వ్యాపారం కోసం రుణం తీసుకున్నారని ,,,పంజాబ్ నేషనల్ బ్యాంకు నుంచి నోటీసులు

మున్సిపల్ ఆఫీసులో స్వీపర్‌‌గా పనిచేసే వ్యక్తికి రూ.16 కోట్ల రుణం చెల్లించమంటూ బ్యాంక్‌ నోటీసు పంపడంతో కుటుంబం షాకయ్యింది. సకాలంలో రుణం చెల్లించకుంటే ఆస్తులను జప్తు చేస్తామని నోటీసులో హెచ్చరించారు. ఈ నోటీసు చూడగానే స్వీపర్ భార్య సొమ్మసిల్లిపడిపోయింది. ఈ ఘటన గుజరాత్‌లోని వడోదరలో చోటుచేసుకుంది. వివరాల్లోకి వెళ్తే వడోదర నగరానికి చెందిన శాంతిలాల్‌ మహిజిభాయ్ సోలంకి.. మున్సిపల్ ఆఫీసులో స్వీపర్‌గా పనిచేస్తున్నాడు. అతడికి ఈ నెల 14న పంజాబ్‌ నేషనల్‌ బ్యాంకు ఉత్తర్ ప్రదేశ్‌లోని ఆగ్రా శాఖ నుంచి ఓ నోటీసు అందింది. రూ.16.05 కోట్ల రుణం తీసుకున్నారని, మే 4 లోపు ఆ మొత్తాన్ని చెల్లించాలని అందులో పేర్కొన్నారు.

రుణం చెల్లించనట్లయితే.. ఆస్తులను స్వాధీనం చేసుకుంటామని హెచ్చరించడంతో శాంతిలాల్‌ కుటుంబం తీవ్ర ఆందోళనకు గురైంది. ఆయన భార్య జాషిబెన్‌ కళ్లుతిరిగి కింద పడిపోయింది. దీంతో కుటుంబసభ్యులు ఆమెను ఆస్పత్రికి తరలించారు. అనంతరం శాంతిలాల్‌.. వడోదరలోని పంజాబ్‌ నేషనల్‌ బ్యాంకు కార్యాలయానికి వెళ్లి వివరాలు తెలుసుకునే ప్రయత్నం చేశారు. అయినా ఫలితం లేకపోయింది. అధికారుల నుంచి సరైన సమాచారం అందలేదు. చివరకు స్థానిక ఎమ్మెల్యే నీరజ్‌ చోప్రాను కలిసి తన బాధను చెప్పుకున్నాడు.

బాధిత కుటుంబం తరఫున జిల్లా అధికారులకు వినతిపత్రం అందజేసిన ఎమ్మెల్యే చోప్రా.. వారికి న్యాయం చేయాలని కోరారు. ఆ కుటుంబం మొత్తం ఆస్తులే రూ.10 లక్షలలోపు ఉంటాయని, అలాంటిది రూ.16 కోట్లు అప్పు ఎలా చేస్తారని అధికారులను ప్రశ్నించారు. నోటీసు విషయం బయటకు రావడంతో స్థానికంగా తీవ్ర చర్చనీయాశంమైంది.

బాధితుడు శాంతిలాల్ మాట్లాడుతూ.. తనకు పంజాబ్ నేషనల్ బ్యాంకులో అకౌంట్ లేదని, నేను ఎటువంటి రుణం తీసుకోలేదని వాపోయాడు. బ్యాంక్ ఆఫ్ బరోడా, బ్యాంకు ఆఫ్ ఇండియాలో మాత్రమే ఖాతాలున్నాయి.. నేను ఉంటోన్న ఇంటి విలువ రూ.10 లక్షలు ఉంటుంది.. అలాంటిది అంత పెద్ద మొత్తంలో నేను రుణం ఎలా తీసుకుంటాను అని ప్రశ్నిస్తున్నాడు. స్టెర్లింగ్ సెంటర్ ప్రాపర్టీ పేరుతో రుణం తీసుకున్నట్టు బ్యాంకు నోటీసుల్లో వివరించారు.