రాష్ట్రంవద్ద అన్ని నిధులు లేవు... ప్రతిపక్షాల డిమాండ్ పై మండిపడ్డ మమతా బెనర్జీ

డెయిర్‌నెస్ అలవెన్సులు (డీఏ) ఎక్కువ చెల్లించాలంటూ ప్రతిపక్షాల డిమాండ్ పై చేస్తున్న డిమాండ్‌పై మమతా బెనర్జీ తీవ్ర ఆగ్రహం వ్యక్తం చేశారు. ఉద్యోగులకు ఎక్కువ చెల్లించడానికి ప్రభుత్వం వద్ద నిధులు లేవని మమతా బెనర్జీ సోమవారం స్పష్టం చేశారు. రాష్ట్ర ప్రభుత్వ ఉద్యోగులకు కేంద్ర ప్రభుత్వ ఉద్యోగులతో సమానంగా డీఏను చెల్లించాలని ప్రతిపక్ష బీజేపీ, కాంగ్రెస్, వామపక్షాలు డిమాండ్ చేస్తున్నాయి. ఈ అంశంపై అసెంబ్లీ వేదికగా మమతా బెనర్జీ మాట్లాడుతూ.. వాళ్లు ఇంకా ఎక్కువ అడుగుతూనే ఉంటారు. ఇంకా ఎంత ఇస్తాను? అని వ్యాఖ్యానించారు.

‘‘మా ప్రభుత్వం ఇంతకంటే ఎక్కువ డీఏను చెల్లించడం సాధ్యం కాదు.. ఎందుకంటే ఖజానాలో నిధులు లేవు.. అదనంగా 3 శాతం డీఏ ఇచ్చాం.. మీరు సంతోషంగా లేకుంటే నా తల నరికేయండి.. ఇంకా ఎంత కావాలి’’ అని దీదీ ప్రశ్నించారు. ఫిబ్రవరి 15న బెంగాల్ అసెంబ్లీలో వార్షిక బడ్జెట్‌ను ప్రవేశపెట్టిన ఆ రాష్ట్ర ఆర్ధిక మంత్రి చంద్రిమా భట్టాచార్య.. ఉపాధ్యాయులు, పెన్షనర్ల సహా ప్రభుత్వ ఉద్యోగులకు మార్చి నుంచి 3 శాతం డీఏను అదనంగా చెల్లించనున్నట్టు ప్రకటించారు. అప్పటి నుంచి ఉద్యోగులకు మూల వేతనంలో 3 శాతం డీఏను అదనంగా చెల్లిస్తున్నారు.

తమకు కేంద్ర ప్రభుత్వ ఉద్యోగులతో సమానంగా డీఏను చెల్లించాలని బెంగాల్ ఉద్యోగులు చేస్తున్న డిమాండ్‌కు ప్రతిపక్షాలు మద్దతిస్తున్నాయి. దీంతో ప్రతిపక్ష బీజేపీ, వామపక్షాలపై దీదీ మండిపడ్డారు. ‘‘కేంద్ర ప్రభుత్వం, రాష్ట్ర ప్రభుత్వం పే స్కేల్ తేడా ఉంది.. నేడు బీజేపీ, కాంగ్రెస్‌, సీపీఎం ఒక్కటయ్యాయి. వేతనంతో పాటు ఇన్ని సెలవులు ఇచ్చే ప్రభుత్వం ఏది?’’ అని బెంగాల్ సీఎం నిలదీశారు.

‘‘ప్రభుత్వ ఉద్యోగులకు డీఏ కింద రూ.1.79 లక్షల కోట్లు నేను చెల్లిస్తున్నాను.. వేతనంతో కూడిన 40 సెలవులు ఇస్తున్నాం.. మరి కేంద్ర ప్రభుత్వంతో ఎందుకు సరిపోల్చుతారు.. ఉచితంగా బియ్యం ఇస్తాం కానీ వంట గ్యాస్ ధర చూడండి? ఎన్నికల తర్వాత ఒక్కరోజులోనే ధరలు పెంచారు.. ఇంతమంది సంతృప్తి చెందాలంటే ఇంకేం కావాలి?’’ అని ప్రతిపక్షాలపై దీదీ విరుచుకుపడ్డారు.