్‌లో ఇప్పటికే 2.3 మిలియన్ల మంది వీక్షించారు. ఇప్పటివరకు 2,500 లైక్‌లు, 400 రీట్వీట్‌లు వచ్చాయి. చాలా మంది యూజర్లు బాతు గొప్ప మనసును కీర్తిస్తూ కామెంట్లు పెట్టారు. అయితే, కొంత మంది అసలు వాస్తవం ఇదంటూ మరో రకమైన వాదన వినిపించారు.

‘బాతులు తమ ఆహారాన్ని తినడానికి, ముందు దాన్ని నీటిలో ముంచుతాయి. ఈ వీడియోలోని బాతు అలా చేస్తున్నప్పుడు చేపలు దాని ఆహారాన్ని దొంగిలించడానికి ప్రయత్నిస్తున్నాయి’ అని ఒక యూజర్ రాశారు. ‘పొడి ధాన్యాన్ని తినడానికి/మింగడానికి బాతుకు నీరు అవసరం. అది తన ఆహారానికి నీటిని జోడించేందుకు ప్రయత్నిస్తున్నప్పుడు చాలా ధాన్యాన్ని కోల్పోతుంది. చేపలకు ఆహారం ఇవ్వడం దాని లక్ష్యం కాదు’ అంటూ మరో యూజర్ రాసుకొచ్చారు.

అయితే, ఆ వీడియోను చూస్తుంటే మాత్రం, బాతు ప్రేమతోనే అలా చేస్తున్నట్లు కనిపిస్తోందని మరికొంత మంది వాదిస్తున్నారు. ‘ప్రకృతి చాలా గొప్పది, నమ్మశక్యంకానిది. ఈ వీడియో నాకు చాలా ఆనందం కలిగించింది’ అని మరో యూజర్ కామెంట్ పెట్టారు. ‘సో బ్యూటీఫుల్. ఈ సహజమైన ప్రేమ, భావోద్వేగాలను వ్యక్తపరిచేందుకు ఏ పదాలూ సరిపోవు’ అని మరో యూజర్ రాశారు.

‘మానవుడు ఉత్తమ జాతిగా ఎలా ఎదిగాడు? ఈ ప్రపంచంలో ఇతర ప్రాణుల నుంచి మనం చాలా నేర్చుకోవాలి’ అని మరో యూజర్ రాశాడు. అది నిజమే కదూ..! ఆ బాతు కావాలని చేయకపోయినా, తన స్వార్థం కోసమే చేసినా.. తన వల్ల చేపలు కడుపు నింపుకుంటున్నాయంటే, అది మంచి విషయమే కదా!?