మూఢ నమ్మకానికి యువకుడు బలి,,,,ప్రార్థనా మందిరంలోనే ప్రాణం పోయింది

నెల్లూరు జిల్లాలో మూఢ నమ్మకానికి యువకుడు బలయ్యాడు. సంకెళ్లతో బంధించడంతో మానసికంగా కుంగిపోయాడు.. ఇంతలో ఏం జరిగిందో ఏమో ప్రాణాలు కోల్పోయాడు. చేజర్లకు చెందిన వినోద్‌ దేవాదాయశాఖలో తాత్కాలిక ఉద్యోగిగా పని చేస్తున్నారు. అలాగే కూలీ పనులకు కూడా వెళుతున్నారు. ఇటీవల అనారోగ్యంతో ఆస్పత్రికి వెళ్లి పరీక్షలు చేయించుకున్నారు. ప్రమాదం ఏమీలేదని జాగ్రత్తలు తీసుకుంటే సరిపోతుందని డాక్టర్లు సూచించారు. అయినా సరే వినోద్ ఇబ్బందిపడ్డాడు. దీంతో అతడు మానసికంగా ఆందోళనకు గురై రాత్రి వేళల్లో పెద్దగా కేకలు వేసేవారు.

వినోద్‌ను కుటుంబ సభ్యులు, బంధువులు ఒక ప్రార్థనా మందిరం దగ్గరకు తీసుకెళ్లారు. అతడ్ని మందిరంలోనే ఉంచమని నిర్వాహకులు సూచించారు. ప్రార్థనా మందిరం దగ్గర ఉన్న మానసిక చికిత్స కేంద్రం నిర్వాహకులకు రూ. ఐదు వేలు చెల్లించి వినోద్‌ని అక్కడే వదిలి వచ్చారు. సోమవారం రాత్రి వినోద్‌ను చూసేందుకు వెళ్లిన మేనమామ, బంధువులతో తనకు బాగా ఉందని.. సంకెళ్లు తీసేసి ఇంటికి తీసుకెళ్లాలని కోరారు. తనను బందీగా మార్చారని వినోద్‌ ఆందోళన వ్యక్తం చేశాడు. కానీ కుటుంబ సభ్యులు పట్టించుకోలేదు.

అక్కడే ఇంకొన్ని రోజులు ఉంటే ఆరోగ్యం మరింత మెరుగవుతుందన్న ఆశతో మేనమామ చేజర్లకు తిరిగి వచ్చారు. అయితే మంగళవారం తెల్లవారుజామున వినోద్‌ చనిపోయాడంటూ ప్రార్థనా మందిరం నుంచి సమాచారంతో ఆ కుటుంబం తీవ్ర విషాదంలో మునిగిపోయింది. దేవాదాయశాఖలో తాత్కాలిక ఉద్యోగిగా పని చేస్తున్న వినోద్‌ తండ్రి పక్షవాతంతో 20 ఏళ్లగా మంచంలోనే ఉన్నారు. వినోద్‌కి రెండేళ్ల క్రితం వివాహంకాగా.. ఏడాది వయసు ఉన్న కుమారుడు ఉన్నాడు. తల్లి కూలీ పనులకు వెళ్లి కుటుంబ పోషణ చేస్తున్నారు. వినోద్ దేవాదాయశాఖల తాత్కాలిక ఉద్యోగిగా పనిచేస్తున్నారు. అనారోగ్యంతో బాధపడుతున్న వినోద్‌ను ఆస్పత్రికి తీసుకెళ్లకుండా ఇలా సంకెళ్లు వేయడం.. ఆ తర్వాత చనిపోవడంతో మూఢ నమ్మకం కారణంగానే బలయ్యాడని స్థానికంగా చర్చించుకుంటున్నారు.