జో బైడెన్ సతీమణి జిల్ బైడెన్‌కు పాజిటివ్,,,,జీ20 సదస్సుకు జో బైడెన్ వస్తారా
international | Suryaa Desk | Published : Tue, Sep 05, 2023, 07:40 PM
తాజాగా వివిధ దేశాల్లో మళ్లీ కొవిడ్ కేసులు పెరగడం తీవ్ర భయాందోళన కలిగిస్తున్నాయి. మరోసారి ప్రపంచాన్ని కొవిడ్ ముంచెత్తుతుందా అనే భయాలు కలుగుతున్నాయి. తాజాగా గత కొన్ని రోజులుగా అమెరికాలో కరోనా కేసులు పెరగడం తీవ్ర ఆందోళన కలిగిస్తోంది. తాజాగా అమెరికా ప్రథమ మహిళ, జో బైడెన్ భార్య జిల్ బైడెన్‌కు కొవిడ్ పాజిటివ్‌గా తేలింది. అయితే జో బైడెన్‌కు నిర్వహించిన పరీక్షల్లో మాత్రం నెగిటివ్‌ రిపోర్ట్ వచ్చింది. అయితే జిల్ బైడెన్‌కు కొవిడ్ సోకిన నేపథ్యంలో జో బైడెన్.. జీ 20 సదస్సుకు హాజరు అవుతారా లేదా అనేది ప్రస్తుతం ఉత్కంఠగా మారింది. కానీ బైడెన్ భారత పర్యటన రద్దు గురించి వైట్ హౌస్ ఎలాంటి ప్రకటన చేయకపోవడంతో.. ఆయన భారత్‌కు వచ్చే అవకాశాలే ఎక్కువగా ఉన్నాయని తెలుస్తోంది.
జిల్ బైడెన్ కొవిడ్ బారిన పడినట్లు అమెరికా అధ్యక్ష భవనం వైట్హౌస్ వెల్లడించింది. అయితే జిల్ బైడెన్‌కు స్వల్ప లక్షణాలే ఉన్నయని తెలిపింది. ప్రస్తుతం ఆమె డెలావెర్‌లోని నివాసంలో విశ్రాంతి తీసుకుంటున్నట్లు వైట్హౌస్ ఒక ప్రకటన విడుదల చేసింది. జిల్ బైడెన్‌కు కరోనా పాజిటివ్ రాగానే.. అధ్యక్షుడు జో బైడెన్ కూడా కొవిడ్ పరీక్షలు చేయించుకున్నారు. అయితే ఆయనకు వైరస్‌ నెగెటివ్‌గానే నిర్ధారణ అయినట్లు వైట్హౌస్ మీడియా కార్యదర్శి జీన్ పెర్రీ వెల్లడించారు. జో బైడెన్ ఆరోగ్య పరిస్థితి దృష్ట్యా ఆయనను నిరంతరం పరీక్షించి ఎప్పటికప్పుడు కొవిడ్ పరీక్షలు చేయనున్నట్లు డాక్టర్లు చెప్పారని జీన్ పెర్రీ తెలిపారు.
ఇది ఇలా ఉండగా.. గత శనివారం ఫ్లోరిడాలోని హరికేన్‌ ఐడాలియా ప్రభావిత ప్రాంతాల్లో జో బైడెన్, జిల్ బైడెన్ దంపతులు పర్యటించారు. అనంతరం వారు అక్కడి నుంచి డెలావెర్‌లోని బీచ్‌ హౌస్‌కు చేరుకున్నారు. ఆ తర్వాత బైడెన్ సోమవారం ఫిలడెల్ఫియాలోని ఓ కార్యక్రమానికి హాజరై తిరిగి వైట్‌హౌస్‌కు వెళ్లారు. కానీ జిల్ బైడెన్ మాత్రం డెలావెర్‌లోనే ఉండగా.. అక్కడే ఆమెకు స్వల్ప అనారోగ్యం తలెత్తింది. దీంతో ఆమెకు పరీక్షలు నిర్వహించగా.. కొవిడ్ పాజిటివ్ వచ్చినట్లు వైట్హౌస్ వర్గాలు వెల్లడించాయి. భారత్‌ అధ్యక్షతన ఢిల్లీలోని ప్రగతి మైదాన్‌లో సెప్టెంబరు 9, 10 తేదీల్లో జీ 20 దేశాధినేతల శిఖరాగ్ర సదస్సు జరగనుంది. ఈ సదస్సు కోసం జో బైడెన్ గురువారం భారత్‌కు బయల్దేరతారని ఇప్పటికే అమెరికా ప్రకటించగా.. తాజాగా జిల్ బైడెన్‌కు కరోనా సోకడంతో జో బైడెన్ ఢిల్లీ పర్యటనపై సందిగ్ధత నెలకొంది. అయితే పర్యటన రద్దు గురించి వైట్హౌస్ ఎలాంటి ప్రకటన చేయకపోవడంతో బైడెన్ ఢిల్లీకి రావడం ఖాయంగానే కనిపిస్తోంది.
ఇప్పటికే రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్‌పింగ్.. భారత్‌లో జరగనున్న జీ 20 దేశాధినేతల సదస్సుకు హాజరు కావడం లేదని అధికారికంగా ప్రకటించారు. వారి తరఫున ప్రతినిధులను పంపుతామని తెలిపారు. జీ 20 కూటమిలో అగ్రరాజ్యాలుగా ఉన్న అమెరికా, చైనా, రష్యా దేశాలకు చెందిన అధినేతలు జీ 20 దేశాధినేతల సదస్సుకు గైర్హాజరు కావడం తీవ్ర చర్చనీయాంశంగా మారింది.
|
|