తిరుమల ఘాట్ రోడ్డులో రోడ్డు ప్రమాదం,,,,ఇద్దరు భక్తులకు తీవ్ర గాయాలయ్యాయి

తిరుమల రెండవ ఘాట్ రోడ్డులో గోవింద మలుపు సమీపంలో కారు రైలింగ్‌ను ఢీకొట్టింది. కారు టైర్ పంక్చర్ కావడంతో.. తిరుగుతూ రోడ్డుపైకి వచ్చిన కారును ఢీ కొన్న మరో కారు. విజయవాడకు చెందిన ఇద్దరు వృద్ధులకు తీవ్ర గాయాలు అయ్యాయి. వెంటనే వారిద్దరిని పోలీసులు అశ్విని ఆసుపత్రి తరలించారు. ఈ ఘటనలో కారు కూడా ధ్వంసంకాగా.. అతి వేగమే ప్రమాదానికి కారణమని చెబుతున్నారు. ఇటీవల కాలంలో తిరుమల ఘాట్ రోడ్డులో వరుసగా రోడ్డు ప్రమాదాలు జరుగుతున్నాయి. భక్తుల వాహనాలు మాత్రమే కాదు.. ఇటీవల ఎలక్ట్రిక్ బస్సు కూడా బోల్తాపడిన సంగతి తెలిసిందే. ఈ ఘటనల్లో భక్తులు స్వల్ప గాయాలతో బయటపడ్డారు.

ఈ వరుస ప్రమాదాలతో టీటీడీ అలర్ట్ అయ్యింది. శ్రీవారి ఆశీస్సులు కోరుతూ టీటీడీ విశిష్ట మహా శాంతి హోమం నిర్వహించింది. తిరుమల దిగువ ఘాట్‌ రోడ్డులోని ఏడో మైలు శ్రీ ప్రసన్న ఆంజనేయ స్వామి విగ్రహం దగ్గర ఈ హోమాన్ని శాస్త్రోక్తంగా నిర్వహించారు. ఈ ప్రమాదాల్లో భక్తులు పెద్దగా గాయాలు లేకుండా బయటపడ్డారని.. శ్రీ వేంకటేశ్వర స్వామి ఆశీస్సులతో వారంతా సురక్షితంగా ఉన్నారన్నారు.

అలాగే ఘాట్ రోడ్డు ప్రమాదాలను ఎలా అధిగమించాలనే అంశంపై జిల్లా కలెక్టర్, ఎస్పీ, ఆర్టీసీ ఆర్ఎంలతో సమావేశం నిర్వహించింది టీటీడీ. ప్రమాదాల నివారణకు జిల్లా ఎస్పీతో ఉన్నత స్థాయి సమావేశాన్ని ఏర్పాటు చేసి కార్యాచరణ ప్రణాళికలు రూపొందించాలని నిర్ణయించారు. అలాగే ఘాట్ రోడ్లలో ప్రమాదాలు జరిగినప్పుడు విజిలెన్స్ సిబ్బంది మిగిలిన శాఖలతో సమన్వయం చేసుకుని అప్రమత్తం చేయాలని నిర్ణయించారు.

ప్రమాదాల్లో క్షతగాత్రులకు ఆసుపత్రుల్లో ఎటువంటి ఆలస్యం లేకుండా చికిత్స చేయడానికి ఒక యాక్షన్ టీమ్‌ను సిద్ధం చేశారు. స్విమ్స్ దగ్గర కూడా పోలీస్ అవుట్ పోస్ట్ ఏర్పాటు చేయాలని.. అలాగే ఘాట్ రోడ్లలో ప్రమాదకరమైన అవ్వచారికోన, కపిలతీర్థం దగ్గర, మాల్వాడి గుండం దగ్గర రోలర్ పోస్టర్ బ్యారియర్ ఏర్పాటు చేయాలని నిర్ణయించారు. ఘాట్ రోడ్లలో ప్రమాదాలు జరిగే ప్రాంతాల్లో ఫోకస్ పెట్టాలని.. తగిన జాగ్రత్తలు తీసుకోవాలని సూచనలు చేశారు. ఘాట్ రోడ్లలో ప్రమాదాలకు గురయ్యే వాహనాలను గుర్తించి రాకపోకలను నిషేధించాలని.. ఘాట్ రోడ్లలో నిఘా కోసం టీటీడీ సెక్యూరిటీ పోస్టులను ఏర్పాటు చేయాలని నిర్ణయం తీసుకున్నారు. ఇలా ఘాట్ రోడ్లలో ప్రమాదాలను నివారించేందుకు టీటీడీ ముందస్తుగా భద్రతాపరమైన చర్యలు తీసుకుంటోంది.