బ్యూటీపార్లర్‌కు వద్దన్నందుకు భార్య ఆత్మహత్య

మధ్యప్రదేశ్‌లో విషాదకర ఘటన చోటుచేసుకుంది. బ్యూటీపార్లర్‌కు వెళ్లవద్దని భర్త చెప్పినందుకు ఓ భార్య ఆత్మహత్యకు పాల్పడింది. బ్యూటీపార్లర్‌కు వెళతానంటూ భర్తకు భార్య చెప్పగా.. అందుకే భర్త వెళ్లవద్దని వాదించాడు. దీంతో మనస్తాపానికి గురైన భార్య ఫ్యాన్‌కు ఉరేసుకుని బలవన్మరణానికి పాల్పడింది. ఈ విషాదకర ఘటనకు సంబంధించిన పూర్తి వివరాల్లోకి వెళితే..

మధ్యప్రదేశ్‌లోని ఇందౌర్‌లోని ఏరోడ్రమ్ పోలీస్ స్టేషన్ పరిధిలో విషాదం చోటుచేసుకుంది. బలరాం యాదవ్, రీనా అనే భార్యాభర్తలు స్థానికంగా నివాసం ఉంటున్నారు. వీరి పెళ్లి జరిగిన 15 ఏళ్లు అయింది. అయితే గురువారం బ్యూటీపార్లర్‌కు వెళ్లాలని భార్య రీనా నిర్ణయించుకుంది. ఈ విషయాన్ని భర్త బల్‌రాం యాదవ్‌ దృష్టికి తీసుకెళ్లింది. దీనికి బల్‌రాం యాదవ్ ఒప్పుకోలేదు. బ్లూటీపార్లర్‌కు వద్దని గట్టిగా వాదించాడు. దీంతో భార్యాభర్తల మధ్య గొడవ జరిగింది.

బ్లూటీపార్లర్‌కు వెళ్లవద్దని చెప్పడం, గొడవ జరగడంతో భార్య రీనా తీవ్ర మనోవేదనకు గురైంది. ఈ క్రమంలో భర్త ఇంట్లో లేని సమయంలో రూమ్‌లో సీలింగ్ ఫ్యాన్‌కు ఉరేసుకుని బలవన్మరణానికి పాల్పడింది. పని మీద బయటకు వెళ్లిన భర్త.. తిరిగి ఇంటికి వచ్చి చూసేసరికి భార్య విగతజీవిగా మారింది. ఇంట్లో ఫ్యాన్‌కు వేలాడుతూ భార్య మృతదేహాం కనిపించింది. అప్పటికే భార్య చనిపోయినట్లు భర్త గమనించి వెంటనే పోలీసులకు సమాచారం అందించాడు. పోలీసులు ఘటనా స్థలానికి చేరుకుని మృతదేహాన్ని పరిశీలించారు. పోస్టుమార్టం నిమిత్తం రీనా మృతదేహాన్ని స్థానిక జిల్లా ఆస్పత్రికి తరలించారు.

పోస్టుమార్టం పూర్తయిన తర్వాత మృతదేహాన్ని భర్తకు అప్పగించారు. భార్య మరణంతో భర్త కన్నీరుమున్నీరుగా విలపిస్తున్నాడు. పోలీసులు ఈ ఆత్మహత్యపై కేసు నమోదు చేసుకుని దర్యాప్తు చేపడుతున్నారు. భర్తతో పాటు కుటుంబసభ్యులను ప్రశ్నిస్తున్నారు. బ్యూటీపార్లర్ విషయంలో భార్యాభర్తల మధ్య జరిగిన గొడవనే రీనా ఆత్మహత్యకు కారణమని పోలీసులు ప్రాథమికంగా నిర్దారించారు. వివిధ కోణాల్లో ఈ ఆత్మహత్యపై పోలీసులు విచారణ కొనసాగిస్తున్నారు. మరేమైనా కారణాలు ఉన్నాయా? అనే దానిపై దర్యాప్తు చేపడుతున్నట్లు విచారణ అధికారి ఉమా శంకర్ యాదవ్ చెబుతున్నారు. ఈ ఘటనకు సంబంధించి మరిన్ని వివరాలు తెలియాల్సి ఉంది. ఇదిలావుంటే ఇటీవల కాలంలో చిన్న కారణాలకే కొంతమంది ఆత్మహత్యకు పాల్పడుతున్నారు. చిన్నపాటి విషయాలకు ఆవేదనకు గురై బలవన్మరణానికి పాల్పడున్నారు. భార్యాభర్తల మధ్య జరిగే చిన్న గొడవలే చివరికి ఆత్మహత్యలకు దారితీస్తున్నాయి.