గోప్యంగా ప్రయాణికుల బరువు తూకం,,,,న్యూజిలాండ్ జాతీయ ఎయిర్‌లైన్స్ కీలక నిర్ణయం

న్యూజిలాండ్‌ జాతీయ ఎయిర్‌లైన్స్‌ ప్రయాణికుల బరువు విషయంలో తీసుకొన్న నిర్ణయం తాజాగా చర్చాంశనీయంగా మారింది. అంతర్జాతీయ విమానాలు ఎక్కే ప్రయాణికులను ముందుగా వ్యక్తిగత బరువు చూసుకోవాలని కోరుతోంది. నెల రోజుల పాటు ఇది ప్రయోగాత్మకంగా నిర్వహించనుంది. జూన్ మొదటి వారంలో ప్రారంభమై జులై 2 దాకా కొనసాగే నెల రోజుల సర్వేలో దాదాపు 10 వేల మంది ప్రయాణికుల బరువు వివరాలను సేకరించడం లక్ష్యంగా పెట్టుకుంది. దీని వల్ల టేకాఫ్‌కు ముందు విమానాల మీద ఉన్న లోడు, బ్యాలెన్సు చేసుకోవాల్సిన తీరుపై పెలట్లు మరింత అవగాహన పెంచుకునేందుకు ఈ గణాంకాలు తోడ్పడతాయని భావిస్తోంది.

అయితే, ప్రయాణికుల బరువు వివరాలను మాత్రం గోప్యంగా ఉంచుతామని తెలిపింది. బరువు చూసుకునేందుకు ఏర్పాటుచేసే స్కేళ్ల వద్ద బాహ్య ప్రదర్శన ఉండదని, ఎయిర్‌లైన్స్‌ సిబ్బందికి కూడా ఆ వివరాలను తెలియకుండా చూస్తామని ‘ఎయిర్‌ న్యూజిలాండ్‌’ భరోసా ఇచ్చింది. ఈ సర్వే ద్వారా విమానంలోకి తరలించే లగేజీ పరిమాణం విషయంలోనూ ఓ స్పష్టత వస్తుందని ఎయిర్‌లైన్స్‌ అధికారి జేమ్స్‌ తెలిపారు. బరువు చూసుకునే ముందు తమ పాదరక్షలతో పాటు జేబుల్లో ఉన్నవాటిని కూడా తీసేయాలని పేర్కొంది.

‘విమానంలో వెళ్లే సరుకుల నుంచి భోజనం.. హోల్డ్‌లో ఉన్న సామాన్ల వరకు అన్నింటిని మేం తూకం వేస్తాం.. కస్టమర్‌లు, సిబ్బంది సహా క్యాబిన్ బ్యాగ్‌ల కోసం ఈ సర్వే ద్వారా పొందే సగటు బరువులను ఉపయోగిస్తాం’ అని ఎయిర్‌లైన్స్ లోడ్ కంట్రోల్ ఇంప్రూవ్‌మెంట్ స్పెషలిస్ట్ అలిస్టర్ జేమ్స్ ఒక ప్రకటనలో తెలిపారు. అయినప్పటికీ బరువు అనేది ప్రతి ఒక్కరూ బహిర్గతం చేయని వ్యక్తిగత విషయం. వ్యక్తుల గోప్యతను రక్షించే క్రమంలో ఎయిర్‌లైన్ డేటాను బయటపెట్టబోమని చెప్పారు.

ప్రయాణికులు చెక్ ఇన్ సమయంలో డిజిటల్ స్కేల్‌లో నిలబడమని కోరుతారు. వారి బరువు గురించిన సమాచారం సర్వేకు చేరుతుంది కానీ స్క్రీన్‌పై కనిపించదు. బరువు తూకం స్కేల్స్‌పై అడుగు పెట్టడం చాలా భయంకరంగా ఉంటుందని మాకు తెలుసని అన్నారు. అయితే, న్యూజిలాండ్ జాతీయ ఎయిర్‌లైన్స్ సంస్థ ఇలా బరువు సర్వే నిర్వహించడం ఇదే మొదటి సారి కాదు. దేశీయ ప్రయాణికులకు 2021లోనే బరువును చూసుకోమని చెప్పింది. కరోనా వైరస్ వ్యాప్తితో అంతర్జాతీయ ప్రయాణికులకు వాయిదా వేసింది.