హవాయి అడవుల్లో చెలరేగిన మంటలు,,అగ్నికి ఆహుతవుతోన్న పర్యాటక దీవి

అగ్నికీలలకు బలమైన గాలులు తోడవడం వల్ల మావీయ్ ద్వీపం అల్లకల్లోలంగా మారింది. దావానలం చుట్టుముట్టడంతో తమ ప్రాణాలను అరచేతిలోపెట్టుకుని ద్వీపంలో నుంచి జనం పడవల్లో బయటకు వచ్చేస్తున్నారు. కార్చిచ్చుతో ఇప్పటికే అక్కడ 36 మంది ప్రాణాలు కోల్పోగా.. చాలా మంది తీవ్రంగా గాయపడ్డారు. మంటలను అదుపుచేయడానికి అగ్నిమాపక సిబ్బంది, సైన్యం తీవ్రంగా ప్రయత్నిస్తోంది. మంటల్లో గాయపడినవారిని ఎయిర్ అంబులెన్స్‌ల ద్వారా హొనలూలోని ఆస్పత్రికి తరలించారు.

హవాయి దీవుల సమీపంలో మంగళవారం గంటకు 82 మైళ్ల వేగంతో గాలులు వీచాయని అధికారులు పేర్కొన్నారు. మావీయ్‌లో గంటకు 62 మైళ్ల వేగంతో గాలులు వీచినట్టు వెల్లడించారు. దీని కారణంగా వేలాది భవనాలు కాలిబూడిదవుతున్నాయి. భవనాలు కార్చిచ్చుకు చెట్లు తగలబడటం, విరిగిపోడం వల్ల విద్యుత్ సరఫరా పూర్తిగా దెబ్బతింది. దీంతో ద్వీపంలోని వేలాది కుటుంబాలు అంధకారంలో చిక్కుకున్నాయి. అత్యవసర పరిస్థితిని ప్రకటించిన ప్రభుత్వం.. రెస్క్యూ, తరలింపు ఆపరేషన్ వేగవంతం చేసింది.

కార్చిచ్చును అదుపులోకి తెచ్చేందుకు అన్ని విధాల కృషి చేస్తామని అధికారులు వెల్లడించారు. ఇప్పటికే ఎమర్జెన్సీ రెస్పాన్స్ బృందాలు.. సహాయక చర్యలు చేపడుతున్నాయి. సహాయక చర్యల్లోని ఆర్మీ, నేవీ కూడా రంగంలోకి దిగాలని అమెరికా అధ్యక్షుడు జో బైడెన్ ఆదేశించారు.

తన భార్య, ఆరేళ్ల కుమారుడితో కలిసి మంగళవారం సహాయక శిబిరానికి వెళ్లిన కమ్యూలా కవాకోలా అనే వ్యక్తి మాట్లాడుతూ.. మేము దానిని సమయానికి సరిదిద్దలేకపోయాం అని అన్నారు. ‘అక్కడ కూర్చోవడం చాలా కష్టంగా ఉంది.. మా పట్టణం బూడిదగా మారింది.. ఏమీ చేయలేని నిస్సహాయ స్థితిలో ఉండిపోయాం’ అని ఆవేదన వ్యక్తం చేశాడు. మావీయ్ ద్వీపంలో ఐదు సహాయక శిబిరాలను ఏర్పాటుచేయగా.. అవన్నీ బాధితులతో పూర్తిగా నిండిపోయాయి. ప్రముఖ పర్యాటక కేంద్రమైన ఈ దీవి ప్రస్తుతం బోసిపోతోంది.

ఇది సురక్షిత ప్రాంతం కాదని హవాయి లెఫ్టినెంట్ గవర్నర్ సిల్వియా ల్యూక్ అన్నారు. రిసార్ట్ నగరం లాహైనా, ద్వీపంలోని ప్రధాన పర్యాటక ప్రదేశం. అగ్నిప్రమాదంతో నాశనమైంది. అనేక ప్రాంతాలు కాలిపోయినట్లు ఫోటోలు చూపిస్తున్నాయి. ‘ఇప్పటివరకు చూడని ఘోరమైన విపత్తును మేం ఎదుర్కొన్నాం... లహైనా మొత్తం కాలిపోయింది. ఇది ఒక ప్రపంచ అంతం లాంటింది’ అని మాసస్ జర్వీ అనే స్థానికుడు చెప్పారు. మంటల నుంచి తన పెంపుడు శునకాన్ని రక్షించే క్రమంలో అతడికి గాయాలైనట్టు వెల్లడించాడు.