పెళ్లి రోజు రక్తదానం చేసి ఎంతోమందికి స్ఫూర్తినిచ్చిన వరుడు

పెళ్లిళ్ల ట్రెండ్ మారిపోయింది.. ఒకప్పుడు చదివింపులు ఉండేవి.. ఇప్పుడు ఆ స్థానంలోకి గిఫ్ట్‌లు వచ్చేశాయి. కొంతకాలంగా ఆ ట్రెండ్ కూడా మార్చేసి.. పెళ్లి సందర్భంగా ఏదైనా మంచి పనిచేయాలని వినూత్నంగా ఆలోచిస్తున్నారు వధూవరులు. ఇటీవల ఓ జంట తమ పెళ్లి సందర్భంగా కుటుంబ సభ్యులు, స్నేహితులు, బంధువులతో అవయవదానం చేయించిన సంగతి తెలిసిందే. మరో జంట రక్తదానం చేసి భిన్నంగా పెళ్లి వేడుకను చేసుకున్నారు. కొందరు మొక్కలు నాటే కార్యక్రమం చేపట్టారు. ఇలా ఎవరికి తోచినట్లు వారు తమ పెళ్లి రోజు నాడు చేపట్టే మంచి పనితో.. జీవితంలో గొప్ప అనుభూతిగా మార్చుకుంటున్నారు.

తాజాగా ఓ యువకుడు తన పెళ్లి రోజునాడు ఓ గొప్ప పని చేశాడు. రక్తదానం చేసి అందరికీ ఆదర్శంగా నిలిచాడు. అన్నమయ్య జిల్లా మదనపల్లెకు చెందిన హెల్పింగ్‌ మైండ్స్‌ సంస్థ నిర్వాహకుడు అబుబకర్‌ సిద్ధిక్‌కు పెద్దమండ్యం మండలం కలిచెర్లకు చెందిన ఓ యువతితో వివాహమైంది. మధ్యాహ్నం వివాహ వేడుక తర్వాత అబుబకర్‌ సిద్ధిక్‌ కల్యాణ మండపంలోనే రక్తదానం చేసి అందరినీ ఆశ్చర్యపరిచాడు.

సిద్ధిక్‌ను స్ఫూర్తిగా తీసుకుని మరో 40 మంది రక్తదానం చేశారు. ఇలా సేకరించిన రక్తంలో.. 20 యూనిట్ల రక్తాన్ని మదనపల్లె జిల్లా ప్రభుత్వాసుపత్రిలోని రక్తనిధి కేంద్రానికి.. మరో 20 యూనిట్లను ప్రైవేటు రక్తనిధి కేంద్రానికి అందించారు. వివాహ వేడుకల్లో రక్తదానం చేసి ఆదర్శంగా నిలిచిన అబుబకర్‌ సిద్ధిక్‌ను అధికారులు, ప్రజలు, బంధువులు అభినందించారు. అంతేకాదు సిద్ధిక్‌ మదనపల్లెలో హెల్పింగ్‌ మైండ్స్‌ సేవా సంస్థ ద్వారా ప్రాణాపాయ స్థితిలో ఉన్న వారికి రక్తదానంతో పాటు పలు సేవా కార్యక్రమాలు నిర్వహిస్తున్నారు.