కూటమి పేరు భారత్ అని మారిస్తే మళ్లీ మార్చేస్తారా,,కేజ్రీవాల్ ప్రశ్న

ఇండియా పేరును ఇంగ్లీష్‌ భాషలోనూ భారత్‌గా మార్చాలని కేంద్రం నిర్ణయం తీసుకుందని.. రాబోయే ప్రత్యేక పార్లమెంటు సమావేశాల్లో దీనికి సంబంధించి బిల్లును తీసుకురానున్నారని వస్తున్న వార్తల నేపథ్యంలో ప్రతిపక్షాలు తీవ్ర విమర్శలు గుప్పిస్తున్నాయి. జీ 20 శిఖరాగ్ర సమావేశాల్లో భాగంగా జీ 20 దేశాధినేతలకు ఇచ్చే విందుకు సంబంధించిన ఆహ్వాన పత్రికల్లో ప్రెసిడెంట్ ఆఫ్ ఇండియా స్థానంలో ప్రెసిడెంట్ ఆఫ్ భారత్ అని ప్రచురించడంపై తాజాగా సరికొత్త వివాదం మొదలైంది. ఈ క్రమంలోనే విపక్ష కూటమికి భయపడే మోదీ సర్కార్ ఇలాంటి చర్యలకు దిగుతోందని ప్రతిపక్ష పార్టీలు తీవ్ర స్థాయిలో విమర్శలు గుప్పిస్తున్నాయి.

ఈ క్రమంలోనే తాజాగా ఢిల్లీ సీఎం, ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్.. దేశం పేరును ఇండియా నుంచి భారత్ అని మారుస్తున్నట్లు వస్తున్న వార్తలపై స్పందించారు. విపక్షాలన్నీ కలిసి ఏర్పడిన కూటమికి ఇండియా అని పేరును పెట్టుకుంటే ప్రధాని నరేంద్ర మోదీ భయపడ్డారని అన్నారు. ఈ క్రమంలోనే దేశం పేరును ఇండియా కాకుండా భారత్ అని మార్చేందుకు ప్రయత్నాలు చేస్తున్నట్లు అరవింద్ కేజ్రీవాల్ ఆరోపించారు. ఈ క్రమంలోనే ఆయన సరికొత్త అంశాన్ని తెరపైకి తీసుకువచ్చారు. ఒక వేళ.. విపక్ష కూటమి పేరును ఇండియా నుంచి భారత్ అని మార్చితే అప్పుడు బీజేపీ ఏం చేస్తుందని ప్రశ్నించారు.

విపక్ష కూటమి పేరును ఇండియా అని పెట్టుకోవడంతో బీజేపీ ఆందోళనలో ఉందని అరవింద్ కేజ్రీవాల్ పేర్కొన్నారు. అయితే ప్రస్తుతం ఇండియా పేరును భారత్ అని మార్చడంపై ఎలాంటి అధికారిక సమాచారం బయటికి రాలేదని.. కానీ అనేక ఊహాగానాలు, వార్తలు వినిపిస్తున్నాయని పేర్కొన్నారు. దేశంలో ఇదంతా ఎందుకు జరుగుతోందని ప్రశ్నించిన కేజ్రీవాల్.. దేశంలో బీజేపీని వ్యతిరేకించే కొన్ని పార్టీలు అన్నీ ఏకతాటిపైకి వచ్చి ఇండియా కూటమిగా ఏర్పడటం వల్లేగా అని తెలిపారు. ఒకవేళ ఇండియా కూటమి తన పేరును భారత్ అని మారిస్తే.. అప్పుడు భారత్‌ పేరును కూడా మారుస్తారా అని నిలదీశారు. ఇది ద్రోహమని మండిపడ్డారు. విపక్ష కూటమి వల్ల బీజేపీలో ఏదో తెలియని కలవరం నెలకొందని.. అందుకే ఒకే దేశం ఒకే ఎన్నిక ప్రతిపాదనతో ప్రజల దృష్టిని మళ్లించేందుకు మోదీ సర్కార్ తీవ్ర ప్రయత్నాలు చేస్తోందని విమర్శలు గుప్పించారు. జీ 20 సమావేశాల సందర్భంగా నేతలకు విందు కోసం ప్రెసిడెంట్ ఆఫ్ ఇండియాకు బదులుగా ప్రెసిడెంట్ ఆఫ్ భారత్ అనే పేరుతో రాష్ట్రపతి భవన్‌ ఆహ్వానం పంపడంపై దుమారం కొనసాగుతోంది.