తిరుపతిలో హెలికాప్టర్ రైడ్ ప్రారంభం,,,,ఒక్క రైడ్‌కు రూ.6వేలు
Andhra Pradesh Telugu | Suryaa Desk | Published : Fri, Nov 03, 2023, 07:59 PM
తిరుమల శ్రీవారి దర్శనం కోసం వెళ్లే భక్తులకు శుభవార్త. తిరుపతిలో హెలికాప్టర్ రైడ్ ప్రారంభమైంది. చెన్నైకు చెందిన ఏరో డాన్ ఏవియేషన్ సంస్థ నిర్వాహకులు.. తిరుపతి తుమ్ములగుంట క్రికెట్ స్టేడియం నుంచి ప్రారంభించారు. ఈ హెలికాప్టర్ రైడ్ ద్వారా తిరుపతి శేషాచల అందాలను, తిరుపతి పరిసరాలు వీక్షించేందుకు రూ. 6 వేలకు అందుబాటులోకి తీసుకొచ్చారు. అలాగే తిరుమల శ్రీవారి దర్శనానికి వచ్చే వారి కోసం కూడా ప్రత్యేకంగా ప్యాకేజీ రూపంలో కూడా బుక్ చేసుకోవచ్చు అని నిర్వాహకులు తెలిపారు. స్థానికులతో పాటూ భక్తులు కూడా ఈ రైడ్ ఎంజాయ్ చేయొచ్చంటున్నారు.
‘ఏరో డాన్’ అనే సంస్థ తిరుపతి, చంద్రగిరి చుట్టుపక్కల ఉన్న ప్రదేశాలను విహంగ వీక్షణం చేసేందుకు ఈ రైడ్‌‌ని తీసుకొచ్చింది. ఇప్పటికే ట్రయల్ రన్ నిర్వహించారు. బుకింగ్స్ కూడా అందుబాటులోకి తీసుకొచ్చారు. ఈ హెలికాప్టర్‌లో ఆరు సీట్ల కెపాసిటీ ఉంటుంది. అంటే పైలట్ కాకుండా ఐదుగురు పర్యాటకులు హెలికాప్టర్‌లో రైడ్‌కు వెళ్లొచ్చు. తిరుపతి చుట్టు పక్కల అందాలతో పాటుగా శేషాచలం అడవుల్ని చూసే అవకాశం ఉంటుందని ఏరో డాన్ ప్రతినిధులు చెబుతున్నారు. ఈ రైడ్ సక్సెస్ అయితే తిరుపతి టు చెన్నై మార్గంలో కూడా ప్రవేశపెట్టే ఆలోచన ఉందని ఏరో డాన్ ప్రతినిధులు చెబుతున్నారు.
|
|