గతంలో చేసిన వ్యాఖ్యలు పొరపాటే,,,కేశినేని నాని వ్యాఖ్యలపై బుద్దా వెంకన్న

విజయవాడ ఎంపీ కేశినేని నాని చేసిన వ్యాఖ్యలపై మాజీ ఎమ్మెల్సీ బుద్దా వెంకన్న స్పందించారు. నానికి తనకు భేదాభిప్రాయాలు వచ్చి విడిగా ఉంటున్నామని.. ఆ వ్యాఖ్యలు ఆయన విజ్ఞతకే వదిలేస్తున్నాను అన్నారు. గతంలో తాను కేశినేని నానిపై చేసిన వ్యాఖ్యలు పొరపాటేనని.. ఈ విషయాన్ని గతంలోనే ఒప్పుకున్నట్లు చెప్పుకొచ్చారు. కేశినేని నానిని ఆ స్థాయిలో విమర్శించడంపై చంద్రబాబు తనపై అప్పట్లో ఆగ్రహం వ్యక్తం చేసినట్లు చెప్పారు.

తనను ఎవరేం విమర్శించినా తొందరపడనని చంద్రబాబుకు మాటిచ్చాను కాబట్టే కేశినేని నాని వ్యాఖ్యలపై ఇప్పుడేం స్పందించను అన్నారు. నాని వ్యాఖ్యాలని అధిష్టానం చూసుకుంటుందన్నారు. తన స్పందన వల్ల పార్టీకి నష్టం చేకూర్చకూడదనే తాను ఏమీ మాట్లాడదలచుకోలేదన్నారు. బీసీ నాయకుడి అయిన తనను గతంలో కేశినేని నాని ఎన్నోసార్లు అవమానించారని.. ఇప్పటికీ నాని గారంటూనే ఆయన్ను సంబోధిస్తాను అన్నారు. కేశినేని నాని తనను ఎన్ని సార్లు అవమానించిన సైలెంటుగా ఉన్నానని.. ఎవరెన్ని విమర్శలు చేసినా మాట్లాడాను అన్నారు.

నాకైతే ఎవరితో అక్రమ సంబంధాలు లేవు: కేశినేని నాని

అలాగే వైఎస్ వివేకా హత్య కేసులో ఎంపీ అవినాష్ రెడ్డి బెయిల్ రద్దు అంశం సుప్రీంకోర్టులో విచారణ ఉందని గుర్తు చేశారు వెంకన్న. ఆ కారణంగానే ఏపీ సీఎం వైఎస్ జగన్ అర్ధాంతరంగా గుడివాడ పర్యటన రద్దు చేసుకున్నారని విమర్శించారు. ఈ సారి వైఎస్సార్ పైనుంచి వచ్చి ప్రచారం చేసినా గుడివాడ గొట్టంగాడు గెలవలేడని.. జగన్‌కు ఇది అర్ధమవటంతో ఇక గుడివాడ పర్యటన అనవసరం అనుకున్నారన్నారని వ్యాఖ్యానించారు. అవినాష్ రెడ్డి అరెస్టుపై సీబీఐ డొంకతిరుగుడుగా ఉందన్నారు బుద్దా వెంకన్న. వైఎస్సార్‌సీపీ గొట్టంగాళ్లంతా టీడీపీ చంద్రబాబుకు ప్రాణహాని తలపెట్టాలని చూస్తున్నారన్నారు. సునీతా రెడ్డి పులివెందుల పులి.. జగన్ పిల్లి అంటూ ఘాటు వ్యాఖ్యలు చేశారు.

విజయవాడ టీడీపీలో రాజకీయాలు కొంతకాలంగా వేడెక్కాయి. ఎంపీ కేశినేని నాని కొంతకాలంగా దూకుడు పెంచారు. సొంత పార్టీ నేతల్ని పరోక్షంగా టార్గెట్ చేయడంతో పాటూ అధికార పార్టీ ఎమ్మెల్యేలు, నేతలపై ప్రశంసలు కురిపించారు. ఈ క్రమంలో నియోజకవర్గ ఇంఛార్జ్‌లు గొట్టంగాళ్లు అంటూ నాని చేసిన వ్యాఖ్యలు దుమారం రేపాయి. అలాగే చంద్రబాబు ఢిల్లీ పర్యటనకు.. ఆయన పీఏ పిలిస్తేనే వెళ్లానని చెప్పుకొచ్చారు. టీడీపీ, బీజేపీ పొత్తు గురించి మాట్లాడేంత వ్యక్తిని కాదన్నారు. తనకు ఇతర పార్టీల నుంచి ఆఫర్లు వస్తున్నాయని.. కానీ తనకు పార్టీ మారే ఆలోచన ప్రస్తుతానికి లేదన్నారు. తనకు చిర్రెత్తితే అప్పుడు ఆలోచిస్తానన్నారు. అలాగే ఇండిపెండెంట్‌గా పోటీచేస్తానన్న వ్యాఖ్యలకు కూడా కట్టుబడి ఉన్నానన్నారు. ఎంపీ నాని వ్యాఖ్యలు టీడీపీలో హాట్ టాపిక్ అయ్యాయి.