మిస్ ఇండోనేషియా పోటీల్లో లైంగిక వేధింపులు,,,గదిలో బాడీ చెకప్ పేరుతో వేధించినట్టు ఫిర్యాదు

లైంగిక వేధింపుల ఆరోపణల నేపథ్యంలో ఇండోనేషియా ఫ్రాంచైజీతో తమ ఒప్పందాన్ని రద్దుచేసుకున్నట్టు మిస్ యూనివర్స్ ఆర్గనైజేషన్ ప్రకటించింది. కంటెస్టెంట్స్ వరుస లైంగిక వేధింపుల ఆరోపణలతో ఈ నిర్ణయం తీసుకున్నట్టు ట్విట్టర్‌లో విడుదల చేసిన అధికారిక ప్రకటనలో పేర్కొంది. జకార్తాలో మిస్ ఇండోనేషియా పోటీలు ముగిసిన కొద్ది రోజులకే ఈ పరిణామం చోటుచేసుకోవడం గమనార్హం. నాలుగు రోజుల కిందట జరిగిన పోటీల్లో ఫ్యాబియెన్ నికోల్ గ్రోనెవెల్డ్ విజేతగా నిలిచింది.

మిస్ ఇండోనేషియా సంస్థ తమ విలువలు, ప్రమాణాలు, నైతికతకు అనుగుణంగా లేదని వ్యాఖ్యానించింది. మిస్ ఇండోనేషియా యూనివర్స్ పోటీల్లో పాల్గొన్న ఆరుగురు యువతులు.. తమపై నిర్వాహకులు లైంగిక వేధింపులకు పాల్పడ్డారని ఆరోపిస్తూ పోలీసులకు ఫిర్యాదు చేశారు. పోటీ సమయంలో తాము టాప్‌లెస్ ‘బాడీ చెక్’లకు గురయ్యామని ఆరోపించారు. రాజధాని జకార్తాలో జులై 29 నుంచి ఆగస్టు 3 వరకు మిస్ ఇండోనేషియా యూనివర్స్ అందాల పోటీలు నిర్వహించారు. ఈ సమయంలో పురుషులతో సహా 20 మంది కంటే ఎక్కువ మంది ఉన్న గదిలో భౌతిక తనిఖీల పేరుతో తమ లోదుస్తులను విప్పదీయాలని నిర్వాహకులు కోరారని ఆరోపించారు. టాప్ లెస్‌గా తమను ఫోటోలు తీశారని వాపోయారు.

దీనిపై కేసు నమోదుచేసిన పోలీసులు దర్యాప్తు చేపట్టారు. మరోవైపు, ఈ అంశాన్ని అమెరికాకు చెందిన మిస్ యూనివర్స్ నిర్వాహకులు కూడా తీవ్రంగా పరిగణించారు. ఇండోనేషియా మిస్ యూనివర్స్ ఫ్రాంచైజీని రద్దు చేస్తున్నట్టు ప్రకటించారు. అంతే కాదు, ఇండోనేషియా ఫ్రాంచైజీ లైసెన్స్ కలిగి ఉన్న కారణంగా మిస్ యూనివర్స్ మలేషియా కూడా రద్దవుతుందని పేర్కొన్నారు.

అందాల పోటీల్లో శారీరక, మానసిక హింసను ఎట్టి పరిస్థితులను అంగీకరించబోమని స్పష్టం చేసిన నిర్వాహకులు.. ఇండోనేషియా ఆర్గనైజర్స్‌తో సంబంధాలు తెంచుకుంటున్నట్టుగా తేల్చి చెప్పారు. ఈ మేరకు పీటీ కాపెల్లా స్వస్తిక్ నేషనల్ డైరెక్టర్ పాపీ కాపెల్లా ఇన్‌స్టాగ్రామ్‌లో వేదికగా ప్రకటన చేశారు. లైంగిక వేధింపులకు తాను పూర్తి వ్యతిరేకినని, ఇటువంటి పనులకు తప్పకుండా అభ్యంతరం చెబుతానని వ్యాఖ్యానించారు. ఈ ఏడాది చివర్లో ఎల్ సాల్వడార్‌లో జరిగే మిస్ యూనివర్స్ 2023 పోటీలకు ఇండోనేషియా నుంచి పాల్గొనేవారి ఎంపిక చేయడానికి జకార్తాలో పోటీలు నిర్వహించారు. 1952 నుంచి మిస్ యూనివర్స్ ఆర్గనైజేషన్ ఆధ్వర్యంలో అందాలు పోటీలు జరుగుతున్నాయి. అయితే, మిస్ ఇండోనేషియా నిర్వాహకులు పోటీలో విజేతగా నిలిచిన తర్వాత కనీస ఎత్తు నిబంధన చేర్చడంతో పాటు మార్గదర్శకాలలో మార్పులతో గతంలోనే విమర్శలను ఎదుర్కొంది.

వివాదం తర్వాత భవిష్యత్తులో ఇలాంటి సంఘటనలు జరగకుండా ఉండటానికి విధి విధానాలను పరిశీలిస్తున్నట్టు మిస్ యూనివర్స్ ఆర్గనైజేషన్ తెలిపింది. ప్రపంచవ్యాప్తంగా తమ పోటీల్లో పాల్గొనేందుకు ఎలాంటి శారీరక కొలతలు అవసరం లేదని నిర్వాహకులు స్పష్టం చేశారు.