వివేకా హత్య కేసు విచారణలో కొత్త సిట్ ఏర్పాటు

మాజీ మంత్రి వైఎస్ వివేకానంద రెడ్డి హత్య కేసు రోజుకో మలుపుతిరుగుతోంది. తాజాగా వివేకా హత్య కేసు విచారణలో కొత్త సిట్‌ను ఏర్పాటు చేస్తూ.. సీబీఐ నిర్ణయం తీసుకుంది. ప్రస్తుత విచారణ అధికారి రాంసింగ్‌ను తప్పిస్తూ నిర్ణయం తీసుకుంది. ఇదే సమయంలో.. సుప్రీం కోర్టు కీలక వ్యాఖ్యలు చేసింది. ఆరు నెలల్లో ట్రయల్‌ మొదలుకాకపోతే సాధారణ బెయిల్‌ పిటిషన్‌ దాఖలు చేసుకోవచ్చని.. సుప్రీంకోర్టు స్పష్టం చేసింది. ఈ కేసులో తులసమ్మ పిటిషన్‌పై విచారణ సందర్భంగా.. అపెక్స్ కోర్టు ఈ కామెంట్స్ చేసింది.

వివేకా హత్య కేసులో విస్తృత కుట్ర కోణాన్ని బయటపెట్టాలని.. జస్టిస్‌ ఎంఆర్‌షా ధర్మాసనం ఆదేశించింది. ఏప్రిల్‌ 30 లోపు దర్యాప్తు ముగించాలని స్పష్టం చేసింది. దీంతో కొత్త సిట్‌‌ను ఏర్పాటు చేస్తూ.. సుప్రీంకోర్టు ముందు సీబీఐ ప్రతిపాదన పెట్టింది. కొత్త సిట్‌లో ఎస్పీ వికాస్‌ సింగ్‌, అడిషనల్‌ ఎస్పీ ముకేష్‌ కుమార్‌, ఇన్స్‌పెక్టర్లు ఎస్‌.శ్రీమతి, నవీన్‌ పునియా, సబ్‌‌ ఇన్స్‌పెక్టర్ అంకిత్‌ యాదవ్‌ ఉన్నారు. సీబీఐ డీఐజీ కేఆర్‌ చౌరాశియా నేతృత్వంలో.. ఈ కొత్త సిట్‌ పని చేస్తుందని.. సీబీఐ సుప్రీం కోర్టుకు వివరించింది. ఈ కేసు దర్యాప్తు నుంచి.. ప్రస్తుత అధికారి రాంసింగ్‌ను తప్పించింది.

అంతకు ముందు విచారణ సందర్భంగా నాయమూర్తి కీలక వ్యాఖ్యలు చేశారు. దర్యాప్తు అధికారి రాంసింగ్‌ను కొనసాగించడంపై అభ్యంతరం వ్యక్తం చేశారు న్యాయమూర్తి ఎంఆర్‌ షా. దర్యాప్తులో పురోగతి సాధించనప్పుడు.. రాంసింగ్‌ను కొనసాగించడంలో అర్ధం లేదని అభిప్రాయపడ్డారు. అయితే.. విచారణ ఆలస్యం అవుతున్న కారణంగా.. ఏ-5 శివశంకర్ రెడ్డికి బెయిల్ మంజూరీ తులసమ్మ కోరారు. ఆ విషయాన్ని పరిశీలిస్తామని అత్యున్నత న్యాయస్థానం స్పష్టం చేసింది. అయితే.. కొత్త దర్యాప్తు అధికారిని నియమించడం వల్ల.. దర్యాప్తు పూర్తి కావడానికి కనీసం మూడు నెలలు అయినా పడుతుందని.. ఈలోగా ఏ-5 శివశంకర్ రెడ్డికి బెయిల్ ఇవ్వాలని తులసమ్మ తరఫు లాయర్ కోరారు.

ఇదే కేసుపై మంగళవారం కూడా అపెక్స్ కోర్టు విచారణ జరిపింది. ఇప్పుటిదాకా జరిగిన దర్యాప్తులో పురోగతి లేదని అసహనం వ్యక్తం చేసింది. ఎన్నేళ్లు విచారణ కొనసాగిస్తారని సీబీఐని ప్రశ్నించింది. ప్రస్తుత దర్యాప్తు అధికారిని కొనసాగిస్తూనే.. ఇంకొకరిని నియమించాలని సూచించింది. దీంతో దర్యాప్తు అధికారిని మారిస్తే.. విచారణలో మరింత జాప్యం జరుగుతుందని సునీత తరఫు లాయర్ ఆందోళన వ్యక్తం చేశారు. అయితే.. త్వరగా దర్యాప్తు జరగాలన్నదే తమ ఉద్దేశమని సుప్రీం కోర్టు స్పష్టం చేసింది. కోర్టు ఆదేశించినట్టే.. బుధవారం కొత్త సిట్ ఏర్పాటు చేస్తూ.. సీబీఐ నిర్ణయం తీసుకుంది. దర్యాప్తు నుంచి రాంసింగ్‌ను తప్పించడం ఇప్పుడు చర్చనీయాంశంగా మారింది.