భారతీయ విస్కీకి అరుదైన గుర్తింపు.. ప్రపంచంలోనే అత్యుత్తమ విస్కీ అవార్డు

భారత్‌లో తయారైన ఇంద్రి విస్కీ ప్రపంచంలోనే అత్యంత బెస్ట్ విస్కీగా నిలిచింది. విస్కీస్ ఆఫ్ ది వరల్డ్ అవార్డ్స్‌లో ఇంద్రి దీపావళి కలెక్టర్స్ ఎడిషన్ 2023 వరల్డ్ బెస్ట్ విస్కీ అవార్డును సాధించింది. ఈ అవార్డుతో భారత విస్కీలకు ప్రపంచంలోనే అరుదైన గుర్తింపు లభించింది. ప్రపంచ దేశాల్లో ఉన్న టాప్ కంపెనీలు, టాప్ దేశాల్లోని వందలాది బ్రాండ్ల విస్కీలను తలదన్ని భారత్‌కు చెందిన ఇంద్రి విస్కీ ప్రపంచ గుర్తింపును దక్కించుకుంది. అయితే ఈ ఇంద్రీ విస్కీకి ఇలాంటి ప్రతిష్ఠాత్మకమైన అవార్డులు గతంలోనూ చాలా వచ్చినట్లు ఆ కంపెనీ వెల్లడించింది.

ప్రపంచంలోని వివిధ దేశాల్లో ఉన్న 100కు పైగా టాప్ విస్కీలు పోటీ పడిన ఈ కాంపిటీషన్‌లో ఇంద్రి దీపావళి కలెక్టర్స్ ఎడిషన్ 2023 కు డబుల్ గోల్డ్ బెస్ట్ ఇన్ షో అవార్డు దక్కింది. విస్కీస్ ఆఫ్ ది వరల్డ్ ఏటా ప్రపంచంలోని 100 కు పైగా వెరైటీల విస్కీలను ఉంచి అందులో ఉత్తమంగా ఉన్న విస్కీకి అవార్డును ప్రకటిస్తుంది. ఈ పోటీలో అమెరికన్ సింగిల్ మాల్ట్స్, స్కాచ్ విస్కీస్, బోర్బన్స్, కెనడియన్ విస్కీస్, ఆస్ట్రేలియన్ సింగిల్ మాల్ట్స్, బ్రిటీష్ సింగిల్ మాల్ట్స్ సహా వందకుపైగా ఇంటర్నేషనల్ బ్రాండ్స్ పాల్గొనగా అందులో భారతీయ సింగిల్ మాల్ట్ ఇంద్రి దీపావళి కలెక్టర్స్ ఎడిషన్ 2023 అత్యుత్తమమైనదిగా ఎంపికైంది.

ఈ ఇంద్రి విస్కీని పికాడిల్లీ డిస్టిలరీస్ అనే సంస్థ తయారు చేస్తుంది. అయితే ఈ ఇంటర్నేషనల్ అవార్డు రావడం పట్ల పికాడిల్లీ డిస్టిలరీస్ సంతోషం వ్యక్తం చేసింది. విస్కీ తయారీలో నాణ్యత, నిబద్ధత కారణంగానే ఈ అవార్డు వచ్చినట్లు తెలిపింది. ఈ సందర్భంగా ఇంద్రి దీపావళి కలెక్టర్స్ ఎడిషన్ 2023 తయారీకి సంబంధించి ఏమేం వాడతారు, వాటిని ఎక్కడి నుంచి తీసుకువస్తారు అనే విషయాలను వెల్లడించింది. రాజస్థాన్‌లో ఎంపిక చేసిన బార్లీ గింజలను తీసుకుని.. హిమాలయాల్లో పుట్టిన యమునా నదిలోని తాజా నీటిని ఉపయోగించి హిమాలయ పర్వత ప్రాంతాల్లో తయారు చేస్తున్నట్లు వెల్లడించింది. ఈ విస్కీలో ముదురు తీపి, ఎండు ద్రాక్షలను ఉపయోగించినట్లు పేర్కొంది. ఈ విస్కీస్ ఆఫ్ ది వరల్డ్ ఇచ్చే అవార్డ్స్ అనేది లిక్కర్ ఇండస్ట్రీలో ఇచ్చే అత్యంత ముఖ్యమైన అవార్డ్ అని తెలిపింది.

ప్రపంచ వ్యాప్తంగా తయారయ్యే విస్కీలను ఒక చోటుకు తీసుకువచ్చి.. అందులో అత్యుత్తమమైన విస్కీని ఏటా ఈ విస్కీస్ ఆఫ్ ది వరల్డ్ గుర్తించి అవార్డ్స్‌ను అందిస్తుంది. ఇందులో వరల్డ్ లోని వందకు పైగా విస్కీలు తమ అదృష్టాన్ని పరీక్షించుకుంటాయి. ఆ విస్కీలో వాడిన పదార్థాలు, దాని రుచి ఆధారంగా మొత్తం 100 పాయింట్లకు రేటింగ్ ఇచ్చి అందులో బెస్ట్ విస్కీని ఎంపిక చేస్తారు. అయితే ఈ ఇంద్రి విస్కీకి గతంలోనూ పలు అవార్డులు వరించాయి. టోక్యో విస్కీ అండ్ స్పిరిట్స్ కాంపిటీషన్ 2023 ను ఇంద్రి కంపెనీకి చెందిన సింగిల్ మార్ట్ ట్రినీ సాధించింది. ఫిఫ్టీ బెస్ట్ వరల్డ్ విస్కీస్ 2022, ది ఇంటర్నేషనల్ విస్కీ కాంపిటీషన్ ఇన్ లాస్ వేగాస్, ప్రపంచంలోని టాప్ 20 విస్కీస్‌లోనూ చోటు దక్కించుకుంది.