పుట్టపర్తిలో రైతు భరోసా నిధులు విడుదల,,,,బటన్ నొక్కి జమ చేసిన సీఎం వైఎస్ జగన్

ఆంధ్రప్రదేశ్ ముఖ్యమంత్రి వైఎస్ జగన్‌మోహన్ రెడ్డి వైఎస్సార్‌ రైతు భరోసా నిధుల్ని విడుదల చేశారు. శ్రీసత్యసాయి జిల్లా పుట్టపర్తిలో జరిగిన కార్యక్రమంలో బటన్ నొక్కి డబ్బుల్ని రైతుల అకౌంట్‌‌లలోకి జమ చేశారు. ఒక్కొక్కరికి రూ.4,000 చొప్పున 53.53 లక్షల మంది రైతన్నలకు రూ.2,204.77 కోట్ల రైతు భరోసా సాయం అందించారు. దేవుడి దయతో మంచి కార్యక్రమం జరుగుతోందన్నారు సీఎం జగన్. లక్షలాదిమంది రైతులకు పెట్టబడి సాయం అందిస్తున్నామని.. రైతులు ఇబ్బందులు పడకూడదనే రాష్ట్ర ప్రభుత్వం ముందుగా నిధులు ఇస్తోందన్నారు.

కేంద్రం పీఎం కిసాన్‌డబ్బులు కూడా ఈనెలలోనే వస్తాయని.. పీఎం కిసాన్‌ నిధులు కూడా విడుదల చేయాలని కేంద్రాన్ని కోరానన్నారు. ప్రతి విషయంలో అన్నదాతలకు అండగా నిలబడ్డామని..పంట సీజన్‌లో నష్టం జరిగితే అదే సీజన్‌లో ఇన్‌పుట్‌ సబ్సిడీ అందిస్తున్నామన్నారు. గడిచిన నాలుగేళ్లలో రూ. 60 వేల కోట్ల విలువైన ధాన్యం కొనుగోలు చేశామని.. సున్నా వడ్డీకి నిజమైన అర్థం చెబుతూ రైతన్నకి భరోసా కల్పిస్తున్నామన్నారు. గతంలో సున్నా వడ్డీ పథకాన్ని నీరుగార్చే ప్రయత్నం జరిగిందని.. చంద్రబాబు హయాంలో హెరిటేజ్‌ కంపెనీకి లాభాలు పెరిగాయన్నారు.

రైతులకు మంచి చేయాలన్న ఆలోచన చంద్రబాబుకు ఎందుకు రాలేదని ప్రశ్నించారు జగన్. ఈ ప్రభుత్వంలో పుష్కలంగా వర్షాలు పడ్డాయని.. గతంలో ఎప్పుడైనా ఇలా జరిగిందా అన్నారు. టీడీపీ ప్రభుత్వంలో వ్యవసాయానికి 7 గంటల కరెంట్‌ కూడా ఇవ్వలేకపోయారని.. మనసున్న ప్రభుత్వానికి మనసులేని ప్రభుత్వానికి తేడా గమనించాలన్నారు. ఈ-క్రాప్‌ ద్వారా ప్రతి రైతుకు మంచి జరిగేలా చేస్తున్నామని.. ప్రతి గ్రామాల్లో ఆర్‌బీకే కేంద్రాలు పని చేస్తున్నాయన్నారు. ఏటా రూ. 13, 500 రైతు భరోసా సాయం అందిస్తున్నామన్నారు.

రూ. 1700 కోట్లతో ఫీడర్ల సామర్థ్యం కూడా మన ప్రభుత్వంలోనే పెంచామని.. ఈ నాలుగేళ్లలో రూ, 7,800 కోట్ల బీమా అందించామన్నారు. చంద్రబాబు హయాంలో వరుసగా ఐదేళ్లు కరువేనని.. దేవుడి దయతో గత నాలుగేళ్లుగా కరువు మాటేలేదన్నారు. 14 ఏళ్లు సీఎంగా ఉన్న చంద్రబాబు రైతులకు చేసిందేమీ లేదని.. గత ప్రభుత్వానికి మన ప్రభుత్వానికి తేడా చూడాలన్నారు. ఎందుకు గత ప్రభుత్వం జగన్‌లా సంక్షేమం అందించలేకపోయిందన్నారు.

రైతులకు అందాల్సిన ఇన్ పుట్ సబ్సిడీ, ఇన్సూరెన్స్ చంద్రబాబు ఎగ్గొట్టారన్నారు. 14 ఏళ్లు ముఖ్యమంత్రిగా పనిచేసిన చంద్రబాబు నాయుడు రైతన్నల బాగోగులు ఎందుకు పట్టించుకోలేదన్నారు. రుణమాఫీ పేరుతో రైతులు, డ్వాక్రా మహిళలను మోసం చేసిన దుర్మార్గుడు చంద్రబాబు అంటూ ధ్వజమెత్తారు. 53 నెలల వైఎస్సార్‌సీపీ పాలనా కాలంలో ఎక్కడా కరవు లేదని.. ఇప్పుడు వర్షాభావం వల్ల కొన్ని ప్రాంతాల్లో కరవు నెలకొందన్నారు. నాలుగున్నరేళ్లలో 1.75 లక్షల కోట్ల రూపాయలు వ్యవసాయ అభివృద్ధి కోసం ఖర్చు చేశామన్నారు.

అక్క చెల్లెమ్మల మంచి కోసం అమ్మ ఒడి, ఆసరా, చేయూత, సున్నావడ్డీ పథకాలు అందిస్తున్నామన్నారు. ఈ నాలుగేళ్లలో ప్రతి ఇంట్లో మంచి జరిగింది.. లేదా మీరే చూడాలన్నారు. తనకు మీడియా మద్దతు అవసరం లేదని.. అండదండలు లేవని.. తాను నమ్ముకుంది ప్రజల్ని మాత్రమే అన్నారు. మంచి జరిగి ఉంటే సైనికులుగా నిలబడండి అన్నారు. చంద్రబాబుకు దోచుకోవడం, దాచుకోవడం తెలుసని.. చంద్రబాబు పేరు చెబితే స్కామ్‌లే గుర్తుకొస్తాయన్నారు. చంద్రబాబు హయాంలో ఈ డబ్బంతా ఎవరి జేజుల్లోకి వెళ్లిందని.. చంద్రబాబు హయాంలో పిల్లల చదువులు, బడులు ఎందుకు మారలేదన్నారు.

స్వార్థం కోసమే చంద్రబాబుకు అధికారం కావాలని కొన్ని మీడియా సంస్థలు, దత్తపుత్రుడు తాపత్రయం పడుతున్నారన్నారు సీఎం.

స్కాంలు చేసేందుకు చంద్రబాబు అధికారం కోసం తాపత్రయ పడుతున్నారని.. స్కిల్ డెవలప్మెంట్ స్కాం, ఫైబర్ నెట్ స్కాం అమరావతి భూ అక్రమాల కుంభకోణాలు చంద్రబాబును వెంటాడుతున్నాయన్నారు. 'నాకు మద్దతు ఇవ్వాలని దత్తపుత్రుడిని మీ బిడ్డ కోరడు.. నాకు సపోర్ట్ చేయాలని మీడియాను మీ బిడ్డ ఏనాడూ కోరడు' అన్నారు. మోసపూరిత హామీలతో వస్తారు.. కిలో బంగారం, బెంజ్ కార్లు ఇస్తామంటారు.. ప్రతిపక్షాల మాయమాటలు నమ్మవద్దన్నారు.