భార్య...అత్త..మామపై అల్లుడి దాడి... భార్య అమె త్లల్లి మృతి

పెళ్లయిన రెండు వారాలకే అల్లుడు ఘాతుకానికి పాల్పడ్డాడు. కట్టుకున్న భార్యను, పిల్లనిచ్చిన అత్తమామలపై పాశవికంగా కత్తితో దాడికి పాల్పడ్డాడు. ఈ ఘటనలో భార్య, అత్త అక్కడికక్కడే మృతి చెందగా.. మామకు తీవ్ర గాయాలతో ఆస్పత్రిలో చికిత్స పొందుతున్నారు ఈ ధారుణ ఘటన కర్నూలు చోటు చేసుకొంది. 

స్థానికులు తెలిపిన వివరాల ప్రకారం.. కర్నూలులోని చింతల మునినగర్‌లో శ్రావణ్‌ అనే యువకుడు తన కుటుంబంతో కలిసి నివసిస్తున్నాడు. హైదరాబాద్‌లో ఓ ప్రైవేట్‌ బ్యాంకులో శ్రావణ్ ఉద్యోగం చేస్తున్నాడు. ఈ క్రమంలో తెలంగాణలోని వనపర్తికి చెందిన కృష్ణవేణి (23) అనే యువతితో శ్రావణ్‌కు ఈ నెల 1వ తేదీన వివాహం జరిగింది. ఈ నేపథ్యంలోనే శ్రావణ్‌ అత్త రమాదేవి (50), మామ ప్రసాద్‌.. కర్నూలులోని తమ కుమార్తె వద్దకు వచ్చారు. కుటుంబ కలహాల నేపథ్యంలో అత్తమామలతో అల్లుడు శ్రావణ్‌ గొడవ పడ్డాడు.

ఈ క్రమంలో కోపోద్రిక్తుడైన శ్రావణ్.. భార్య, అత్త, మామలపై కత్తితో దాడి చేశాడు. శ్రావణ్‌కు అతడి తండ్రి వెంకటేశ్వర్లు కూడా సహకరించాడు. ఇద్దరూ కలిసి తీవ్రంగా గాయపరచడంతో కృష్ణవేణి, రమాదేవి అక్కడికక్కడే మృతి చెందగా.. ప్రసాద్‌కు తీవ్ర గాయాలయ్యాయి. దీంతో స్థానికులు ఆయన్ను కర్నూలు ప్రభుత్వ ఆస్పత్రికి తరలించారు. ఈ సమాచారం అందుకున్న పోలీసుల సంఘటనా స్థలానికి చేరుకున్నారు. కర్నూలు డీఎస్పీ కేవీ మహేశ్‌, ఇన్‌ఛార్జ్‌ సీఐ శ్రీనివాసులు, ఎస్సైలు రామయ్య, పెద్దయ్యనాయుడు పరిశీలించారు. ఈ ఘటనపై నాలుగో పట్టణ పోలీసులు కేసు నమోదు చేసి దర్యాప్తు చేస్తున్నారు. ఈ హత్యకు గల కారణాలు ఏంటనేది తెలియాల్సి ఉంది.