పడిపోతున్న చైనా జనాభా,,,అమాంతంగా పెరుగుతున్న భారత్ జన సంఖ్య

జనాభా విషయంలో చైనాను దాటేసే దిశగా భారతదేశం అడుగులేస్తోంది. ప్రస్తుతం ప్రపంచ దేశాల్లో జనాభాలో చైనా తొలి స్థానంలో ఉండగా.. ఆ తర్వాత ఇండియా కొనసాగుతోంది. అయితే త్వరలో చైనాను అధిగమించి జనాభాలో భారత్ తొలి స్థానానికి చేరుకోనుంది. ఈ ఏడాది మధ్యలో చైనాను దాటేసి ప్రపంచంలోనే అత్యధిక జనాభా కలిగిన దేశంగా భారత్ అవతరించనుందని ఐక్యారాజ్యసమితి బుధవారం తన నివేదికలో తెలిపింది.

యునైటెడ్ నేషన్స్ పాపులేషన్ ఫండ్ 'స్టేట్ ఆఫ్ వరల్డ్ పాపులేషన్ రిపోర్ట్' 2023ను తాజాగా యూఎన్ జనాభా అధికారులు విడుదల చేశారు. ఈ రిపోర్ట్ ప్రకారం భారత జనాభా 1,428.5 మిలియన్లు లేదా 1.4286 బిలియన్లతో తొలి స్థానానికి చేరుకుంటుందని అంచనా వేసింది. చైనా జనాభా 1.4257 బిలియన్లతో రెండో స్థానంలో ఉంటుందని, యునైటెడ్ స్టేట్స్ 340 మిలియన్ల జనాభాతో మూడో స్థానంలో ఉంటుందని అంచనా వేసింది. ఫిబ్రవరి 2023 నాటికి అందుబాటులో ఉన్న సమాచారాన్ని సేకరించి ఈ నివేదిక తయారుచేసినట్లు ఐక్యారాజ్యసమతి జనాభా విభాగం స్పష్టం చేసింది.

అయితే గతంలో ఈ నెలలో భారత జనాభా చైనాను దాటిపోతుందని ఐక్యారాజ్యసమతి అంచనా వేసింది. అయితే తాజా నివేదికలో మాత్రం ఏ నెలలో చైనా జనాభాను భారత్ దాటుతుందనే విషయం వెల్లడించలేదు. భారత్, ఇండియా నుంచి వచ్చే డేటా గురించి ఆనిశ్చితి కారణంగా డేట్‌ను ఇప్పుడే చెప్పలేమని యూఎన్ అధికారులు తెలిపారు. భారత్‌లో జనాభా లెక్కల గణన చివరిసారిగా 2011లో జరిగింది. 2021లో జరగాల్సి ..ఉండగా కరోనా మహమ్మారి కారణంగా వాయిదా పడినట్లు తెలిపారు.

అలాగే భారత్‌లో కంటే చైనాలో జనాభా పెరుగుదల బాగా మందగిస్తోందని, గత ఏడాది చైనాలో జనాభా పెరుగుదల బాగా పడిపోయిందని యూఎన్ అధికారులు తమ నివేదికలో పొందుపర్చారు. ఇక 2011 నుంచి భారతదేశ జనాభా పెరుగుతుందని, వార్షిక జనాభా పెరుగుదల సగటున 1.2 శాతంగా ఉందని తెలిపింది. అయితే 8.045 బిలియన్ల ప్రపంచ జనాభాలో మూడింట ఒక వంతు కంటే ఎక్కువ జనాభా భారత్, చైనా కలిగి ఉందని అధికారులు వెల్లడించారు. ఈ ఏడాది మధ్యలోనే జనాభా పరంగా చైనాను ఇండియా దాటేసే అవకాశముందని భారత్ ప్రభుత్వం అందించిన డేటా ప్రకారం అంచనా వేశారు. కాగా ఈ ఏడాది జనవరిలో చైనా ప్రభుత్వం తమ దేశ జనాభాను ప్రకటించింది. 1960 తర్వాత తొలిసారి చైనాలో జనాభా తగ్గడం చర్చకు దారితీసింది. ఇది అనేక మార్పులకు సంకేతమని UN అధికారులు చెబుతున్నారు.