వరుసగా రెండో ఏడాది 8వ తరగతి విద్యార్థులకు ఉచితంగా ట్యాబ్‌లు పంపిణీ

8వ తరగతి విద్యార్థులకు ఏపీ ప్రభుత్వం గుడ్‌న్యూస్ తెలిపింది. ప్రభుత్వ పాఠశాల్లో చదువుతున్న ఎనిమిదో తరగతి విద్యార్థులందరికీ త్వరలో ట్యాబ్‌లు ఇవ్వనుంది. గత ఏడాది 8వ తరగతి విద్యార్థులకు ప్రభుత్వం ట్యాబ్‌లు అందించింది. అయితే ఈ ఏడాది కొత్తగా 8వ తరగతిలోకి అడుగుపెట్టిన విద్యార్థులందరికీ కూడా ట్యాబ్‌లు పంపిణీ చేయాలని నిర్ణయించింది. వరుసగా రెండో ఏడాది ఉచితంగా ట్యాబ్‌లు ఇచ్చేందుకు రంగం సిద్దమవుతోంది.

ఐదు లక్షల ట్యాబ్‌లను కొనుగోలు చేసేందుకు ఏపీ ప్రభుత్వం ఈ-టెండర్లను ఆహ్వానిస్తోంది. ట్యాబ్‌ల కొనుగోలు కోసం ఏకంగా రూ.750 కోట్లు ఖర్చు చేయనుంది. గత ఏడాది బేజూస్ ప్రీలోడెడ్ కంటెంట్‌తో కూడిన ట్యాబ్‌లను 8వ తరగతి విద్యార్థులకు పంపిణీ చేశారు. పదో తరగతి వరకు విద్యార్థులు ఈ ట్యాబ్‌ల ద్వారా ఆఫ్‌లైన్‌లో వీడియో పాఠాలను వినవచ్చు. ట్యాబ్‌కు ఒకసారి ఫుల్ ఛార్జింగ్ చేస్తే 10 గంటలపాటు బ్యాటరీ బ్యాకప్ ఉంటుంది. ట్యాబ్‌లను విద్యార్థులు అందుకున్న తర్వాత అందులో ఏదైనా సాంకేతిక సమస్య తలెత్తితే సరఫరా చేసిన సంస్థనే బాధ్యత తీసుకోవాల్సి ఉంటుంది. ఏడు రోజుల్లోగా రిపేర్ చేసి విద్యార్థులకు తిరిగి ఇవ్వాలి.

అలాగే ట్యాబ్ పంపిణీ చేసిన తర్వాత 30 రోజుల్లో ఏవైనా లోపాలు వచ్చి పనిచేయకపోతే కొత్త ట్యాబ్ ఇచ్చే విధంగా ప్రభుత్వం రూల్స్ పెట్టింది. ఈ ట్యాబ్‌లు 8.7 అంగుళాల టచ్ స్క్రీన్, 3జీబీ ర్యామ్, 32జీబీ రోమ్ కలిగి ఉంటాయి. విద్యార్థులు అనవసరమైన వెబ్‌సైట్లు ఓపెన్ చేయకుండా లాకింగ్ సిస్టమ్ ఏర్పాటు చేశారు. దీంతో పాఠ్యాంశాలకు సంబంధించిన వెబ్‌సైట్లు మాత్రమే ఓపెన్ అవుతాయి. బైజూస్ యాప్ ఆఫ్‌లైన్‌లో ఓపెన్ అయ్యేలా రూపొందించారు. దీంతో ఇంటర్నెట్ అవసరం లేకుండా వీడియో క్లాసులను వినవచ్చు.

ట్యాబ్‌లలో ఏవైనా లోపాలు ఉంటే గ్రామ, వార్డు సచివాలయాల్లో విద్యార్థులు ఫిర్యాదు చేయాల్సి ఉంటుందని టెండర్ డాక్యుమెంట్‌లో ప్రభుత్వం తెలిపింది. ట్యాబ్‌లన్నీ నాణ్యత ప్రమాణాల మేరకు ఉండాలని, లేకపోతే సరఫరా చేసిన సంస్థను బ్లాక్‌లిస్ట్‌లో పెడతామని ప్రభుత్వం హెచ్చరించింది.