రేణిగుంటలో రైలు ప్రయాణికుల ఆందోళన

మనం ఏదైనా ఊరు వెళ్లాలంటే రైల్వే స్టేషన్‌కు వెళ్తాం.. అక్కడ మనం ఎక్కాల్సిన రైలు ఎప్పుడొస్తుందో, ఏ ప్లాట్ ఫామ్ మీదకు వస్తుందో అనే వివరాలు డిస్ ప్లే బోర్డు మీద చూసి తెలుసుకుంటాం. అక్కడ కనిపించకపోతే పక్కనే ఉన్న రైల్వే ఎంక్వైరీ సిబ్బందిని అడిగి కనుక్కుంటాం. కానీ వివరాలు చెప్పాల్సిన ఎంక్వైరీ సిబ్బందే.. తప్పుడు వివరాలు చెప్తే ఏమవుతుంది.. ఇదిగో వీరిలాగా రైల్వే స్టేషన్‌లో పడాల్సి ఉంటుంది.

సరిగ్గా ఇలాంటి ఘటన తిరుపతి జిల్లా రేణిగుంట రైల్వే స్టేషన్‌లో జరిగింది. చిన్న తప్పుతో ప్రయాణికులు రైలును మిస్ అయ్యారు. కొందరు ప్రయాణికులు రేణిగుంట మీదుగా భువనేశ్వర్ వెళ్లాల్సిన రైలు కోసం వేచి ఉన్నారు.. వారంతా రైలు ఏ ప్లాట్‌ఫామ్‌కు వస్తుందని ఎంక్వైరీలో అడిగారు. అక్కడ సిబ్బంది రెండో నంబర్ ప్లాట్‌ఫామ్ మీదకు వస్తుందని చెప్పారు. దీంతో అందరూ ఐదో నంబర్ ప్లాట్‌ఫామ్‌ దగ్గరకు వెళ్లారు.. ఇంతలో పెద్ద తప్పు జరిగిపోయింది.

భువనేశ్వర్ వెళ్లే రైలు ఎలాంటి అనౌన్స్‌మెంట్ లేకుండా ఐదో నంబర్ ప్లాట్‌ఫామ్ మీదకు వచ్చి వెళ్లిపోయింది. ఆ తర్వాత అసలు విషయం తెలియడంతో ప్రయాణికులు అవాక్కయ్యారు. దాదాపు 400మంది వరకు ఈ రైలును మిస్ అయ్యారు.. ఎంక్వైరీలో సిబ్బంది నిర్లక్ష్యం వల్లే రైలు ఎక్కలేకపోయామని ప్రయాణికులు ఆరోపిస్తున్నారు. ఎంక్వైరీలో ఇచ్చిన తప్పుడు సమాచారంతో ఇదంతా జరిగిందన్నారు. అధికారులతో ప్రయాణికులు వాగ్వాదానికి దిగారు.

ఆ రైలులో పిల్లలు, పెద్ద వయసు ఉన్నవాళ్లు కూడా వెళ్లాల్సి ఉందని.. ఇప్పుడు తాము సొంత ఊళ్లకు ఎలా వెళతామని ప్రశ్నించారు. దీంతో రైల్వే స్టేషన్‌లో కొద్దిసేపు గందరగోళ వాతావరణం కనిపించింది. తాము రైలు మిస్ కావడానికి కారణమైన రైల్వే సిబ్బందిపై తక్షణమే చర్యలు తీసుకోవాలని డిమాండ్ చేశారు. తమకు కనీసం తాగడానికి నీళ్లు లేవు, తినడానికి భోజనం లేదు, పడుకోవడానికి వసతి లేదన్నారు. తమ పరిస్థితి ఏంటని ప్రశ్నిస్తున్నారు. ఈ వ్యవహారంపై రైల్వే అధికారులు స్పందించాల్సి ఉంది. ప్రయాణికులకు రైల్వే అధికారులు ఎలా సాయం చేస్తారన్నది చూడాలి.