చంద్రబాబు అరెస్టయిన రాత్రి నంద్యాలలో ఏం జరిగింది..? ,,ప్రెస్ మీట్‌లో కీలక వివరాలు వెల్లడించిన పేర్ని నాని

టీడీపీ అధినేత చంద్రబాబు నాయుడు అరెస్ట్ వ్యవహారంపై మాజీ మంత్రి పేర్ని నాని.. సోమవారం మీడియా సమావేశం ఏర్పాటు చేశారు. చంద్రబాబు అరెస్ట్ అయిన దగ్గర్నుంచి.. ఇప్పటి వరకూ జరిగిన పరిణామాలను ఆయన ఏకరువు పెట్టారు. టీడీపీ అధినేతను అరెస్ట్ చేసే సమయంలో సీఐడీ అధికారులు సంయమనం పాటించిన దగ్గర్నుంచి.. కోర్టు రిమాండ్‌‌కు ఆదేశించినంత వరకూ అధికారులు ఆయనతో ఎలా మసులుకున్నారో.. టీడీపీ అనుకూల మీడియా మాత్రం ఎలా గగ్గోలు పెట్టిందో.. ఆయన ప్రజలకు వివరించే ప్రయత్నం చేశారు.

నంద్యాలలో.. చంద్రబాబు నాయుడు నిద్రిస్తోన్న బస్సు తలుపును.. శనివారం తెల్లవారుజామున 3 గంటల సమయంలో.. డీఐజీ స్థాయి సీఐడీ అధికారి తట్టారని పేర్ని నాని తెలిపారు. లేవండి సార్ అని ఆ అధికారి పదే పదే బస్సు తలుపు కొట్టినా పట్టించుకోని చంద్రబాబు.. 5.30 గంటల సమయంలో మేకప్ వేసుకొని బస్సు దిగారని నాని చెప్పారు. బస్సు దిగాక ఆ అధికారిపై ఆగ్రహం వ్యక్తం చేశారని.. ఆయన ఎన్ని తిట్టినా సీఐడీ ఆఫీసర్ పల్లెత్తు మాట కూడా అనలేదని.. ఓపికగా సమాధానాలు చెప్పారని పేర్ని నాని తెలిపారు.

అరెస్ట్ విషయం చంద్రబాబు నాయుడికి ముందుగానే తెలిసిందన్న నాని.. అర్ధరాత్రి సమయంలో మీడియా సంస్థల కెమెరాలు నంద్యాలలో చంద్రబాబు బస్సు దగ్గర ఎందుకున్నాయని ప్రశ్నించారు. పేర్ని నాని ప్రెస్ మీట్ చూసిన వారికి కొన్ని అనుమానాలు రాకమానవు. రాష్ట్రానికి 14 ఏళ్లు ముఖ్యమంత్రిగా పని చేసిన వ్యక్తిని.. 73 ఏళ్ల వయసున్న వ్యక్తిని.. రాత్రి 3 గంటల సమయంలో ఎందుకు అరెస్ట్ చేయడానికి ప్రయత్నించారు..? చంద్రబాబును అంత రాత్రి వేళ పట్టుకోకపోతే సమాజానికి ఏదైనా హాని జరిగే అవకాశం ఉందా? నాని అన్నట్టుగానే ఆయనేం బందిపోటు కాదు కదా. చంద్రబాబును అరెస్ట్ చేసింది దేశద్రోహం, ఉగ్రవాదం లాంటి కేసుల్లో కాదు కదా..?

2019లో అధికారంలోకి వచ్చిన వైసీపీ ప్రభుత్వం.. స్కిల్ డెవలప్‌మెంట్ స్కామ్ జరిగిందని 2021లో ఎఫ్ఐఆర్ నమోదు చేసింది. నాలుగేళ్లపాటు ఎంతో శోధించి, అన్ని విషయాల్లోనూ లోతుగా పరిశీలించి, అవినీతి జరిగింది.. అందులో చంద్రబాబు ప్రమేయం ఉందని నిర్ధారించుకున్న తర్వాతే ఆయన్ను అరెస్ట్ చేయాలనే నిర్ణయానికి వచ్చి ఉంటారు. ఇంత ఓపిక పట్టిన వారికి మరో రెండున్నర గంటలు (తెల్లారేదాకా) వేచి చూద్దామనే ఆలోచన ఎందుకు రాలేదు..? డీఐజీ స్థాయి అధికారి సహా.. మిగతా అధికారులు, సిబ్బంది, మీడియా ప్రతినిధులకు ఆ రాత్రి నిద్రలేదన్నది సుస్పష్టం.

చంద్రబాబు నాయుణ్ని అరెస్ట్ చేశాక నంద్యాల నుంచి హెలికాప్టర్‌లో తీసుకెళ్తామని సీఐడీ అధికారులు చెప్పినా.. ఆయన తన కార్లోనే వస్తానన్నారని పేర్ని నాని చెప్పారు. బాబును అరెస్ట్ చేసిందే ప్రభుత్వ సొమ్మును పక్కదారి మళ్లించారనే అభియోగాలతో.. అలాంటి వ్యక్తిని ప్రభుత్వ ధనం మరింత ఖర్చు చేసి హెలికాప్టర్‌లో తీసుకు రావాల్సిన అవసరం ఏముంది..? నాని గారూ.. రూ.371 కోట్లు దోచేసిన నేరస్థుడికి ఈ మర్యాదలు దేనికి..?