కస్టమర్లలా ఇద్దరు షాపులోకి వచ్చి డ్రామాలు,,,సేల్స్ గర్ల్ కళ్ల ముందే అంతా జరిగిపోయింది
Andhra Pradesh Telugu | Suryaa Desk | Published : Wed, Aug 23, 2023, 07:24 PM
చూస్తే పెద్దాయనలా ఉన్నాడు.. వస్తువులు కొనడానికి షాపుకొచ్చాడులే అనుకుంది పాపం ఆ అమాయకపు సేల్స్ గర్ల్. కానీ ఆమెకు తెలీదు మాయ చేసి.. తన కళ్లుగప్పి డబ్బులు కాజేస్తారని.. ఈ ఘటన డాక్టర్ అంబేద్కర్ కోనసీమ జిల్లా అమలాపురంలో జరిగింది. అమలాపురంలోని ఓ పెయింట్స్ షాపులో మంగళవారం మధ్యాహ్నం ఒకటిన్నర సమయంలో యజమాని లంచ్ చేయడానికి వెళ్లాడు. తాను వచ్చేంత వరకు షాపుని జాగ్రత్తగా చూసుకోమని అక్కడే పనిచేస్తున్న అమ్మాయికి అప్పజెప్పి ఇంటికెళ్లాడు.
కొద్దిసేపటి తర్వాత ఇద్దరు వ్యక్తులు షాపులోకి కస్టమర్స్లాగా ఎంట్రీ ఇచ్చారు. గెటప్ చూస్తే ఇద్దరు హుందాగా ఉన్నారు. అందులో పెద్దాయన అయితే మరి నమ్మకస్తుడులా కనిపించాడు.. ఇంతలో ఆ పెద్దాయనతో వచ్చిన యువకుడు ఓ పెయింట్ డబ్బా కొని.. ఐదు వందల రూపాయలు చేతిలో పెట్టాడు. అనంతరం చిల్లర కావాలని అడిగాడు.. ఆమె మిగతా చిల్లర అందిస్తుండగా.. నోట్లు బాలేవని వేరే నోట్లు కావాలని డ్రామా ఆడారు. ఏ నోట్లు చూపించినా.. అవి వద్దు వేరే కావాలని చెబుతూ.. వాళ్లే క్యాష్ కౌంటర్లో చేతులు పెట్టి ఆ అమ్మాయిని కన్ఫ్యూజ్ చేశారు.
ఆ ముచ్చట ఈ ముచ్చట చెబుతూ ఆమెను మాయ చేశారు. కళ్లు మూసి తెరిచే లోపే.. పదివేల రూపాయలు కాజేశారు. అప్పటికీ ఆ అమాయకపు అమ్మాయికి అర్థం కాలేదు. ఆ తర్వాత మిగతా చిల్లర కూడా తీసుకుని దర్జాగా షాపు నుంచి బయటికి వెళ్లారు. క్యాష్ కౌంటర్లో లెక్క చూసుకున్న యజమాని తలపట్టుకున్నాడు. ఏం జరిందని ఆరా తీయగా.. సీసీటీవీ ఫుటేజీ చూసి కంగుతిన్నాడు. ఈ ఘటనపై పోలీసులకు ఫిర్యాదు చేశాడు. కేసు దర్యాప్తు జరుగుతోంది.
|
|