మహిళకు చిక్కులు తెచ్చిపెట్టిన కరివేపాకు,,,,ఎయిర్‌పోర్టులో భారతీయ మహిళకు 200 డాలర్ల ఫైన్

సాధారణంగా ఇండియా నుంచి విదేశాలకు వెళ్లేవారు ఇక్కడి ఆహార పదార్థాలను తీసుకువెళ్తూ ఉంటారు. ఎక్కువగా పచ్చళ్లు, పిండి వంటలను తమతో పాటు విమానాల్లో వెంటబెట్టుకు వెళ్తారు. అయితే ఎలాంటి పదార్థాలు, వస్తువులు తీసుకువెళ్తున్నారు అనే విషయాలను ఎయిర్‌పోర్టులో మనం ఖచ్చితంగా చెప్పాల్సి ఉంటుంది. ఎందుకంటే కొన్ని దేశాల్లోకి కొన్ని వస్తువులను అనుమతించరు. ఒక వేళ చెప్పకుండా ఇతర వస్తువులు తీసుకెళ్లినా.. అనుమతి లేని వస్తువులు తనిఖీల్లో దొరికినా ఎయిర్‌పోర్టులో దిగిన తర్వాత దొరికితే భారీ జరిమానాలు విధిస్తూ ఉంటారు. అయితే తాజాగా ఓ మహిళ కరివేపాకు కారణంగా అవమానంతో పాటు ఫైన్ చెల్లించాల్సి వచ్చింది. న్యూజిలాండ్‌లోని ఓ ఎయిర్‌పోర్టులో ఒక భారత మహిళకు ఎదురైన ఘటనకు సంబంధించిన వీడియో ప్రస్తుతం సోషల్ మీడియాలో తెగ వైరల్‌గా మారింది.

ఓ మహిళ భారత్ నుంచి బయల్దేరి న్యూజిలాండ్ ఎయిర్‌పోర్టులో దిగింది. అక్కడ కస్టమ్స్ అధికారులు ఆమె వద్ద ఉన్న బ్యాగులను చెక్ చేశారు. అందులో కరివేపాకు, తరిగిన అల్లం ముక్కలు చూసి ఆమెను ఆపేశారు. వాటి గురించి ఆ మహిళను ఆరా తీశారు. అయితే పర్యావరణానికి అత్యధిక ప్రాధాన్యతను ఇచ్చే న్యూజిలాండ్‌లో చెట్లు, చెట్లకు సంబంధించిన ఆకులను తీసుకెళ్లాలంటే తప్పనిసరిగా డిక్లరేషన్‌లో వెల్లడించాల్సి ఉంటుంది. అయితే అలాంటి వస్తువులు ఏవైనా తీసుకువెళ్తున్నారా అని ఉన్న కాలమ్ వద్ద ఆ మహిళ నో అని టిక్ మార్క్ పెట్టింది. అయితే తనిఖీల్లో కరివేపాకు బయటపడటంతో ఆమె ఉద్దేశ పూర్వకంగా అబద్దం చెప్పిందని అక్కడి సెక్యూరిటీ అధికారులు భావించి.. భారీగా ఫైన్ విధించారు. ఆమె బ్యాగులో అల్లం, కరివేపాకు లభించడంతో ఇంకా ఏవైనా ఇలాంటి వస్తువులు ఉన్నాయా అని ఆమె వద్ద ఉన్న బ్యాగులన్నీ తీసి క్షుణ్ణంగా తనిఖీలు చేశారు.

కరివేపాకు, అల్లం లాంటి పదార్థాలు తీసుకువెళ్లడం వల్ల బయో సెక్యూరిటీ రిస్క్ ఎక్కువగా ఉంటుందని.. వాటి వల్ల విషపూరిత కీటకాలు, బ్యాక్టీరియా తమ దేశంలోకి ప్రవేశిస్తాయని న్యూజిలాండ్ ఎయిర్‌పోర్టు అధికారులు వెల్లడించారు. దీంతో ఆమె న్యూజిలాండ్ చట్టాలను ఉల్లంఘించారని బయో సెక్యూరిటీ యాక్ట్ కింద 200 డాలర్ల ఫైన్ వేశారు. అంటే భారత కరెన్సీలో రూ.10 వేల జరిమానా విధించారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. రూ. 5 కరివేపాకు, అల్లం తీసుకెళ్లడంతో పాటు ఆమె చేసిన చిన్న పొరపాటు వల్ల భారీ జరిమానాతోపాటు అవమానాల పాలైందని నెటిజన్లు మహిళ పట్ల సానుభూతి వ్యక్తం చేస్తున్నారు.