నాసిరకం మద్యంతో ప్రజలప్రాణాలతో చెలగాటం ఆడుతున్నారు
Andhra Pradesh Telugu | Suryaa Desk | Published : Thu, Nov 02, 2023, 07:50 PM
రాష్ట్రంలో మద్యం పెద్ద సమస్యగా మారిందని బీజేపీ రాష్ట్ర అధ్యక్షురాలు దగ్గుబాటి పురందేశ్వరి ఆందోళన వ్యక్తం చేశారు. నాసిరకం మద్యం తయారుచేసి, పేదల ప్రాణాలతో రాష్ట్ర ప్రభుత్వం చెలగాటమాడుతోందని మండిపడ్డారు. రాష్ట్ర ప్రభుత్వ అవినీతి, అప్పులు, అభివృద్ధి శూన్యత, నిర్మాణం కాని ప్రాజెక్టులు, మద్యం, మైనింగ్, ఇసుక మాఫియాపై బుధవారం తిరుపతిలో జరిగిన బీజేపీ జిల్లా కార్యవర్గ సమావేశంలో ఆమె ధ్వజమెత్తారు. రాష్ట్రంలో ఇసుక, మైనింగ్ మాఫియా చెలరేగిపోతోందన్నారు. రాష్ట్రాన్ని అప్పుల ఊబిలోకి నెట్టేశారని, దాదాపు రూ.11లక్షల కోట్ల రుణ భారం ఏపీపై ఉందని చెప్పారు. వ్యవస్థలో ఉన్న వెసులుబాటును ఉపయోగించుకుంటూ కొత్త అప్పులు తీసుకురావడంపైనే వైసీపీ ప్రభుత్వం దృష్టి పెట్టిందన్నారు. పంచాయతీలకు, సర్పంచులకు అందాల్సిన వనరులను రాష్ట్ర ప్రభుత్వం లాగేసుకోవడంతో గ్రామీణాభివృద్ధి కుంటుపడిందన్నారు. గత తొమ్మిదిన్నరేళ్లలో కేంద్రం ఆన్ని విధాలా రాష్ట్రానికి సహకారం అందించిందని పేర్కొన్నారు. రాష్ట్రంలో జరిగిన ప్రతీ అభివృద్ధి పనిలో కేంద్రం వాటా ఉందని చెప్పారు. దేశవ్యాప్తంగా పేదవారికి కేంద్రం 4కోట్ల ఇళ్లను మంజూరు చేస్తే అందులో ఒక్క ఏపీకే 25లక్షల ఇళ్లు ఇచ్చిందని, వాటిలో ఎన్నింటిని రాష్ట్రం పూర్తిచేసిందో చెప్పాలని డిమాండ్ చేశారు.
|
|