మళ్ళి నారాయణకే టికెట్
Andhra Pradesh Telugu | Suryaa Desk | Published : Fri, Jun 30, 2023, 02:00 PM
తెలుగుదేశం పార్టీ నెల్లూరు నగర ఇన్చార్జిగా మాజీ మంత్రి పొంగూరు నారాయణను నియమిస్తూ టీడీపీ అధిష్ఠానం నిర్ణయం తీసుకుంది. ఈ మేరకు గురువారం సాయంత్రం ఆ పార్టీ రాష్ట్ర అధ్యక్షుడు కింజారపు అచ్చెన్నాయుడు ఓ ప్రకటన విడుదల చేశారు. వ్యక్తిగత కారణాల రీత్యా 2019 ఎన్నికల తరువాత ప్రత్యక్ష రాజకీయాలకు దూరంగా జరిగిన నారాయణ మళ్లీ టీడీపీలో ప్రత్యక్షంగా కీలక బాధ్యతలు నిర్వహించడానికి సిద్ధమయ్యారు. ఈ క్రమంలో నెల్లూరు సిటీ నుంచి నారాయణ పోటీ చేస్తారని పార్టీ నేతల అంతర్గత సమావేశంలో పార్టీ జాతీయ అధ్యక్షుడు చంద్రబాబు నాయుడు ఇదివరకే స్పష్టం చేశారు. నారా లోకేష్ పాదయాత్ర జిల్లాలోకి ప్రవేశిస్తున్న నేపథ్యంలో సిటీ ఇన్చార్జి బాధ్యతలను నారాయణకే అప్పగించాలని టీడీపీ అధిష్ఠానం నిర్ణయం తీసుకుంది. ఇప్పటివరకు నగర ఇన్చార్జిగా ఉన్న కోటంరెడ్డి శ్రీనివాసులు రెడ్డిని రాష్ట్ర ప్రధాన కార్యదర్శిగా నియమించారు. అలాగే రానున్న రోజుల్లో ఎమ్మెల్సీ కూడా ఇవ్వనున్నట్లు కోటంరెడ్డికి చంద్రబాబు హామీ ఇచ్చినట్లు తెలిసింది.
|
|