ఇండియా కూటమిని చూసి మోదీ భయపడుతున్నారు.. అందుకే పేరు మార్పు

దేశంలో సార్వత్రిక ఎన్నికల శంఖారావం మోగినట్లే కనిపిస్తోంది. 2024 ఎన్నికలకు ఇంకా చాలా సమయం ఉన్నా అధికార విపక్షాల మధ్య మాత్రం ఇప్పటికే సమరం తీవ్ర రూపం దాల్చుతోంది. ఈ క్రమంలోనే ఇండియా కూటమి, ఎన్డీఏ కూటమి మధ్య మరో ఘర్షణ నెలకొంది. ఇటీవల ఇండియా కూటమికి చెందిన డీఎంకే పార్టీ నేత, తమిళనాడు సీఎం కుమారుడు, ఆ రాష్ట్ర మంత్రి ఉదయనిధి స్టాలిన్.. సనాతన ధర్మాన్ని ఉద్దేశించి చేసిన వ్యాఖ్యలు తీవ్ర వివాదాస్పదం కాగా.. తాజాగా దేశం పేరును ఇండియా నుంచి భారత్‌గా మార్చేందుకు కేంద్ర ప్రభుత్వం ప్రయత్నాలు చేస్తోందన్న వార్తలు.. మరోసారి రాజకీయ దుమారానికి కారణం అయ్యాయి. జీ 20 శిఖరాగ్ర సదస్సు సందర్భంగా జీ 20 దేశాధినేతలకు రాష్ట్రపతి భవన్ అందించిన ఆహ్వాన లేఖలు తాజా వివాదానికి తెర లేపాయి. అందులో ప్రెసిడెంట్ ఆఫ్ ఇండియా స్థానంలో ప్రెసిడెంట్ ఆఫ్ భారత్ అని ఉండటంతో కేంద్ర ప్రభుత్వం ఇండియా పేరును భారత్ అని మార్చేందుకు ప్రయత్నిస్తోందనే వార్తలు, ఊహాగానాలు వెల్లువెత్తాయి. ఈ క్రమంలోనే మోదీ సర్కార్‌పై ఇండియా కూటమి నేతలు తీవ్ర విమర్శలకు దిగాయి.

విపక్షాలన్నీ కలిసి వచ్చే ఎన్నికల్లో ఎన్డీఏ కూటమిని గద్దె దించేందుకు ప్రయత్నిస్తున్న నేపథ్యంలో ఆ విపక్ష కూటమికి ఉన్న ఇండియా పేరు దేశ పేరు ఒకటిగా ఉండకూడదనే ఉద్దేశంతోనే ప్రధాని మోదీ ఈ నిర్ణయం తీసుకున్నారని నేతలు మండిపడ్డారు. అందుకే తమ కూటమికి ఇండియా అని పేరు పెట్టుకుంటే మొత్తం దేశం పేరునే ఇండియా నుంచి భారత్ అని మార్చుతున్నారని తీవ్ర స్థాయిలో విమర్శలు గుప్పించారు. ఇండియా పేరును ఆంగ్లంలో కూడా భారత్‌గా మార్చాలని కేంద్ర ప్రభుత్వం యోచిస్తున్నట్టు వస్తున్న వార్తలపై ప్రతిపక్షాలకు చెందిన నేతలు తాజాగా స్పందించారు. ఇంత ఆగమేఘాల మీద హడావుడిగా దేశం పేరును మార్చాల్సిన అవసరం ఏమొచ్చిందని పలువురు నేతలు ప్రశ్నిస్తున్నారు.

విపక్ష కూటమికి ఇండియా అనే పేరును పెట్టడంతో బీజేపీ సతమతం అవుతోందని ఆమ్ ఆద్మీ పార్టీ జాతీయ కన్వీనర్‌, ఢిల్లీ సీఎం అర్వింద్‌ కేజ్రీవాల్‌ పేర్కొన్నారు. ఇప్పుడు ఇండియా కూటమి పేరును భారత్‌ అని పెట్టుకుంటే.. దేశం పేరును కూడా మార్చేస్తారా అని ప్రశ్నించారు. అయితే పేరు మార్పుపై అధికారిక సమాచారం లేకున్నా అనేక వార్తలు వినిపిస్తున్నాయన్నారు. 2024 ఎన్నికల్లో ఓడిపోతామనే భయం ప్రధాని నరేంద్ర మోదీకి పట్టుకుందని.. అందుకే జమిలి ఎన్నికల ప్రతిపాదనతో ప్రజల దృష్టిని మళ్లించేందుకు ప్రయత్నాలు చేస్తున్నారని విమర్శలు గుప్పించారు.

కేంద్రంలో అధికారంలో ఉన్న ఎన్డీఏ సర్కార్‌ను గద్దె దించేందుకు ప్రతిపక్ష పార్టీలన్నీ ఒకే తాటిపైకి వచ్చి కూటమిని ఏర్పాటు చేయడంతో బీజేపీ భయపడుతోందని తమిళనాడు సీఎం ఎంకే స్టాలిన్ మండిపడ్డారు. నియంతగా వ్యవహరిస్తున్న బీజేపీ సర్కార్‌ను గద్దె దించేందుకు విపక్షాల కూటమికి ఇండియా అనే పేరు పెట్టినందుకే దేశం పేరును భారత్‌ అని మార్చాలనుకుంటున్నారని ఆరోపించారు. దేశంలో మార్పు తీసుకొచ్చి అభివృద్ధి చేస్తామని అధికారంలోకి వచ్చిన బీజేపీ.. 9 ఏళ్లుగా అవేమీ చేయకుండా భారత్‌ అనే పేరునే మార్చాలనుకుంటోందని ఎద్దేవా చేశారు. విపక్షాల ఐక్యతలో ఉన్న బలాన్ని గుర్తించిన బీజేపీలో ఇండియా అనే పదం కలవరం రేపుతోందని అందుకే పేరు మార్చాలని ప్రయత్నిస్తోందని మండిపడ్డారు. ఇండియా.. బీజేపీకి అధికారాన్ని దూరం చేస్తుందని ఎంకే స్టాలిన్‌ ట్వీట్‌ చేశారు.

దేశం పేరు విషయంలో బీజేపీ, మోదీ సర్కార్ ఎందుకు అంత కంగారుపడుతోందో అర్థం కావట్లేదని ఎన్సీపీ అధినేత శరద్ పవార్ వ్యాఖ్యానించారు. రాజ్యాంగంలో ఇండియా పేరును మారుస్తారా అనేదానిపై ఇప్పటి వరకు ఎలాంటి సమాచారం లేదని తెలిపారు. అయితే ఈ విషయంపై విపక్ష కూటమి సమావేశంలో చర్చిస్తామని వెల్లడించారు. అయితే దేశం పేరు మార్చే అధికారం ఎవరికీ లేదని ఈ సందర్భంగా శరద్‌ పవార్‌ వెల్లడించారు.

దేశం పేరును ఇండియా నుంచి భారత్ అని మారుస్తున్నారన్న వార్తలు వస్తున్నట్లు తృణముల్ కాంగ్రెస్ పార్టీ అధినేత్రి, పశ్చిమ బెంగాల్ సీఎం మమతా బెనర్జీ తెలిపారు. ప్రెసిడెంట్‌ ఆఫ్‌ భారత్‌ పేరుతో జీ 20 దేశాధినేతల విందుకు ఆహ్వానాలు పంపారని.. పేర్కొన్నారు. మన దేశాన్ని భారత్‌ అని పిలుస్తాం కదా ఇందులో కొత్తేముంది.. ఇంగ్లీష్‌లో ఇండియా అని కూడా పిలుస్తామని తెలిపారు. ప్రపంచమంతా మన దేశం పేరు ఇండియా అనే తెలుసని.. ఇప్పటికిప్పుడు అకస్మాత్తుగా దేశం పేరును మార్చాల్సిన అవసరం ఏమొచ్చిందని ప్రశ్నించారు. దేశ చరిత్రను బీజేపీ తిరగరాయాలని చూస్తోందని మమతా బెనర్జీ తీవ్ర అసహనం వ్యక్తం చేశారు.

భారత దేశంలోని ప్రాథమిక సూత్రం అయిన భిన్నత్వంలో ఏకత్వం అంటే బీజేపీకి నచ్చడం లేదని జమ్ముకశ్మీర్ మాజీ సీఎం, పీడీపీ చీఫ్ మెహబూబా ముఫ్తీ మండిపడ్డారు. ఇంగ్లీష్‌లో ఉన్న ఇండియా పేరును ‘భారత్‌’ అని మార్చాలనుకోవడం బీజేపీకి ఉన్న అసహనాన్ని వ్యక్తం పరుస్తోంది. స్వతంత్ర భారతంలో తొలిసారి భారీ మెజార్టీ ఉన్న ఓ పార్టీ యావత్ దేశాన్ని తమ నియంత రాజ్యంగా భావిస్తోందని.. మెహబూబా ముఫ్తీ తీవ్ర వ్యాఖ్యలు చేశారు.

దేశం పేరు మార్పుకు సంబంధించిన వార్తలపై కర్ణాటక సీఎం సిద్ధరామయ్య కూడా స్పందించారు. ఇండియా అనే పేరును మన దేశం మొత్తం ఆమోదించిందని సిద్ధరామయ్య గుర్తు చేశారు. ఇప్పుడు ఇండియా అనే పేరును కొత్తగా భారత్‌ అని మార్చాల్సిన అవసరం లేదని వ్యాఖ్యానించారు. రాజ్యాంగంలోనే ఇండియా అంటే భారత్‌ అని ఉందని సిద్ధరామయ్య వెల్లడించారు.