టిక్కెట్ కోసం వరదరాజుల రెడ్డి యత్నాలు...త్వరలో చంద్రబాబుతో భేటీ

కడప జిల్లాలో చాలా రోజుల తర్వాత ప్రొద్దుటూరు మాజీ ఎమ్మెల్యే వరదరాజులురెడ్డి యాక్టివ్ అయ్యారు. తాను కొన్నాళ్ల నుంచి రాజకీయాల్లో యాక్టివ్‌గా లేనని.. గత రెండేళ్ల నుంచి ప్రొద్దుటూరు నియోజకవర్గంలో అరాచకాలు, అవినీతి, దోపిడీ, దౌర్జన్యాలు పెరిగిపోయాయన్నారు. స్థానికంగా జనాల్లో కూడా ఆందోళన ఉందని.. అప్పట్లో ఎమ్మెల్యేగా ఐదుసార్లు గెలిపించిన ప్రజలు పడుతున్న ఇబ్బందులను గుర్తించాను అన్నారు. మళ్లీ టీడీపీలో క్రియాశీలకంగా పని చేయాలని నిర్ణయం తీసుకున్నట్లు ప్రకటించారు.

వచ్చే ఎన్నికల్లో ప్రొద్దుటూరులో టీడీపీ గెలుపునకు ఐక్యంగా కృషి చేస్తామన్నారు వరదరాజులురెడ్డి. తాను త్వరలో పార్టీ అధినేత చంద్రబాబును కలిసి రాజకీయ పరిస్థితులపై మాట్లాడుతామన్నారు. వచ్చే ఎన్నికల్లో తనకు టీడీపీ నుంచి పోటీ చేసే అవకాశం ఇవ్వాలని కోరుతానని.. ఒకవేళ నియోజకవర్గ ఇంఛార్జ్ ప్రవీణ్‌కుమార్‌రెడ్డితో కలిసి పని చేస్తామని చెప్పారు. ఒకవేళ ఆయనకు టికెట్‌ ఇచ్చినా అన్నివిధాలుగా సహకరిస్తాను అన్నారు.

ప్రొద్దుటూరు టికెట్ ఎవరికి ఇచ్చినా పనిచేయడానికి తాను సిద్ధమన్నారు. అలాగే తాను కూడా టీడీపీ టికెట్ రేసులో ఉన్నాను అని పరోక్షంగా చెప్పారు. ప్రొద్దుటూరు ప్రజల కోరిక మేరకు వచ్చే ఎన్నికల్లో పోటీ చేయాలని అనుకుంటున్నట్లు చెప్పారు. ప్రొద్దుటూరులో పూర్వ శాంతియుత వాతావరణం నెలకొల్పడానికి ప్రయత్నం చేస్తానని.. త్వరలోనే తన వర్గం , అభిమానులతో కలిసి వారితో చర్చిస్తాను అన్నారు.

వరదరాజులు రెడ్డి టీడీపీ నుంచి ఒకసారి గెలిచిన ఆయన.. ఆ తర్వాత కాంగ్రెస్‌గూటికి చేరారు. 1985 నుంచి 2004 వరకు ఐదుసార్లు విజయం సాధించారు. 2009లో టీడీపీ అభ్యర్థి లింగారెడ్డి చేతిలో ఓడిపోయారు. 2014 ఎన్నికలకు ముందు టీడీపీలో చేరి ప్రొద్దుటూరు నుంచి పోటీచేసి ఓడారు. 2019లో ఆయనకు టీడీపీ టికెట్ దక్కలేదు.. ఎన్నికల తర్వాత ఆయన పార్టీకి దూరంగా ఉంటున్నారు.

ఇటు టీడీపీ ప్రవీణ్ కుమార్ రెడ్డికి ప్రొద్దుటూరు నియోజకవర్గ బాధ్యతల్ని అప్పగించింది.. ప్రస్తుతం ఆయన ఇంఛార్జ్‌గా ఉన్నారు. అంతేకాదు మాజీ ఎమ్మెల్యే లింగారెడ్డి కూడా టికెట్ ఆశిస్తుండగా.. ఇప్పుడు వరదరాజులురెడ్డి కూడా తెరపైకి వచ్చారు. వచ్చే ఎన్నికల్లో పోటీచేయడానికి సిద్ధమంటున్నారు. దీంతో ముగ్గురు నేతలు ఒకే నియోజకవర్గం నుంచి సీటు ఆశిస్తున్నారు.

ముఖ్యమంత్రి వైఎస్ జగన్ సొంత జిల్లా కావడంతో టీడీపీ అధినేత చంద్రబాబు కూడా టికెట్ల విషయంలో జాగ్రత్తలు తీసుకుంటున్నారు. ప్రవీణ్‌కుమార్ రెడ్డిని ఇంఛార్జ్‌గా కొనసాగిస్తున్నా సరే.. ఇప్పుడు లింగారెడ్డి, వరదరాజులురెడ్డిలు కూడా టికెట్ ఆశిస్తుండటం ఆసక్తికరంగా మారింది.