తిరువనంతపురంలో ట్రాఫిక్ రూల్స్ ఉల్లంఘించిన బైకర్,,,ఆ తరువాత ఏం జరిగిందో తెలుసా

కేరళ రోడ్లపై ఏర్పాటుచేసిన భద్రత కెమెరాలు విజయన్ సర్కారుకే కాదు.. రాజధాని తిరువనంతపురంలో హెల్మెట్ ధరించకుండా మహిళా స్నేహితురాలితో బైక్‌పై ప్రయాణించిన వ్యక్తి కాపురంలోనూ చిచ్చుపెట్టాయి. సదరు వ్యక్తి హెల్మెట్ ధరించకుండా వాహనం నడిపి ట్రాఫిక్ నిబంధనలు ఉల్లంఘించడంతో అత్యాధునిక కెమెరాల ద్వారా తీసిన ఫోటోలు, మోటార్ వెహికల్ డిపార్ట్‌మెంట్ పంపిన వివరాలు కుటుంబంలో కలహాలకు కారణమయ్యాయి. ఇది చివరకు పోలీసు కేసు వరకూ వెళ్లి అతడి అరెస్టుకు దారితీసింది.

వివరాల్లోకి వెళ్తే.. ఇడుక్కికి చెందిన వ్యక్తి టెక్స్‌టైల్ దుకాణంలో పనిచేస్తున్నాడు. అతడు ఏప్రిల్ 25న తన మహిళా స్నేహితురాలిని బైక్‌పై ఎక్కించుకుని హెల్మెట్ ధరించకుండా వాహనం నడిపాడు. ఈ దృశ్యాలను అతడు వాహనం వెళ్లిన మార్గంలో ఉన్న కెమెరాలు రికార్డ్ చేశాయి. ట్రాఫిక్ నిబంధనలు ఉల్లంఘించడంతో బైక్ యజమానికి అధికారులు ఛలానా పంపారు. రిజిస్ట్రేషన్ సర్టిఫికెట్‌లో సదరు వ్యక్తి భార్య పేరు ఉండటంతో ఆమె మొబైల్ నెంబర్‌కు మెసేజ్ వచ్చింది. తన భర్త బండి నడుపుతుంటే.. వెనుక మహిళ కూర్చుని ఉన్న ఫోటోలు చూసి ఆమె అపర కాళికలా మారిపోయింది.

భర్తతో గొడవపడి వెనుక కూర్చున్న మహిళ ఎవరని నిలదీసింది. అయితే, అమెతో తనకు ఎటువంటి సంబంధం లేదని, కేవలం లిఫ్ట్ ఇచ్చానని అతడు చెప్పినా భార్య మాత్రం నమ్మలేదు. దీంతో ఇరువురూ గొడవపడి చివరకు భర్తపై పోలీసులకు ఫిర్యాదు చేసింది. తనను, మూడేళ్ల తన పాపను కొట్టాడని ఆమె ఆరోపించింది. దీంతో కేసు నమోదుచేసిన పోలీసులు.. అతడ్ని కస్టడీలోకి తీసుకున్నారు. భర్తపై ఐపీసీ 321, 341, 294, జువైనల్ జస్టిస్ చట్టం సెక్షన్ 75 కింద కేసు నమోదుచేశామని పోలీస్ అధికారులు తెలిపారు.

అతడ్ని కోర్టులో ప్రవేశపెట్టడంతో జ్యుడీషియల్ కస్టడీ విధించినట్టు చెప్పారు. రోడ్డు భద్రత ప్రాజెక్టు ‘సేఫ్ కేరళ’లో భాగంగా రాష్ట్ర రహదారులపై కెమెరాల ఏర్పాటుపై తీవ్ర రాజకీయ దుమారం చెలరేగుతోంది. కెమెరాల ఏర్పాటుకు సంబంధించిన ఒప్పందాలపై ఎల్‌డిఎఫ్ ప్రభుత్వంపై ప్రతిపక్ష కాంగ్రెస్ తీవ్రమైన అవినీతి ఆరోపణలు చేసింది.