పవన్ కళ్యాణ్‌కు హరిరామ జోగయ్య లేఖ

వాలంటీర్ వ్యవస్థకు సంబంధించి జనసేన పార్టీ అధినేత పవన్ కళ్యాణ్‌కు కాపు సంక్షేమ సేన వ్యవస్థాపకుడు, మాజీ మంత్రి హరిరామ జోగయ్య సోమవారం లేఖ రాశారు. వాలంటీర్ల సమస్యల్ని ప్రవస్తావిస్తూ.. వాటిని పరిష్కరించే దిశగా చర్యలు తీసుకోవాలని కోరారు. వాలంటీర్ వ్యవస్థలో.. సుమారు 2.50 లక్షల మంది నెలకు 5 వేల రూపాయిల చాలీచాలని జీతంతో బ్రతుకుతున్నారని పేర్కొన్నారు. కనీసం ఉపాధి కరువైన ఈ రోజుల్లో.. ప్రభుత్వం ఎంత మందికి ఉపాధి కలిపించగలదని ప్రశ్నించారు. వాలంటీర్ వ్యవస్థలో అత్యధిక శాతం అధికార వైఎస్సార్ కాంగ్రెస్ పార్టీకి చెందిన వారే ఉన్నారన్నది వాస్తవమన్నారు.

రాష్ట్ర ఎన్నికల మెమో 818 ప్రకారం.. వాలంటీర్ వ్యవస్థలో వైసీపీకి చెందిన వారు ఎక్కువగా ఉండటం వల్లే, ఎన్నికల ప్రక్రియలో ఆ వ్యవస్థని ఉపసంహరించుకోవాలని జీవో ఇచ్చారని హరిరామ జోగయ్య అన్నారు. అధికార వైసీపీ వాలంటీర్లను సంక్షేమ పథకాల అమలు కంటే.. తమ స్వార్థ ప్రయోజనాల కోసమే ఎక్కువగా ఉపయోగించుకుంటోందని ఆరోపించారు. అవసరమైతే వాలంటీర్ వ్యవస్థని రద్దు చేయాలన్న పవన్ కళ్యాణ్ సంకల్పం మంచిదేనని సమర్థించారు.

అయితే, ఈ వాలంటీర్ వ్యవస్థని పూర్తిగా రద్దు చేయడం కంటే.. కొన్ని ప్రతిపాదనలతో పునర్నిర్మించుకుంటే మంచిదని హరిరామ జోగయ్య అభిప్రాయపడ్డారు. వాలంటీర్ వ్యవస్థలో ఉన్న లక్షలాది మంది మహిళలకు వాలంటీర్ ఉద్యోగాలు కల్పించాలన్నారు. వాలంటీర్లకు కనీసం 10వ తరగతి విద్యార్హత ఉండాలని, వారికి కనీస వేతనం రూ.10 వేలు ఇవ్వాల్సి ఉందన్నారు. అలాగే, జనాభా నిష్పత్తిలో కులాలకు ప్రాధాన్యత కల్పించాలన్నారు. ఈడబ్ల్యూఎస్‌ రిజర్వేషన్లలో సంవత్సరానికి 8 లక్షల ఆదాయం మించని కుటుంబాలకే ఉద్యోగం అందాలన్నారు. జిల్లా కలెక్టర్ల అధ్యక్షతన నియామక కమిటీలను ఏర్పాటు చేసి.. అర్హులైన వారికే ఉద్యోగ లబ్ధి కలిగించాలన్నారు. ఇక, రా జకీయ పార్టీలకు చెందిన వారిని వాలంటీర్లుగా నియమించకూడదని డిమాండ్ చేశారు. అలాగే 21 ఏళ్ల నుంచి 30 సంవత్సరాల లోపు వయసున్న వారే ఉద్యోగానికి అర్హులుగా నిర్ణయించాలన్నారు.