వైసీపీ నేతలకి సవాల్ విసిరిన పవన్ కళ్యాణ్

వైసీపీ నాయకులకు జనసేన అంటే ఏమిటో చేతల్లో చూపిస్తామని ఆ పార్టీ అధినేత పవన్‌కల్యాణ్‌ హెచ్చరించారు. అధికారపార్టీ నేతలు చింతించే రోజులొస్తాయని, అప్పుడు మీసాలు మెలేసి తొడలు కొట్టాలని సవాల్‌ విసిరారు. ‘ఏడాది కిందట మాటలొదిలి తప్పుచేశాం.. క్షమించండి’ అంటూ వారితోనే బహిరంగంగా చెప్పిస్తానన్నారు. ఎదిరిస్తే వ్యవస్థలను అడ్డంపెట్టుకుని భయపెట్టడం వైసీపీకి అలవాటుగా మారిపోయిందని పవన్‌ ధ్వజమెత్తారు. వారాహి యాత్ర రెండోరోజు పర్యటనలో భాగంగా కాకినాడ జిల్లా పిఠాపురం నియోజకవర్గం గొల్లప్రోలులో పవన్‌ మీడియాతో మాట్లాడారు. వారాహి యాత్రతో ఏపీ రాజకీయాల్లో కచ్చితంగా మార్పు వస్తుందని ధీమా వ్యక్తం చేశారు. జనసేనకు మాజీమంత్రి పేర్నినాని రెండు చెప్పులు చూపించడాన్ని మీడియా ప్రస్తావించగా... ఆయన పాకిస్థాన్‌ బోర్డర్‌కు వెళ్లి గుర్రం స్వారీ చేయాలంటూ చురకలు అంటించారు. ‘‘మీసాలు మెలేయడం, తొడగొట్టడాలు నేను సినిమాల్లోనే చేయలేదు. అలాంటివి చేయడానికి ఇబ్బంది పడతాను. కానీ, వైసీపీ నేతలు ఇవన్నీ చేస్తున్నారు. వాటిపై మేం స్పందించబోం. జనసేన సీరియస్‌ పాలిటిక్స్‌ చేస్తుంది. ఎటకారాలు మా పద్ధతికాదు. ఎదురు సమాధానం చెప్పడం మా విధానం కాదు. అన్నింటికీ ఒకేసారి చేతల్లో చేసి చూపిస్తాం. ఆరోజు తప్పక వస్తుంది’’ అని పవన్‌ హెచ్చరించారు. సాయంత్రం 6గంటలకు చేబ్రోలులోని సెరీకల్చర్‌ ఫారంలో పట్టుగూళ్లను పవన్‌ పరిశీలించారు. రైతులతో మాట్లాడారు. ‘‘వచ్చే ఎన్నికల్లో జనసేనకు పదేళ్లపాటు అధికారం ఇవ్వండి. అధికారంలోకి వచ్చాక పాలించే అర్హత లేదని ప్రజలు చెబితే వెంటనే దిగిపోతాను. వచ్చే ఎన్నికల్లో మోసగాళ్ల మాటలను నమ్మవద్దు. ఉదయం అమ్మఒడి ఇచ్చి రాత్రికి సారా కోసం డబ్బులు తీసేసుకుంటున్నారు. ఎస్సీలకు మేనమామ అని చెప్పుకొనే జగన్‌... అంబేడ్కర్‌ విదేశీవిద్య స్కీమ్‌ను రద్దు చేసేశారు. మీరు పిలిస్తే వచ్చిన వ్యక్తిని నేను. ఒక్క అవకాశం జనసేనకు ఇవ్వండి’’ అని విజ్ఞప్తి చేశారు. అధికారం ఇస్తే చేబ్రోలును సిల్క్‌సిటీగా మార్చుతానని, జీఎస్టీ రాష్ట్ర ప్రభుత్వమే కట్టేలా చర్యలు తీసుకుంటానన్నారు. ఉప్పాడ జాంధారికి పేటెంట్‌ అమలయ్యేలా చేస్తానని, ఉప్పాడ చీరలకు విదేశీ మార్కెట్‌ కల్పిస్తానని హామీ ఇచ్చారు. ఉప్పాడ పట్టుకు రెట్టింపు రేటు వచ్చేలా చేస్తానన్నారు.