కాలేజీలో చదివే బాలికలకు పీరియడ్స్ సెలవులు,,,కేరళ వర్సిటీ ప్రకటన

కేరళ యూనివర్సిటీ తన విద్యార్థినులకు ఆరు నెలల ప్రసూతి సెలవు ప్రకటించింది. దీంతో యూనివర్సిటీలో చదువుతున్న 18 ఏళ్లు పైబడిన బాలికలు ఆరు నెలల పాటు ప్రసూతి సెలవు తీసుకోవచ్చు. ఈ మేరకు కేరళ యూనివర్సిటీ సోమవారం ఉత్తర్వులు జారీ చేసింది. రాష్ట్రంలోని ఉన్నత విద్యాసంస్థలు ఇప్పటికే పీరియడ్స్ లీవ్ పరంగా బాలికల హాజరును 75 నుంచి 73 శాతానికి కుదించాయి. యూనివర్శిటీ యాజమాన్యం నిర్ణయం ప్రకారం.. ప్రసూతి సెలవుపై వెళ్లే ఏ విద్యార్థి అయినా 6 నెలల తర్వాత మళ్లీ అడ్మిషన్ పొందకుండానే చదువును కొనసాగించవచ్చు.

ప్రసూతి సెలవులు తీసుకున్న విద్యార్థినిలకు కోర్సు కాలవ్యవధి కూడా పెరుగుతుంది. తద్వారా వారి చదువుకు ఆటంకం ఉండదు. వర్శిటీ అనుమతితో సంబంధం లేకుండానే అభ్యర్థుల మెడికల్ రికార్డులను సరిచూసుకుని తిరిగి కాలేజీలో చేరేందుకు అనుమతివ్వాల్సిన బాధ్యత కళాశాల ప్రిన్సిపాల్‌దేనని యూనివర్సిటీ యాజమాన్యం తెలిపింది. కాగా, ప్రభుత్వ ఆధ్వర్యంలో నడిచే యూనివర్సిటీల్లో చదువుతోన్న 18 ఏళ్లు దాటిన విద్యార్ధినిలకు 60 రోజుల ప్రసూతి సెలవులను మంజూరుచేస్తూ ఇటీవల కేరళ ఉన్నత విద్యామండలి ఉత్తర్వులు జారీచేసిన విషయం తెలిసిందే.

విద్యార్థులకు పీరియడ్స్ సెలవులు ఇవ్వాలని కూడా స్పష్టం చేసింది. యూనివర్శిటీ నిబంధనల ప్రకారం ఇప్పటివరకు 75 శాతం హాజరు తప్పనిసరి అయితే బాలిక విద్యార్థులు ఇప్పుడు 73 శాతం హాజరుతో తమ సెమిస్టర్ పరీక్షలకు హాజరుకావచ్చు. ఉన్నత విద్యా రంగంలో అపూర్వమైన లింగ-సున్నితమైన సంస్కరణను ప్రకటించిన మొదటి విశ్వవిద్యాలయం కొచ్చిన్ యూనివర్శిటీ ఆఫ్ సైన్స్ అండ్ టెక్నాలజీ. మొదటిసారిగా విద్యార్థినిలకు పీరియడ్స్ సెలవులు ప్రారంభించి సంస్కరణకు తెరలేపింది.

ప్రస్తుతం భారత్‌లో పనిచేసే మహిళలకు పీరియడ్స్‌ సెలవులు ఇవ్వాలని సీయూఎస్ఏటీ విద్యార్థి సంఘం డిమాండ్‌ చేస్తోంది. అయితే గతంలో దీనికి సంబంధించిన పిటిషన్‌ను సుప్రీంకోర్టు కొట్టివేసింది. ఇది విధానపరమైన సమస్య అని, ఇందుకోసం మహిళా శిశు అభివృద్ధి మంత్రిత్వ శాఖకు మెమోరాండం సమర్పించాలని కోర్టు పేర్కొంది.

ఇదిలావుంటే కేరళ ఉన్నత విద్యామండలి ఉత్తర్వులను అన్ని విద్యాసంస్థలు అమలు చేస్తే కాలేజీ విద్యార్ధినిలకు ప్రసూతి, పీరియడ్స్ సెలవులను అందించే మొదటి రాష్ట్రంగా కేరళ నిలుస్తుంది. కేరళ సిఎం పినరయి విజయన్ మాట్లాడుతూ... రాష్ట్ర ప్రభుత్వ ఉన్నత విద్యా శాఖ పరిధిలోని అన్ని సంస్థల్లోని విద్యార్థినిలు అందరికీ ప్రసూతి, పీరియడ్స్ సెలవులను అందించడంలో దేశంలోనే తమ రాష్ట్రం మొదటి స్థానంలో నిలుస్తుందని చెప్పారు. ఈ చర్య సమాజంలో లింగ న్యాయాన్ని నిర్ధారించడానికి, మహిళా అనుకూల వైఖరిని పెద్ద స్థాయిలో చూపడానికి తన ప్రభుత్వ నిబద్ధతను సూచిస్తుందని అన్నారు.