ఇండియా పేరు మార్పుపై చర్చ,,,పవన్ కళ్యాణ్ పాత వీడియో వైరల్

ఇండియా పేరును కేంద్ర ప్రభుత్వం ‘భారత్‌’ (Bharat)గా మార్చబోతోందనే వార్తలు వ్యాప్తి చెందుతున్నాయి. ఈ అంశంపై దేశవ్యాప్తంగా సామాన్యుల నుంచి సెలబ్రిటీలవ వరకు పలువురు తమ అభిప్రాయాలను వ్యక్తం చేస్తున్నారు. ఈ క్రమంలో జనసేన అధ్యక్షుడు పవన్ కళ్యాణ్‌కు సంబంధించిన ఓ వీడియో వైరల్ అవుతోంది. మన దేశం పేరును ఇండియా కాకుండా భారత్ అని మార్చాలని పవన్ కళ్యాణ్ నాలుగేళ్ల కిందటే డిమాండ్ చేశారు. పవన్ అభిమానులు ఇప్పుడు ఆ వీడియోను వైరల్ చేస్తున్నారు.

‘ఇండియా అనేది అరువు తెచ్చుకున్న పేరు. అది బ్రిటిష్ వారు పెట్టిన పేరు. భారతదేశం అనేది మనది. ఇదే అసలు పేరు’ అని పవన్ కళ్యాణ్ అన్నారు. 2019లో మెగాస్టార్ చిరంజీవి నటించిన సైరా నర్సింహారెడ్డి సినిమా ప్రి-రిలీజ్ కార్యక్రమంలో పవన్ కళ్యాణ్ ఈ వ్యాఖ్యలు చేశారు. ఇండియా, భారత్ మధ్య తేడా ఏంటో పవన్ కళ్యాణ్ నాలుగేళ్ల కిందటే చెప్పారని, నిజమైన నాయకుడని ఆయన ఫ్యాన్స్ కామెంట్లు చేస్తున్నారు.

సైరా నరసింహారెడ్డి సినిమా 2019 అక్టోబరు 2న విడుదలైంది. 2020 జూన్‌లోనూ పవన్ కళ్యాణ్ మరోసారి ఈ అంశాన్ని ప్రస్తావించారు. ‘భారత్ మాతాకీ జై’ అంటూ నినదించారు. ఇందుకు సంబంధించిన దృశ్యాలు వైరల్ అవుతున్నాయి. జీ-20 సమావేశాల సందర్భంగా నేతలకు విందు కోసం పంపించిన ఆహ్వాన లేఖల్లో "President of India" బదులుగా "President of Bharat" అని పేర్కొన్నారు. రాష్ట్రపతి భవన్‌ నుంచి ఈ ఆహ్వాన లేఖలు రావడంతో దేశవ్యాప్తంగా చర్చ మొదలైంది. ఇండియా పేరును ‘భారత్‌’గా మార్చే యోచనలో కేంద్రంలోని నరేంద్ర మోదీ సర్కార్ ఉందన్న వార్తలు జోరందుకున్నాయి. సెప్టెంబర్ 18 నుంచి 22 వరకు పార్లమెంటు ప్రత్యేక సమావేశాలు నిర్వహించనుంది. ఈ సమావేశాల్లోనే ఇండియా పేరును భారత్‌గా మార్చేందుకు బిల్లు ప్రవేశపెడతారని ప్రచారం జరుగుతోంది.

ఈ వ్యవహారంపై విపక్ష నేతలు తీవ్ర స్థాయిలో విమర్శలు చేస్తున్నారు. విపక్ష కూటమి I.N.D.I.A. నుంచి మరొకటిగా మార్చుకుంటే.. అప్పుడు దేశం పేరు మళ్లీ మారుస్తారా అని ఢిల్లీ ముఖ్యమంత్రి అరవింద్ కేజ్రీవాల్ ప్రశ్నించారు. ఈ అంశంపై తీవ్ర దుమారం రేగుతున్న వేళ.. బాలీవుడ్ మెగాస్టార్ అమితాబ్ బచ్చన్ ‘భారత్ మాతా కీ జై’ అని ట్వీట్ చేశారు. ఇది వైరల్‌గా మారింది. టీమిండియా జెర్సీలపై ఇండియాకు బదులు ‘భారత్’ అని ముద్రించాలని మాజీ క్రికెటర్ వీరేంద్ర సెహ్వాగ్ కోరారు.