వివేకాహత్య కేసులో వైఎస్ అవినాష్ రెడ్డి సంచలన వ్యాఖ్యలు
Andhra Pradesh Telugu | Suryaa Desk | Published : Fri, Mar 10, 2023, 07:58 PM
వివేకాహత్య కేసులో వైఎస్ అవినాష్ రెడ్డి సంచలన వ్యాఖ్యలు చేశారు. ఈ కేసు గురించి ఇంత కాలం మౌనంగా ఉన్నానని, ఇక మౌనంగా ఉండబోనని అవినాష్ రెడ్డి స్పష్టం చేశారు. వైసీపీ క్యాడర్ తనను ప్రశ్నిస్తోందని, ఇక నుంచి మాట్లాడటం మొదలు పెడతానన్నారు. వివేకా ది మర్డర్ ఫర్ గైన్ కేసు అని చెప్పారు. వైఎస్ వివేకానంద రెడ్డి ఒక ముస్లిం మహిళను పెళ్లి చేసుకున్నారని, ఆమెకు పుట్టిన కుమారుడిని రాజకీయ వారసుడిగా ప్రకటించాలని నిర్ణయం తీసుకున్నారని అవినాష్ రెడ్డి చెప్పారు. వైఎస్ వివేకానంద రెడ్డి పేరును కూడా ముస్లిం పేరుగా మార్చుకున్నాడని చెప్పారు. ఆస్తులన్నీ వాళ్ళకి వెళ్లిపోతాయని, రాజకీయ వారసులుగా వస్తారని భావించిన వైఎస్ వివేకానంద రెడ్డి కుమార్తె సునీతమ్మ భర్త రాజశేఖర్ రెడ్డి కుట్ర చేశాడని తన అనుమానమన్నారు. హత్య జరిగిన ప్రాంతంలో లెటర్ను మాయం చేశారని అవినాష్ రెడ్డి ఆరోపించారు. తాను గుండెపోటు అని చెప్పలేదని, ఇదంతా టీడీపీ వాళ్ళు చిత్రీకరించారని అవినాష్ రెడ్డి ఆరోపించారు. హత్యలో ఆస్తి తగాదాలు ఉన్నాయని, తన సోదరి సునీతమ్మ హైకోర్టులో సుప్రీంకోర్టులో అనేక ఆరోపణలు చేసిందన్నారు. ఏ ఒక్కరోజూ తాను ఎవరి గురించీ మాట్లాడలేదన్నారు. తాను కోర్టులో లంచ్ మోషన్ పిటిషన్ దాఖలు చేయగానే సీబీఐ అధికారులు సునీతమ్మకు సమాచారం ఇచ్చి ఇంప్లీడ్ చేస్తున్నారని అవినాష్ రెడ్డి చెప్పారు.
|
|