తోషాఖానా కేసులో ఇమ్రాన్‌పై నాన్-బెయిల్‌బుల్ వారెంట్...తీవ్రంగా ప్రతిఘటిస్తోన్న ఇమ్రాన్ ఖాన్ మద్దతుదారులు

ఆర్థిక ఇబ్బందులతో సతమతమవుతున్న పాకిస్తాన్ లో రాజకీయ ఉద్రిక్తతలు కూడా చోటు చేసుకొన్నాయి. ప్రధానిగా ఉన్నప్పుడు విదేశీ పర్యటనల్లో వచ్చిన కానుకలు, బహుమతులను ప్రభుత్వ ఖజానాలో జమ చేయకుండా నిబంధనలకు విరుద్దంగా వాటిని విక్రయించారనే ఆరోపణలపై పాకిస్థాన్‌ మాజీ ప్రధాని ఇమ్రాన్‌ఖాన్‌‌ను అరెస్ట్‌ చేయడానికి రెండు రోజులుగా ప్రయత్నాలు సాగుతున్నాయి. లాహోర్‌లోని జమాన్ పార్క్ వద్ద ఉన్న ఆయన నివాసానికి మంగళవారం భారీ సంఖ్యలో పోలీసులు రాగా.. ఆయనకు మద్దతుగా పాకిస్థాన్‌ తెహ్రీక్‌-ఏ-ఇన్సాఫ్‌( పీటీఐ) కార్యకర్తలు పెద్ద ఎత్తున తరలివచ్చారు. దీంతో పోలీసులు, పీటీఐ కార్యకర్తల మధ్య తీవ్ర ఘర్షణ చెలరేగింది. ఇమ్రాన్ మద్దతుదారులు పోలీసులపై రాళ్లు రువ్వడంతో ఉద్రిక్తత పరిస్థితి నెలకుంది. ఈ దాడిలో ఇస్లామాబాద్ డీఐజీ సహా చాలా మంది పోలీసులు గాయపడ్డారు.

ఈ క్రమంలో ఇమ్రాన్ నివాసం వద్ద గుమిగూడిన ఆయన మద్దతుదారులను చెదరగొట్టేందుకు పోలీసులు టియర్ గ్యాస్, వాటర్ క్యానన్లు ప్రయోగించారు. ఇమ్రాన్ నివాసానికి చేరుకునే అన్ని మార్గాల్లో కంటెయినర్లను ఏర్పాటు చేయడం సహా సైనిక బలగాలను మోహరించారు. నకిలీ కేసుల్లో తమ నేత పోలీసులకు లొంగిపోరని పీటీఐ నేతలు స్పష్టం చేస్తున్నారు. ఇమ్రాన్‌ను అరెస్ట్ చేయడానికి మంగళవారం రాత్రి నుంచి పోలీసులు చేస్తున్న ప్రయత్నాలు విఫలమవుతున్నాయి. పీటీఐ కార్యకర్తలు తీవ్రంగా ప్రతిఘటించడంతో అరెస్ట్ సాధ్యపడలేదు.

జమాన్ పార్క్‌కు మరిన్ని బలగాలను రప్పించే ప్రయత్నాల్లో పోలీసులు ఉన్నారు. మరోవైపు, మహిళా జడ్జిపై బెదిరింపుల కేసులో జారీ అయిన నాన్‌-బెయిలబుల్‌ వారెంట్‌ను ఇస్లామాబాద్‌ హైకోర్టు మార్చి 16వ తేదీ వరకు సస్పెండ్‌ చేసిందన్న పీటీఐ కార్యకర్తలు.. ఇప్పుడు పోలీసులు ఎలాంటి వారెంట్ తెచ్చారో చూద్దామన్నారు. విదేశీ కానుకల కేసులో ఇమ్రాన్‌ఖాన్‌ను అరెస్ట్‌ చేసేందుకు తమ బృందం ఆయన నివాసానికి వెళ్లినట్లు ఇస్లామాబాద్‌కు చెందిన సీనియర్‌ పోలీసు అధికారి ఒకరు తెలిపారు.

మరోవైపు, ఇమ్రాన్ ఖాన్ తన మద్దతుదారులను ఉద్దేశించి ఓ వీడియోను విడుదల చేశారు. నేను లేకపోయినా మీ పోరాటం కొనసాగాలని, మీ కోసమే నేను యుద్ధం చేస్తున్నానని ఇమ్రాన్ ఆ వీడియోలో అన్నారు.‘‘నా అరెస్టుతో దేశం ప్రశాంతంగా నిద్రపోతుందని వాళ్లు భావిస్తున్నారు.. ఇది తప్పని మీరు నిరూపించాలి. నేను జైలుకు వెళ్లినా, నన్ను చంపినా ఇమ్రాన్‌ లేకుండా కూడా బానిసత్వానికి వ్యతిరేకంగా మేం పోరాడగలం అని మీరు చూపించాలి.. ఆ భగవంతుడు నాకు అన్నీ ఇచ్చాడు. ఈ యుద్ధం మీ కోసమే చేస్తున్నా’’ పీటీఐ పార్టీ కార్యకర్తలను రెచ్చగొట్టేలా ఇమ్రాన్ ఖాన్ వ్యాఖ్యలు చేయడం గమనార్హం.