అర్ధరాత్రి సమయంలో టీటీఈ అనుచిత ప్రవర్తన,,,ప్రయాణికురాలిపై మూత్రం

ప్రయాణికులు తప్పుచేస్తే అధికార్లు దండించాలి. రైల్వే టీసీయే తప్పు చేస్తే... ఫుల్లుగా మందుకొట్టి రైలు ఎక్కిన ఓ టీటీఈ.. మద్యం మత్తులో ప్రయాణికురాలి ముఖంపై మూత్రం పోసిన షాకింగ్ ఘటన అకాల్ తఖ్త్ ఎక్స్‌ప్రెస్ రైలులో ఆదివారం చోటుచేసుకుంది. పంజాబ్‌లోని అమృత్‌సర్, పశ్చిమ్ బెంగాల్ రాజధాని కోలకతా మధ్య నడిచే అకాల్ తఖ్త్ రైలులో ట్రావెల్ టికెట్ ఎగ్జామినర్ (టీటీఈ) మద్యం మత్తులో అనుచితంగా ప్రవర్తించినట్టు రైల్వే పోలీస్ అధికారులు తెలిపారు. అమృత్‌సర్‌కు చెందిన బాధిత మహిళ తన భర్త రాజేశ్ కుమార్‌తో కలిసి బిహార్‌లోని కియూల్ జంక్షన్‌లో రైలు ఎక్కి సెకెండ్ క్లాస్‌ ఏసీలో ప్రయాణిస్తున్నారు. ఆదివారం అర్ధరాత్రి ఈ ఘటన చోటుచేసుకుంది.

బాధిత మహిళ నిద్రపోతుండగా.. మద్యం మత్తులో ఉన్న టీటీఈ ఆమె బెర్త్ దగ్గరకు వెళ్లి ముఖంపై మూత్రం పోశాడు. దీంతో హడలిపోయిన బాధిత మహిళ బిగ్గరగా కేకలు వేయడంతో ఆ కోచ్‌లో ఉన్నవారంతా వచ్చి టీటీఈని పట్టుకున్నారు. నిందితుడు బిహార్‌లోని సహారన్‌పూర్‌కి చెందిన మున్నా కుమార్‌గా గుర్తించారు. అనంతరం అతడ్ని ట్రెయిన్ లక్నోలోని చార్‌బాగ్ స్టేషన్‌కు చేరుకోగానే సోమవారం తెల్లవారుజామున రైల్వే పోలీసులకు అప్పగించారు. ఘటనపై కేసు నమోదుచేసిన పోలీసులు.. నిందిత టీటీఈని జ్యుడీషియల్ కస్టడీకి తరలించారు.

బాధితురాలి భర్త రాజేశ్ ఫిర్యాదు మేరకు నిందితుడిపై ఐపీసీ సెక్షన్ 352, 354 ఏ, 509 తదితర సెక్షన్ల కింద కేసు నమోదుచేశారు. ‘‘నేను, నా భార్య సెకెండ్ ఏసీ టిక్కెట్ తీసుకుని ఏ2 కోచ్‌లోని సీటు నెంబరు 31,32లో కూర్చున్నాం.. ఆదివారం అర్ధరాత్రి 12.30 గంటల సమయంలో 41 నెంబరు సీటులో ఉన్న టీటీఈ మా దగ్గరకు వచ్చి నా భార్య ముఖంపై మూత్రం పోశాడు’’ అని చెప్పారు. డిప్యూటీ స్టేసన్ సూపరింటిండెంట్ కుటుంబం, టీటీఈలు కియూల్ జంక్షన్‌లో రైలు ఎక్కారని, బాధితులు అమృత్‌సర్‌ వరకూ టిక్కెట్ బుక్ చేసుకోగా.. నిందితుడు సహారన్‌పూర్‌లో దిగాల్సి ఉందన్నారు. నిందితుడు మద్యం మత్తులో ఉన్నాడని సహ ప్రయాణికులు చెప్పారని, అయితే, అతడి వద్ద ఎలాంటి మందు బాటిల్ లభించలేదని అధికారులు తెలిపారు.