ఏపీకి రూ.5300 కోట్లు నిలిపేసిన కేంద్రం

కేంద్రానికి సంబంధించిన పథకం చివరన మూడే మూడు అక్షరాలు చేర్చడం వల్ల ఆంధ్రప్రదేశ్‌కు కేంద్ర ఆర్థిక శాఖ ఏకంగా 5300 కోట్ల రూపాయలను నిలిపివేసింది. ప్రధానమంత్రి ఆవాస్ యోజన చివరన (పీఎంఏవై) పథకం పేరు చివరన YSR పేరు చేర్చడంతో కేంద్రం పెద్ద మొత్తంలో నిధుల విడుదలను ఆపేసింది. కేంద్రం స్పాన్సర్ చేస్తున్న పథకం చివరన ‘వైఎస్సార్’ ఎలా జత చేస్తారని కేంద్ర ఆర్థిక శాఖ వివరణ కోరింది. కేంద్ర గ్రామీణాభివృద్ధి శాఖ కార్యదర్శి ఈ ఏడాది ఆగస్టు 8న ఆంధ్రప్రదేశ్ ప్రభుత్వానికి లేఖ రాశారు. రాష్ట్ర ప్రభుత్వం ఆ లేఖకు బదులివ్వడంతో ఆగస్టు 30న మరోసారి గుర్తుచేశారు. అప్పటికీ సమాధానం రాకపోవడంతో నిధుల విడుదలను ఆపేసినట్లు కేంద్ర ఆర్థిక శాఖ కార్యదర్శి టీవీ సోమనాథన్ పేర్కొన్నారు.

పీఎంఏవై పథకాన్ని కేంద్రం ప్రతిష్టాత్మకంగా అమలు చేస్తోంది. ఈ పథకం కింద దేశవ్యాప్తంగా పేదలకు 2 కోట్ల ఇళ్లను నిర్మించి ఇవ్వాలనేది లక్ష్యం. ఆంధ్రప్రదేశ్ ప్రభుత్వం 2024 మార్చి లోగా 1.79 లక్షల ఇళ్లు నిర్మించి ఇవ్వాలని లక్ష్యంగా పెట్టుకుంది. అయితే, పీఎంఏవై పథకం కింద కేంద్ర, రాష్ట్ర ప్రభుత్వాలు 60:40 నిష్పత్తిలో నిధులను కేటాయిస్తున్నాయి. పీఎంఏవై-జీ పథకం కింద ఒక్కో ఆవాసానికి రూ. 1.3 లక్షల చొప్పున నిధులు కేటాయిస్తుండగా.. ఇందులో ఏపీ ప్రభుత్వం రూ. 70 వేలు భరిస్తోంది. అంటే.. 50 శాతానికంటే అధిక నిధులు. 40 శాతం, అంతకంటే ఎక్కువ నిధులను భరిస్తూ కూడా రాష్ట్ర ప్రభుత్వం ఎలాంటి ప్రచారం చేసుకోకూడదా అనేది ఏపీ అధికారుల వాదన. ప్రధానమంత్రి ఆవాస్ యోజన పథకం చివరన వైఎస్సార్ చేర్చుకుంటామని, కేంద్రం లోగోతో పాటు, రాష్ట్ర ప్రభుత్వ లోగోను కూడా జత చేసుకుంటామని కోరుతూ.. ఆంధ్రప్రదేశ్ ప్రభుత్వం కేంద్రానికి గతంలో లేఖ రాసింది. అయితే, కేంద్ర గ్రామీణాభివృద్ధి శాఖ ఆ ప్రతిపాదనను తోసిపుచ్చింది. పీఎంఏవై పథకం కింద ఇచ్చిన మార్గదర్శకాలను కచ్చితంగా పాటించాలని స్పష్టం చేసింది.

రాష్ట్ర ప్రభుత్వ లోగోను కూడా వేయడానికి వీల్లేదని ఏపీ సర్కార్‌కు కేంద్రం సూచించింది. ఎలాంటి మార్పులు చేసినా నిధులను నిలిపివేస్తామని తెలిపింది. ఈ పథకం కింద ఆంధ్రప్రదేశ్ కంటే అధిక నిధులు భరిస్తున్న రాష్ట్రాలు కూడా ఉన్నాయని.. అయినప్పటికీ, కేంద్రం లోగో, మార్గదర్శకాల మేరకే పథకాన్ని అమలు చేస్తున్నారని కేంద్ర ఆర్థిక శాఖ కార్యదర్శి సోమనాథన్ వివరించారు. పశ్చిమ బెంగాల్ ప్రభుత్వం ఈ పథకాన్ని ‘బంగ్లా ఆవాస్ యోజన’ పేరుతో అమలు చేస్తోంది. దీంతో 2022 నుంచి ఆ రాష్ట్రానికి కేంద్రం నుంచి నిధులను నిలిపివేసినట్లు సోమనాథన్ తెలిపారు. కేవలం మూడు అక్షరాలను జత చేయడం వల్ల కేంద్రం నుంచి రాష్ట్రానికి రూ.5300 కోట్లు నిలిచిపోయాయి. ఈ ఏడాదికి సంబంధించి రూ.4,000 కోట్లతో పాటు, గతేడాది బకాయిలు రూ. 1,300 కోట్లను కేంద్రం నిలిపివేసింది. మొత్తానికి వైఎస్సార్ పేరు, ఏపీ బ్రాండ్‌ను తొలగించేందుకు వైఎస్ జగన్ ప్రభుత్వం అంగీకరించినట్లు తెలుస్తోంది.