రేటింగ్స్ పేరుతో నిండా ముంచేశారు,,,,రూ.12.84 లక్షలు పోగొట్టుకున్న యువతి

సైబర్ మోసాలు ఇటీవల కాలంలో బాగా పెరిగిపోతున్నాయి. గతంలో బ్యాంకులు, కేవైసీ, ఏటీఎం కార్డులు అంటూ బురిడీ కొట్టించిన సైబర్ కేటుగాళ్లు.. ఇప్పుడు రూటు మార్చారు. ఉద్యోగాల పేరుతో సరికొత్త మోసాలు మొదలు పెట్టారు. ఇంట్లో కూర్చుని రూ.లక్షల్లో సంపాదించొచ్చని అమాయకుల్ని మాయ చేస్తున్నారు. చిన్న పని చేస్తే భారీగా ఆదాయం వస్తుందని నమ్మించి ముంచేస్తున్నారు. తాజాగా అనకాపల్లిలో కూడా ఘరానా మోసం బయటపడింది. రేటింగ్‌ల పేరుతో ఓ యువతిని బురిడీ కొట్టించారు.

అనకాపల్లికి చెందిన యువతి బీటెక్‌ పూర్తి చేసింది. అమెరికా వెళ్లడానికి ఎడ్యుకేషనల్ లోన్ కింద బ్యాంకులో రూ. 15 లక్షలు కుటుంబ సభ్యులు తీసుకున్నారు. ఈ డబ్బులు యువతి అకౌంట్‌లో‌నే ఉన్నాయి. అయితే గత నెల 24న జ్యోతిర్మయి మొబైల్‌కు ఓ వాట్సాప్‌ మెసేజ్‌ వచ్చింది. గూగుల్‌ మ్యాప్‌లో హోటల్స్‌కు పబ్లిక్‌తో రేటింగ్‌ ఇప్పిస్తే డబ్బులు ఇస్తామని ప్రస్తావించారు. ముందుగా మనం రూ. 5 వేలు కడితే రూ. 7 వేలు చెల్లిస్తామని చెప్పడంతో యువతి ఆశపడి ఆ డబ్బుల్ని చెల్లించింది. ఆమె డబ్బులు కడుతున్న కొద్ది తిరిగి రావాలంటే మరికొంత నగదు కట్టాలని చెబుతుండటంతో రూ. 12.84 లక్షలు ఒకేరోజు పలుమార్లు చెల్లించింది.

ఇంకా రూ. 3 లక్షలు కడితే డబ్బులు అన్నీ ఒకేసారి వచ్చేస్తాయని చెప్పడంతో జ్యోతిర్మయి తన అన్నయ్య కేశవనాయుడును రూ. 3 లక్షలు అడిగింది. ఎందుకని అడగడంతో జరిగిన విషయం చెప్పడంతో అతడు అసలు విషయం చెప్పాడు. రేటింగ్స్ పేరుతో మోసాలు జరుగుతున్నాయని తెలుసుకుని పోలీసులను ఆశ్రయించారు. ఆదివారం ఈ ఘటనపై కేసు నమోదు చేసి దర్యాప్తు చేస్తున్నారు పోలీసులు.. పాపం యువతి అమాయకంగా రూ. 12.84 లక్షలు పోగొట్టుకుంది.సైబర్ మోసాల విషయంలో జాగ్రత్తగా ఉండాలని పోలీసులు హెచ్చరిస్తున్నారు. వాట్సాప్‌కు వచ్చే మెసేజ్‌లో విషయంలో జాగ్రత్తగా ఉండాలని సూచిస్తున్నారు.